عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
بەرخ و سروودا سەد و چل و چوار هزاران 
1
پشتی هنگی من بەرێ خۆ دایێ، ئەڤە بەرخ ل سەر چیایێ سییۆنێ یێ راوەستیای بوو و سەد و چل و چوار هزار مرۆڤ ل گەل وی بوون، ئەوێن ناڤێ بەرخی و ناڤێ بابێ وی ل سەر ئەنیا وان نڤیسای بوو.
2
من دەنگەك ژ ئەسمانی بهیست، وەكو دەنگێ گەلەك ئاڤان و وەكو دەنگێ گڕگڕەكا مەزن یا عەوران بوو. ئەو دەنگێ من بهیستی، وەكو دەنگێ لێدەرێن قیسارەیێ بوو دەمێ ل قیسارەیێن خۆ ددەن.
3
ئەوان ل پێشیا تەختی و ل پێشیا هەر چوار ئافراندیێن زیندی و ریهسپیان سروودەكا نوی دستراند. كەس نەدشیا فێری وێ سروودێ ببیت ژبلی وان سەد و چل و چوار هزار مرۆڤێن ژ ئەردی هاتینە كڕین.
4
ئەڤە ئەون یێن ل گەل ژنكان نەهەڕمین، وان كوڕینیا خۆ پاك پاراستیە. ئەڤە ئەون یێن بەرخ كیڤە بچیت ئەو ب دویڤ دكەڤن. ئەو ژ ناڤ مرۆڤان هاتینە كڕین[a] ، وەكو خێڤە[b] بۆ خودێ و بەرخی.
5
چ درەو ژ دەڤێ وان دەرنەكەفتینە، ئەو د بێكێماسینە.
هەر سێ فریشتە 
6
پشتی هنگی من فریشتەیەكێ دی دیت، ل ناڤەندا ئەسمانی دفڕی، مزگینیا هەروهەری هەبوو، دا وێ بۆ ئاكنجیێن ئەردی ژ هەمی مللەت و هۆز و زمان و گەلان رابگەهینیت،
7
ب دەنگەكێ بلند دگۆت: «ژ خودێ بترسن و پەسنا[c] وی بكەن، چنكو دەمژمێرا دادكرنا وی یا هاتی. سوجدێ بۆ وی ببەن یێ ئەرد و ئەسمان و دەریا و كانیێن ئاڤێ چێكرین.»
8
فریشتەیەكێ دی، یێ دوویێ، ب دویڤ وی را هات و دگۆت: «كەفت! بابلا مەزن كەفت، ئەوا شەرابا هار یا دەهمەنپیسیا خۆ ب هەمی مللەتان دایە ڤەخوارن.»[d]
9
فریشتەیەكێ دی، یێ سێیێ، ب دویڤ وان را هات و ب دەنگەكێ بلند دگۆت: «ئەگەر ئێك سوجدێ بۆ دڕندەی و وێنەیێ وی ببەت و نیشانا وی ل سەر ئەنیا خۆ یان ل سەر دەستێ خۆ قەبیل كەت،
10
ئەو ژی دێ ژ شەرابا تۆڕەبوونا خودێ یا دژوار ڤەخۆت، ئەوا چ تشت ل گەل نەهاتینە تێكهەلكرن و پەرداغا تۆڕەبوونا خودێ ژێ هاتیە داگرتن، هەروەسا دێ ب ئاگری و كپریتێ ل پێشیا فریشتەیێن پیرۆز و ل پێشیا بەرخی هێتە ئەشكەنجەدان[e]
11
و دویكێلا ئەشكەنجەدانا وان دێ بۆ هەتا هەتایێ بلند بیت. بۆ ئەوێن سوجدێ بۆ دڕندەی و وێنەیێ وی دبەن، یان ئەوێن نیشانا ناڤێ وی قەبیل دكەن، ب شەڤ و رۆژ بێهنڤەدان نینە.»
12
ل ڤێرێ خۆڕاگرتنا پیرۆزكریان یا فەرە، ئەوێن فەرمانێن خودێ ب جهـ دئینن و دلسۆزیا خۆ ب عیسای دپارێزن.
13
پشتی هنگی من دەنگەك ژ ئەسمانی بهیست دگۆت: «بنڤیسە: خوزیكێن وان مریان، ئەوێن ژ نوكە و پێڤە ل سەر باوەریێ ب خودانی دمرن.» گیانێ پیرۆز دبێژیت: «بەلێ! دا ژ وەستیانا خۆ بێهنا خۆ ڤەدەن، چنكو كریارێن وان دێ ل گەل وان چن.»
دروینا رویێ ئەردی 
14
پاشی من بەرێ خۆ دایێ، ئەڤە عەورەكێ سپی و ل سەر عەوری ئێكێ وەكو كوڕێ مرۆڤ[f] یێ روینشتی بوو! تانجەكا زێڕین ل سەر سەرێ وی بوو و شالۆكەكا تیژ د دەستی دا بوو.[g]
15
فریشتەیەكێ دی ژ پەرستگەهێ دەركەفت، ب دەنگەكێ بلند گازی ئەوێ ل سەر عەوری روینشتی دكر و دگۆت: «شالۆكا خۆ هەلگرە و دروینێ بكە، چنكو دەمژمێرا دروینێ هات و بەرهەمێ ئەردی یێ گەهشتی.»[h]
16
ئینا ئەوێ ل سەر عەوری روینشتی شالۆكا خۆ دا رویێ ئەردی و ئەرد هاتە دروین.
17
پاشی فریشتەیەكێ دی ژ پەرستگەها ل ئەسمانی دەركەفت، وی ژی شالۆكەكا تیژ ڤێ بوو.
18
پشتی هنگی فریشتەیەكێ دی، ئەوێ دەستهەلات ل سەر ئاگری هەی، ژ قوربانگەهێ دەركەفت و ب دەنگەكێ بلند گازی كرە فریشتەیێ شالۆكا تیژ ڤێ و گۆتێ: «شالۆكا خۆ هەلگرە و ئیشیێن مێوێن ئەردی كۆم بكە، چنكو تریێ وێ یێ گەهشتی.»
19
فریشتەی شالۆكا خۆ دا رویێ ئەردی و تریێ ئەردی كۆم كر و هاڤێتە د ئویسلەیا[i] مەزن یا تۆڕەبوونا خودێ دا.
20
ئینا ئویسلە ژ دەرڤەی باژێڕی ب پێیان هاتە گڤاشتن و خوین ژێ دەركەفت، تاكو گەهشتیە هەفسارێ هەسپان، فرەهیا هزار و شەش سەد ستادیان[j] .
  1. a. 14‏:4 پەیڤا ‹كڕین› ئاماژەیە بۆ قورتالكرنا مەسیحی، كو وی ب خوینا خۆ مرۆڤ ژ دیلاتیێ كڕین و رزگار كرن. ل 5‏:9 بنێڕە.
  2. b. 14‏:4 q خێڤە: بەرهەمێ دەستپێكێ. ل فەرهەنگۆكێ بنێڕە.
  3. c. 14‏:7 q پەسن: مەدح و سەنا
  4. d. 14‏:8 ئیشایا 21‏:9؛ یەرمیا 51‏:8
  5. e. 14‏:10 دەستپێكرن 19‏:24؛ حزقیێل 38‏:22
  6. f. 14‏:14 q كوڕێ مرۆڤ: ل فەرهەنگۆكێ بنێڕە.
  7. g. 14‏:14 دانیێل 7‏:13
  8. h. 14‏:15 یۆئێل 3‏:13
  9. i. 14‏:19 q ئویسلە: ئاڵاڤێ گڤاشتنا تریە د كەڤری دا دهێتە كۆلان و چێكرن.
  10. j. 14‏:20 ئانكو نێزیكی300 كیلۆمەتران. هەر ستادیەك 185 مەترە.