عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دەركەفتنا دوو دڕندەیان 
1
ئینا من دڕندەیەك دیت ژ دەریایێ دەردكەفت، حەفت سەر و دەهـ شاخ هەبوون، ل سەر شاخێن وی دەهـ تانج هەبوون و ل سەر سەرێن وی ناڤێ كوفریان هەبوو.
2
ئەو دڕندەیێ من دیتی، وەكو پلنگی بوو، پێیێن وی وەكو پێیێن هرچێ بوون و دەڤێ وی وەكو دەڤێ شێری بوو. ئەژدەهای هێزا خۆ و تەختێ خۆ و دەستهەلاتەكا مەزن دانێ.
3
ئێك ژ سەرێن دڕندەی یێ وەسا بوو هەروەكو بۆ مرنێ هاتبیتە برینداركرن، لێ برینا وی یا كوژەك هاتبوو ساخكرن. هەمی جیهان حێبەتی مان و ب دویڤ دڕندەی كەفتن
4
و سوجدە بۆ ئەژدەهای بر، چنكو وی دەستهەلاتا خۆ دا دڕندەی. وان سوجدە بۆ دڕندەی بر و گۆتن: «ما كی وەكو ڤی دڕندەیە؟ و كی دشێت ل دژی وی بجەنگیت؟»
5
ئەزمانەك[a] بۆ وی دڕندەی هاتە دان، كو تشتێن مەزن و گۆتنێن كوفری بێژیت و دەستهەلات بۆ وی هاتە دان كو چل و دوو هەیڤان چ دڤێت بكەت.
6
ئەوی دەڤێ خۆ ڤەكر و كوفری ل دژی خودێ كرن، كوفری ل دژی ناڤێ وی و ل دژی خیڤەتا وی[b] و ل دژی ئاكنجیێن ل ئەسمانی كرن.
7
دەستویری بۆ وی هاتە دان، كو ل دژی پیرۆزكریان بجەنگیت و ل سەر وان سەر بكەڤیت. هەروەسا دەستهەلات ل سەر هەمی هۆز و گەل و زمان و مللەتان بۆ وی هاتە دان.[c]
8
هەمی ئاكنجیێن ل سەر ئەردی، ئەوێن ناڤێن وان هەر ژ دامەزراندنا جیهانێ د پەرتووكا ژیانێ یا بەرخێ ڤەكوشتی دا نەهاتینە نڤیسین، دێ سوجدێ بۆ دڕندەی بەن.[d]
9
ئەوێ گوهـ هەبن، بلا ببهیسیت:
10
ئەگەر بۆ ئێكی هاتیە نڤیسین ببیتە دیل،
دێ بەرەڤ دیلاتیێ ڤە چیت.
ئەگەر بۆ ئێكی هاتیە نڤیسین ب شیری بهێتە كوشتن،
دێ ب شیری هێتە كوشتن.[e]
ل ڤێرێ خۆڕاگرتن و دلسۆزیا پیرۆزكریان یا فەرە.
11
ئینا من دڕندەیەكێ دی دیت ژ ئەردی دەردكەفت، وی دوو شاخێن وەكو شاخێن بەرخی هەبوون و وەكو ئەژدەهای دئاخفت.
12
ئەو ژ پێش دڕندەیێ ئێكێ ڤە، هەمی دەستهەلاتا وی دگێڕیت و وە ل ئەردی و ئاكنجیێن وێ دكەت كو سوجدێ بۆ دڕندەیێ ئێكێ ببەن یێ برینا وی یا كوژەك هاتبوو ساخكرن.
13
ئەو نیشانێن مەزن دكەت، خۆ ئەو وە دكەت كو ل بەر چاڤێن مرۆڤان ئاگر ژ ئەسمانی بهێتە سەر ئەردی
14
و ب وان نیشانێن بۆ وی هاتینە دان كو ژ پێش دڕندەیێ ئێكێ ڤە بكەت، ئەو خەلكی دخاپینیت و دبێژیتە ئاكنجیێن ل سەر ئەردی وێنەیەكی بۆ وی دڕندەی چێكەن یێ ب شیری هاتیە برینداركرن و ژیای.
15
دەستهەلات ژی بۆ وی هاتە دان كو هەناسەیێ بدەتە وێنەیێ دڕندەیێ ئێكێ، داكو وێنەیێ دڕندەی بئاخڤیت و بشێت وان بدەتە كوشتن یێن سوجدێ بۆ وێنەیێ دڕندەی نەبەن.
16
ئەوی وە كر كو نیشانەك ل سەر دەستێ راستێ یان ئەنیا هەمی بچویك و مەزنان، دەولەمەند و هەژاران، ئازاد و بەنیان بهێتە كرن،
17
دا كەس نەشێت كڕینێ یان فرۆتنێ بكەت، ئەگەر نیشان ل سەر نەبیت، چ ناڤێ دڕندەی یان ژمارەیا ناڤێ وی بیت.
18
ل ڤێرێ ئاقلمەندی یا فەرە، ئەوێ زێهن هەبیت، بلا ژمارەیا دڕندەی بهژمێریت، چنكو ئەو ژمارەیا مرۆڤیە و ژمارەیا وی شەش سەد و شێست و شەشە.
  1. a. 13‏:5 دەق و دەق: ‹دەڤەك بۆ وی هاتە دان›.
  2. b. 13‏:6 q خیڤەتا وی: مەبەست پێ پەرستگەها خودێیە.
  3. c. 13‏:5‏-7 دانیێل 7‏:8، 21‏، 25
  4. d. 13‏:8 زەبوور 69‏:28
  5. e. 13‏:10 یەرمیا 15‏:2؛ 43‏:11