عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دوو شاهد 
1
پشتی هنگی لەڤەنەكێ وەكو شڤداری بۆ من هاتە دان و هاتە گۆتن: «رابە، پەرستگەها خودێ و قوربانگەهێ بپیڤە و ئەوێن تێدا پەرستنێ دكەن بهژمێرە.
2
لێ حەوشا پەرستگەهێ یا دەرڤە بهێلە و نەپیڤە، چنكو ئەو بۆ مللەتێن نەجوهی هاتیە دان و ئەو دێ چل و دوو هەیڤان باژێڕێ پیرۆز بنپێ كەن.[a]
3
ئەز ژی دێ دەستهەلاتێ دەمە هەردوو شاهدێن خۆ و ئەو دێ ب جلكێن ژ خراری[b] هزار و دوو سەد و شێست رۆژان پەیامێ رابگەهینن.»
4
ئەو هەردوو دارزەیتون و هەردوو چرادانكن یێن ل بەرامبەر خودانێ ئەردی راوەستیای.[c]
5
ئەگەر ئێكی بڤێت زیانێ بگەهینیتە وان، ئاگر ژ دەڤێ وان دەردكەڤیت و دوژمنێن وان دخۆت. ئەگەر ئێكی بڤێت زیانێ بگەهینیتە وان، دڤێت ئەو ب ڤی شێوەی بهێتە كوشتن.
6
ئەڤان دەستهەلاتا هەی دەرگەهێن ئەسمانی بگرن، داكو د رۆژێن پەیام راگەهاندنا وان دا باران نەباریت، هەروەسا وان دەستهەلاتا ل سەر ئاڤێ هەی كو وێ بكەنە خوین و ب هەر دربەكی ل ئەردی بدەن، هەر گاڤا وان بڤێت.[d]
7
دەمێ ئەو شاهدەییا خۆ تەمام بكەن، هنگی دڕندەیێ ژ چاڵا بێ بن دەردكەڤیت دێ جەنگێ ل سەر وان كەت و ب سەر وان كەڤیت و وان كوژیت.
8
تەرمێن وان دێ ل سەر گۆڕەپانا باژێڕێ مەزن بن، ئەوا وەكو هێما دبێژنێ سەدۆم و مسر، وی جهی یێ خودانێ وان لێ هاتیە خاچدان.
9
مرۆڤ ژ هەمی گەل و هۆز و زمان و مللەتان بۆ سێ رۆژ و نیڤان دێ ل تەرمێن وان نێڕن و ناهێلن د گۆڕان دا بهێنە ڤەشارتن.
10
ئاكنجیێن ل سەر ئەردی دێ ل سەر وان دلهوین بن و دلخۆش بن و دیاریان بۆ ئێكودوو هنێرن، چنكو ڤان هەردوو پێغەمبەران، ئاكنجیێن ل سەر ئەردی ئازار دابوون.
11
لێ پشتی سێ رۆژ و نیڤان، هەناسەیا ژیانێ ژ لایێ خودێ ڤە چوو د وان دا و ئەو رابوونە سەر پێیێن خۆ. ئینا ترسەكا مەزن كەفتە سەر ئەوێن ل وان دنێڕی.
12
هنگی وان هەردوویان دەنگەكێ مەزن ژ ئەسمانی بهیست، دگۆتە وان: «سەركەڤنە ڤێرێ!» ئینا ئەو د عەوری دا سەركەفتنە ئەسمانی و دوژمنێن وان بەرێ خۆ ددایێ.
13
د وێ دەمژمێرێ دا، بیڤەلەرزەكا مەزن چێبوو، ئینا دەهێكا باژێڕی هەڕفت و حەفت هزار مرۆڤ ب وێ بیڤەلەرزێ مرن، یێن ماین ترسیان و مەزناهی دا خودایێ ئەسمانی.
14
خولیسەریا دوویێ دەرباز بوو، ئەڤە خولیسەریا سێیێ زوی یا دهێت.
بوڕیزانا حەفتێ 
15
فریشتەیێ حەفتێ ل بوڕیزانێ دا و دەنگێن مەزن ژ ئەسمانی هاتن، دگۆتن:
«پاشایەتیا جیهانێ یا بوویە یا خودانێ مە و مەسیحێ وی،
ئەو دێ هەتا هەتایێ پاشایەتیێ كەت.»[e]
16
ئینا هەر بیست و چوار ریهسپیێن ل سەر تەختێن خۆ ل بەرامبەر خودێ دروینشتی، دەڤ و دەڤ خۆ هاڤێتە ئەردی و سوجدە بۆ خودێ بر
17
و گۆتن:
«ئەم سوپاسیا تە دكەین، هەی خودان خودێ، هێزدارێ هەر تشتی،
ئەوێ هەی و ئەوێ هەبوو،
چنكو تە هێزا خۆ یا مەزن دیار كر
و دەست ب پاشایەتیێ كر.[f]
18
مللەت تۆڕە بوون، لێ تۆڕەبوونا تە هات
و دەمێ دادكرنا مریان هات
و دەمێ خەلاتكرنا بەنیێن تە یێن پێغەمبەر و پیرۆزكریان و یێن ژ ناڤێ تە دترسن، چ یێن بچویك و چ یێن مەزن، هات
و دەمێ ژناڤبرنا وان یێن جیهانێ ژ ناڤ دبەن هات.»[g]
19
هنگی پەرستگەها خودێ یا ل ئەسمانی ڤەبوو و سندوقا پەیمانا وی د پەرستگەهێڤە دیار بوو. ئینا بوونە برویسی و دەنگەدەنگ و گڕگڕا عەوران و بیڤەلەرز و تەرگا مەزن.
  1. a. 11‏:2 لوقا 21‏:24
  2. b. 11‏:3 q خرار: نیشان بوو بۆ خەمەكا مەزن. ل فەرهەنگۆكێ بنێڕە.
  3. c. 11‏:4 زەكەریا 4‏:3، 11‏-14
  4. d. 11‏:6 دەركەفتن 7‏:17‏-19؛ 1 پاشا 17‏:1
  5. e. 11‏:15 بنێڕە: دەركەفتن 15‏:18؛ زەبوور 10‏:16؛ دانیێل 2‏:44
  6. f. 11‏:17 بنێڕە: دەركەفتن 3‏:14
  7. g. 11‏:18 بنێڕە: زەبوور 2‏:1؛ دانیێل 9‏:6؛ عامۆس 3‏:7؛ زەبوور 115‏:13