عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
یوحەننایێ تافیركەر رێكێ ئامادە دكەت 
1
ئەڤەیە دەستپێكا مزگینیا عیسایێ مەسیحێ[a] كوڕێ خودێ.
2
هەروەكو د پەیاما ئیشایا پێغەمبەری دا هاتیە نڤیسین:
«ئەڤە ئەز دێ هنارتیێ خۆ ل پێشیا تە هنێرم،
ئەوێ دێ رێكا تە ئامادە كەت»[b]
3
«دەنگەك ل چۆلی گازی دكەت: ‹رێكێ بۆ خودانی ئامادە بكەن،
پەیادەڕێیان[c] بۆ هاتنا وی راست بكەن›»،[d]
4
وەسا یوحەننایێ تافیركەر ل چۆلی دیار بوو. ئەوی رادگەهاند كو خەلك ل خۆ بزڤڕن و بهێنە تافیركرن[e] ، داكو ل گونەهێن وان بهێتە بورین.
5
هەمی خەلكێ دەڤەرا یەهودیایێ و هەمی خەلكێ ئورشەلیمێ دەردكەفتن و بەرەڤ وی دچوون و دانپێدان ب گونەهێن خۆ دكر و ل سەر دەستێ وی د رویبارێ ئوردن دا دهاتنە تافیركرن.
6
یوحەننای جلكەكێ ژ پویرتێ حێشتران ل بەر بوو و ناڤتەنگا خۆ ب قایشەكا كەڤلی گرێ ددا، كولی و هنگڤینێ چۆلی دخوارن.
7
وی گازی دكر و دگۆت: «پشتی من دێ ئێكێ ژ من ب هێزتر هێت، ئەوێ ئەز هەژی هندێ نینم بچەمیێم و بەندكێ پێلاڤا وی ڤەكەم.
8
من هوین ب ئاڤێ تافیر كرن، لێ ئەو دێ هەوە ب گیانێ پیرۆز[f] تافیر كەت.»
یوحەننا عیسای تافیر دكەت 
9
د وان رۆژان دا عیسا ژ ناسیرەیێ ل دەڤەرا جەلیل هات و ل سەر دەستێ یوحەننای د رویبارێ ئوردن دا هاتە تافیركرن.
10
چەوا عیسا ژ ئاڤێ دەركەفت، دیت ئەسمان شەق بوو و گیانێ پیرۆز وەكو كووترەكێ هاتە خوار و ل سەر وی دادا
11
و دەنگەك ژ ئەسمانان هات و گۆت: «تۆ كوڕێ منی یێ خۆشتڤی، دلێ من ب تە یێ خۆش بووی.»
ئبلیس عیسای تاقی دكەت 
12
ئێكسەر گیانێ پیرۆز عیسا دەرئێخستە چۆلی.
13
چل رۆژان ل وێرێ ما و ژ لایێ ئبلیسی ڤە دهاتە تاقیكرن. د ناڤ دڕندان دا بوو و فریشتەیان خزمەتا وی دكر.
عیسا ل جەلیلێ دەست ب كارێ خۆ دكەت 
14
پشتی یوحەننا هاتیە زیندانكرن، عیسا هاتە جەلیل و مزگینیا خودێ رادگەهاند
15
و دگۆت: «دەم یێ ب دویماهی هاتی، پاشایەتیا خودێ یا نێزیك بووی. ل خۆ بزڤڕن و باوەریێ ب مزگینیێ بینن.»
عیسا شاگردێن ئێكەمین داخواز دكەت 
16
دەمێ ئەو ل بەر كنارێ دەریاكا جەلیل بڕێڤە دچوو، وی شەمعون و برایێ وی ئەندراوس دیتن، یێ تۆڕێ دهاڤێژنە د دەریاكێ دا، چنكو ئەو ماسیگر بوون.
17
عیسای گۆتە وان: «ب دویڤ من بكەڤن، دێ هەوە كەمە نێچیرڤانێن مرۆڤان[g]
18
ئینا د گاڤێ دا تۆڕێن خۆ هێلان و ب دویڤ وی كەفتن.
19
پیچەكێ وێڤەتر چوو، یەعقوبێ كوڕێ زەبەدی و یوحەننایێ برایێ وی دیتن، ئەو د بەلەمێ دا بوون تۆڕ دروست دكرن.
20
د جهـ دا گازی وان كر، وان ژی بابێ خۆ زەبەدی ل گەل پالەیێن وی د بەلەمێ دا هێلان و ب دویڤ وی كەفتن.
دەرئێخستنا گیانەكێ پیس 
21
چوونە كەفەرناحوم، رۆژا شەمبیێ عیسا چوو د كنیشتەیێ[h] ڤە و دەست ب فێركرنێ كر.
22
ئەو خەلكێ ل وێرێ ژ فێركرنا وی حێبەتی بوون، چنكو وی وەكو مرۆڤەكێ خودان دەستهەلات ئەو فێر دكرن، نە وەكو مامۆستایێن دەستووری.
23
د وی دەمی دا زەڵامەك ل كنیشتەیا وان هەبوو گیانەكێ پیس هنگافتبوو[i] ، كرە قێڕی
24
و گۆت: «تە چ ژ مە دڤێت، عیسایێ ناسیرەیی؟ تۆ هاتی مە ژ ناڤ ببەی؟ ئەز دزانم تۆ كی، تۆ پیرۆزێ خودێی!»
25
عیسای ئەو پاشڤە بر و گۆتێ: «بێدەنگ بە و ژێ دەركەڤە!»
26
گیانێ پیس زەڵام ئێخست و قێڕیەكا ب هێز راهێلا و ژێ دەركەفت.
27
خەلك هەمی گوهشین و پرسیار ژ ئێكودوو كرن: «ئەڤە چیە؟ فێركرنەكا نویە یا ب دەستهەلاتداری ڤە دهێتە گۆتن! فەرمانێ ل گیانێن پیس ژی دكەت و ئەو ب فەرمانا وی دكەن!»
28
ناڤودەنگێ عیسای د گاڤێ دا ل هەمی دەوروبەرێن جەلیل بەڵاڤ بوو.
ساخكرنا خەسیا شەمعونی و گەلەكێن دی 
29
دەمێ ئەو ژ كنیشتەیێ دەركەفتین، ل گەل یەعقوبی و یوحەننای هاتنە مالا شەمعون و ئەندراوسی.
30
خەسیا شەمعونی د ناڤ نڤینان دا یا تاوی بوو، وان ئێكسەر بەحسێ رەوشا وێ بۆ عیسای كر.
31
بەرەڤ وێ چوو و دەستێ وێ گرت و راكر و تایێ بەردا و وێ دەست ب خزمەتا وان كر.
32
ب شەڤ، پشتی رۆژ چوویە ئاڤا، هەمی مرۆڤێن نەساخ و ئەوێن ئەجنەیان هنگافتین ئینانە نك عیسای.
33
خەلكێ باژێڕی هەمی ل بەر دەرگەهی خڕڤەبوون.
34
گەلەك نەساخ ژ گەلەك جۆرێن نەساخیان چارەسەر كرن، گەلەك ئەجنە ژی دەرئێخستن و وی نەدهێلا ئەجنە بئاخڤن، چنكو وان دزانی ئەو كیە.
عیسا مزگینیێ ل جەلیل رادگەهینیت 
35
سپێدەیا رۆژا پاشتر بەری ئەلندێ، عیسا رابوو و دەركەفت و قەستا جهەكێ ڤەدەر كر و ل وێرێ نڤێژ دكر.
36
شەمعون و ئەوێن د گەل دا چوون و لێ گەڕیان،
37
دەمێ وان ئەو دیتی گۆتنێ: «هەمی یێ داخوازا تە دكەن!»
38
ئینا عیسای گۆتە وان: «وەرن دا بچینە گوندێن دەوروبەر، دا مزگینیێ ل وێرێ ژی رابگەهینم. چنكو ئەز یێ ژ بەر هندێ هاتیم.»
39
ل هەمی دەڤەرا جەلیل دگەڕیا، مزگینی ل كنیشتەیێن وان رادگەهاند و ئەجنە دەردئێخستن.
ساخكرنا زەڵامەكێ گوڕی 
40
زەڵامەكێ گوڕی[j] هاتە نك وی، هیڤی ژێ كرن و بەرامبەری وی چۆكڤەدان و گۆتێ: «ئەگەر تە بڤێت، تۆ دشێی من پاقژ بكەی.»
41
دلێ عیسای پێ سۆت و دەستێ خۆ كرێ و گۆتێ: «من دڤێت، پاقژ ببە.»
42
د گاڤێ دا گوڕیاتی لێ نەما و پاقژ بوو.
43
عیسای د گاڤێ دا ئەو ب رێ ئێخست، پشتی ب توندی هۆشداریا وی كری
44
و گۆتێ: «هشیار بە، چ تشتان بۆ چ كەسان نەبێژی! لێ هەڕە و خۆ نیشا كاهنی بدە و ئەوا مووسای فەرمان پێ دای ژ پێش پاقژبوونا خۆ ڤە پێشكێش بكە، وەك شاهدەیی بۆ وان.»
45
لێ ئەو دەركەفت و دەست پێ كر ب ئاشكرایی دگۆت و سەرهاتیا خۆ بەڵاڤ دكر، تا ئێدی عیسا نەدشیا ب ئاشكرایی بچیتە چ باژێڕان، لێ ئەو دما ژ دەرڤە ل جهێن ڤەدەر. خەلك ژی ژ هەمی جهان هەر دهاتنە نك وی.
  1. a. 1‏:1 ل فەرهەنگۆكێ بنێڕە مەسیح*.
  2. b. 1‏:2 مەلاخی 3‏:1
  3. c. 1‏:3 q پەیادەڕێ: رێكێن مرۆڤ ب پێیان تێڕا دەرباز دبیت.
  4. d. 1‏:3 ئیشایا 40‏:3
  5. e. 1‏:4 q تافیركرن: ئانكو ژێرئاڤكرن كو نیشانە بۆ تۆبەكرنێ و پاقژبوونێ ژ گونەهان. ل فەرهەنگۆكێ بنێڕە.
  6. f. 1‏:8 q گیانێ پیرۆز: ئانكو گیانێ خودێ. ل فەرهەنگۆكێ بنێڕە گیانێ پیرۆز*
  7. g. 1‏:17 ئانكو قاییلكرنا مرۆڤان كو ببنە شاگردێن مەسیحی.
  8. h. 1‏:21 q كنیشتە: جهێ پەرستنێ یێ جوهیانە. ل فەرهەنگۆكێ بنێڕە.
  9. i. 1‏:23 ئانكو ئەجنەیەك ل سەر وی زاڵ ببوو.
  10. j. 1‏:40 q گوڕی: ل فەرهەنگۆكێ بنێڕە.