عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ژنك و ئەژدەها 
1
پشتی هنگی نیشانەكا مەزن ل ئەسمانی دیار بوو: ئەو ژی ژنكەك بوو، رۆژ وەكو كراسەكی ل بەر بوو و هەیڤ ل بن پێیێن وێ بوو و تانجەكا ژ دوازدە ستێران ل سەر سەرێ وێ بوو،
2
ئەو یا دووگیان بوو و دكرە قێژی ژ بەر ژان و ئازارێن زاڕۆكبوونێ.
3
نیشانەكا دی ژی ل ئەسمانی دیار بوو: ئەڤە ئەژدەهایەكێ سۆر یێ مەزن، یێ ب حەفت سەر و دەهـ شاخان و حەفت تانج ل سەر سەرێن وی.
4
كوریا وی سێئێكا ستێرێن ئەسمانی رامالین و هاڤێتنە سەر ئەردی. پاشی ئەژدەها ل پێشیا ژنكا ل بەر زاڕۆكبوونێ بوو راوەستیا، داكو زاڕۆكێ وێ داعویریت، دەمێ دبیت.[a]
5
ژنكێ زاڕۆكەكێ نێر بوو، ئەوێ كو دێ ب گۆپالەكێ ئاسنی حوكمداریێ ل هەمی مللەتان كەت، لێ كوڕێ وێ بۆ نك خودێ و بۆ نك تەختێ وی هاتە رەڤاندن.[b]
6
ئەو ژنك رەڤی چۆلی، بۆ جهەكی كو خودێ بۆ وێ ئامادە كربوو، داكو هزار و دوو سەد و شێست رۆژان بهێتە حەواندن.
میكائیل ب سەر دكەڤیت ل سەر ئەژدەهای 
7
هنگی جەنگەك ل ئەسمانی چێبوو، میكائیلی و فریشتەیێن وی شەڕ ل دژی ئەژدەهای كر، ئەژدەهای و فریشتەیێن وی ژی شەڕ كر،
8
لێ ئەژدەها ب سەر نەكەفت، ئێدی وان چ جهـ ل ئەسمانی نەما.[c]
9
ئەژدەهایێ مەزن، ئەو مارێ كەڤنە یێ كو دبێژنێ ئبلیس و ساتان[d] ، ئەوێ هەمی جیهانێ دخاپینیت[e] ، ئەو بۆ ئەردی هاتە هاڤێتن و فریشتەیێن وی ژی ل گەل وی هاتنە هاڤێتن.
10
هنگی من دەنگەكێ بلند بهیست ژ ئەسمانی دگۆت:
«نوكە قورتالبوون و هێز و پاشایەتیا خودایێ مە و
دەستهەلاتا مەسیحێ وی یێن هاتین،
چنكو سكالاكەرێ دژی خویشك و برایێن مە،
ئەوێ ب شەڤ و رۆژ ل پێشیا خودایێ مە سكالایێ ل وان دكەت،
بۆ ئەردی هاتە هاڤێتن.[f]
11
ئەو ب خوینا بەرخی و ب پەیڤا شاهدەییا خۆ
ل سەر وی ب سەركەفتن
و وان حەز ژ ژیانا خۆ نەكر، خۆ ل بەرامبەر مرنێ ژی.
12
ژ بەر ڤێ چەندێ دلخۆش ببن،
هەی ئەسمانان و یێن تێدا ئاكنجی.
لێ نەخوزیكێن ئەردی و دەریایێ،
چنكو ئبلیس بۆ هەوە ب تۆڕەبوونەكا مەزن هاتیە خوارێ،
ژ بەر كو ئەو دزانیت دەمێ وی یێ كێمە.»
13
گاڤا ئەژدەهای دیتی، كو ئەو بۆ ئەردی یێ هاتیە هاڤێتن، كەفتە دویڤ وێ ژنكا زاڕۆكێ نێر بووی.
14
لێ دوو چەنگێن ئەلهۆیێ مەزن بۆ ژنكێ هاتنە دان، داكو ژ ماری بڕەڤیت و بفڕیتە چۆلی، جهێ وێ یێ كو دێ دەم و دوو دەم و نیڤان[g] لێ هێتە حەواندن.
15
ئینا ماری ئاڤەكا وەكو رویباری ژ دەڤێ خۆ ب دویڤ ژنكێ را هاڤێت، دا ئاڤ وێ ببەت.
16
لێ ئەردی هاریكاریا ژنكێ كر، ئەوی دەڤێ خۆ ڤەكر و ئەو رویبار داعویرا، یێ ئەژدەهای ژ دەڤێ خۆ هاڤێتی.
17
ئینا ئەژدەها ژ ژنكێ تۆڕە بوو و چوو دا جەنگێ ل دژی دویندەها[h] وێ یا مای بكەت، ئەوێن فەرمانێن خودێ ب جهـ دئینن و شاهدەییێ بۆ عیسایێ مەسیح ددەن.
18
ئەژدەها ل سەر خیزێ كنارێ دەریایێ راوەستیا.
  1. a. 12‏:3‏-4 دانیێل 7‏:7؛ 8‏:10
  2. b. 12‏:5 زەبوور 2‏:9
  3. c. 12‏:7‏-8 دانیێل 10‏:13‏، 21؛ 12‏:1
  4. d. 12‏:9 q ساتان: پەیڤەكا عیبرانیە رامانا دژبەر یان بەرهنگار ددەت. ل فەرهەنگۆكێ بنێڕە ئبلیس*.
  5. e. 12‏:9 دەستپێكرن 3‏:1‏-24
  6. f. 12‏:10 ئەیوب 1‏:9‏-11؛ زەكەریا 3‏:1
  7. g. 12‏:14 ئانكو سێ ساڵ و نیڤان
  8. h. 12‏:17 q دویندەه: نەسل یان زوڕیەت