عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
باوەردار ژ دەستهەلاتا گونەهێ یێ ئازادە 
1
ئەڤجا ئەم چ بێژین؟ ئایا ئەم د ناڤ گونەهێ دا بەردەوام بین، داكو كەرەم پتر لێ بهێت؟
2
حاشا! ئەم ئەوێن دەربارەی گونەهێ مرین، چەوا دشێین ئێدی د ناڤ گونەهێ دا بژین؟
3
ما هوین نزانن، ئەم هەمی یێن كو بۆ ئێكبوونێ ل گەل مەسیح عیسای هاتینە تافیركرن، ئەم د مرنا وی دا هاتینە تافیركرن؟
4
ئەڤجا ب تافیركرنێ ئەم بووینە هەڤپشكێن مرنا وی و ل گەل وی هاتینە ڤەشارتن، داكو كا چەوا مەسیح ب مەزناهیا بابی ژ ناڤ مریان هاتیە راكرن، هۆسا ئەم ژی د ژیانا نویبووی دا بژین.[a]
5
چنكو ئەگەر ئەم د مرنەكا وەكو مرنا وی دا ل گەل وی بووینە ئێك، مسۆگەر دێ د ڤەژینا وی دا ژی ل گەل وی بینە ئێك.
6
ئەم دزانین كو ئەو مرۆڤێ كەڤن ئەوێ د ناخێ مە دا ل گەل وی هاتە خاچدان، دا لەشێ مە یێ گونەهكار ژ كار بكەڤیت و ئێدی بەنیاتیێ بۆ گونەهێ نەكەین.
7
چنكو ئەوێ مر، ئەو ژ گونەهێ یێ ئازاد بووی.
8
ئەگەر ئەم ل گەل مەسیحی مربین، ئەم باوەر دكەین كو ئەم دێ ل گەل وی ژین ژی.
9
ئەم دزانین پشتی مەسیح ژ ناڤ مریان هاتیە راكرن، ئێدی ئەو نامریت و مرنێ دەستهەلات ل سەر وی نینە.
10
ب وێ مرنا ئەو مری، دەربارەی گونەهێ ئەو ب ئێكجاری مر، لێ ب وێ ژیانا ئەو دژیت، ئەو بۆ خودێ دژیت.
11
هۆسا هوین ژی دەربارەی گونەهێ، خۆ ب مری بهژمێرن، لێ ب مەسیح عیسای ژ بۆ خودێ، ب زیندی بهژمێرن.
12
ئەڤجا نەهێلن گونەهـ د لەشێ هەوە یێ مردار دا دەستهەلاتێ بكەت، دا هوین ملكەچی حەزێن وی نەبن.
13
ئەندامێن لەشێ خۆ ژی وەك چەكێن خرابیێ پێشكێشی گونەهێ نەكەن. لێ خۆ وەك یێن ژ ناڤ مریان رابووین پێشكێشی خودێ بكەن، ئەندامێن لەشێ خۆ ژی وەك چەكێن راستداریێ پێشكێشی خودێ بكەن.
14
گونەهـ دەستهەلاتێ ل سەر هەوە ناكەت، چنكو هوین نە د بن دەستووری دانە، لێ هوین یێن د بن كەرەمێ دا.
بەنیاتیا راستیێ 
15
ئێدی چ؟ ما ئەم گونەهێ بكەین، چنكو ئەم نە د بن دەستووری داینە، لێ د بن كەرەمێ داینە؟ حاشا!
16
ما هوین نزانن كو ئەوێ هوین ژ بۆ بەنیاتیێ خۆ ب دەست وی ڤە بەرددەن و گوهداریا وی دكەن، دبنە بەنیێن وی یێ هوین گوهداریا وی دكەن؟ یان بەنیێن گونەهێ كو بەرەڤ مرنێیە، یان ژی بەنیێن گوهداریێ كو بەرەڤ راستداریێیە.
17
لێ سوپاس بۆ خودێ كو هەر چەندە هوین بەنیێن گونەهێ بوون، لێ هەوە ژ هەمی دلێ خۆ گوهداریا وێ فێركرنێ كر، ئەوا هەوە وەرگرتی.
18
هوین ژ گونەهێ هاتنە ئازادكرن و بوونە بەنیێن راستداریێ.
19
ژ بەر لاوازیا بنیاتێ هەوە یێ مرۆڤكانی، ئەز ئاخفتنێن مرۆڤان ب كار دئینم. كا چەوا هەوە ژ بۆ خرابیێ ئەندامێن لەشێ خۆ وەك بەنی پێشكێشی پویچاتیێ و خرابیێ دكرن، هۆسا ژی نوكە ژ بۆ پیرۆزیێ ئەندامێن لەشێ خۆ وەك بەنی پێشكێشی راستداریێ بكەن.
20
چنكو دەمێ هوین بەنیێن گونەهێ، هوین ژ راستداریێ د ئازاد بوون.
21
ئەڤجا وی دەمی هەوە چ بەرهەم ژ وان تشتێن هوین نوكە شەرم ژێ دكەن ب دەست خۆ ڤە ئینا؟ كو ئەنجامێ وان تشتان مرنە.
22
لێ نوكە كو هوین ژ گونەهێ هاتینە ئازادكرن و بووینە بەنیێن خودێ، هوین بەرهەمی بۆ پیرۆزیێ ب دەست خۆ ڤە دئینن، ئەنجام ژی ژیانا هەروهەرە.
23
چنكو كرێیا گونەهێ مرنە، لێ دیاریا خودێ، ژ دەولەتسەرێ خودانێ مە مەسیح عیسای، ژیانا هەروهەرە.
  1. a. 6‏:4 كۆلۆسی 2‏:12