عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
نموونەیا داوەتێ 
1
جارەكا دی عیسا بۆ وان ب نموونەیان ئاخفت و گۆت:
2
«پاشایەتیا ئەسمانان وەكو پاشایەكیە داوەتا كوڕێ خۆ گێڕا
3
و بەنیێن خۆ هنارتن داكو گازی وان كەسان بكەن، ئەوێن بۆ داوەتێ هاتینە داخوازكرن، لێ وان نەڤیا ئامادە ببن.
4
جارەكا دی پاشای هندەك بەنیێن دی هنارتن و گۆتە وان: ‹بێژنە داخوازكریان: ئەڤە من نانخوارنا خۆ یا ئامادەكری، گا و ربیتەكریێن من یێن هاتینە سەرژێكرن و هەمی تشت یێ ئامادەیە، ئەڤجا وەرنە داوەتێ.›
5
لێ وان چ پویتە پێ نەدا، ئەڤجا ئێك چوو ناڤ چەمێ خۆ و یێ دی چوو سەر بازرگانیا خۆ
6
و ئەڤێن دی بەنیێن وی گرتن و كرێت كرن و كوشتن.
7
پاشا تۆڕە بوو و لەشكەرێن خۆ هنارتن و ئەو مێركوژ ژناڤبرن و باژێڕێ وان سۆت.
8
پاشی گۆتە بەنیێن خۆ: ‹داوەت یا ئامادەیە، لێ داخوازكری نە د هەژی بوون.
9
ئەڤجا هەڕنە سەرێن رێیان و هەر كەسێ هوین دبینن داخواز كەنە خوارنا داوەتێ.›
10
بەنی دەركەفتنە سەرێن رێیان و هەر كەسێ چاك یان خراب دیتبان كۆم دكرن، هەتا جهێ داوەتێ ژ مێڤانان تژی بووی.
11
دەمێ پاشا هاتیە ژۆر دا مێڤانان ببینیت، دیت ئێكی جلكێن داوەتێ ل بەر نینن.
12
گۆتە وی: ‹هەڤال، تۆ چەوا بێی جلكێن داوەتێ هاتیە ژۆر؟› ئەو بێدەنگ ما.
13
ل وی دەمی پاشای گۆتە خزمەتكارێن خۆ: ‹دەست و پێیێن وی گرێ بدەن و بهاڤێژنە ژ دەرڤە، ل ناڤ تاریێ. ل وێرێ گری و گڤاشتنا ددانانە[a] .›
14
چنكو یێن داخوازكری گەلەكن، لێ یێن هەلبژارتی دكێمن.»
رەوایە مرۆڤ باجێ بدەتە قەیسەری؟ 
15
پاشی فەریسی چوون و پیلانەك داڕشت كا دێ چەوا عیسای ب ئاخفتنێن وی ئێخنە داڤان.
16
ئینا هندەك شاگردێن خۆ ل گەل لایەنگرێن هێرودێسی هنارتنە نك وی و گۆتنێ: «مامۆستا، ئەم دزانین تۆ یێ راستگۆی و رێكا خودێ راست نیشا خەلكی ددەی، تۆ هەمیان وەكو ئێك دبینی و تۆ بەرێ خۆ نادەیە ئاستێن مرۆڤان.
17
ئەڤجا بێژە مە، بۆچوونا تە چیە؟ ئەرێ رەوایە باج بۆ قەیسەری بهێتە دان یان نە؟»
18
عیسای نیازخرابیا وان زانی و گۆت: «هەی دووڕوینۆ، بۆچی هوین من تاقی دكەن؟
19
پارەیێ باجێ نیشا من بدەن.» وان دینارەك بۆ ئینا.
20
ئەڤجا وی گۆتە وان: «ئەڤ وێنە و ناڤە یێن كێنە؟»
21
وان گۆتە وی: «یێن قەیسەرینە.» ئەڤجا گۆتە وان: «یێ قەیسەری بدەنە قەیسەری و یێ خودێ ژی بدەنە خودێ.»
22
دەمێ وان ئەڤ تشتە بهیستی حێبەتی بوون و وان عیسا هێلا و چوون.
پرسیاركرن دەربارەی رابوونا مریان 
23
ل وێ رۆژێ، سەدوقی ئەوێن دبێژن رابوونا مریان نینە، هندەك ژ وان هاتنە نك وی و پرسیار ژێ كر
24
و گۆتێ: «مامۆستا، مووسای یا گۆتی: ئەگەر زەڵامەك بێ زاڕۆك مر، پێدڤیە برایێ وی هەڤژینا وی بۆ خۆ بینیت و دویندەهێ بۆ ناڤێ برایێ خۆ پەیدا بكەت.[b]
25
ئەڤجا ل نك مە حەفت برا هەبوون، یێ ئێكێ ژن ئینا و بێ دویندەهـ مر و هەڤژینا خۆ بۆ برایێ خۆ هێلا.
26
هەروەسا یێ دوویێ و پاشی یێ سێیێ هەتا یێ حەفتێ ژی.
27
پشتی وان هەمیان، ژن ژی مر.
28
ئەڤجا ل رۆژا رابوونێ، ئەو ژن دێ هەڤژینا كیژ ژ وان حەفتان بیت؟ چنكو یا هەمیان بوو.»
29
عیسای بەرسڤا وان دا و گۆت: «هوین د شاشن، چنكو هوین نە د نڤیساران و نە د هێزا خودێ دگەهن.
30
پشتی رۆژا رابوونێ مرۆڤ نە ژنێ دئینن و نە شوی دكەن، لێ دێ وەكو فریشتەیێن ئەسمانی بن.
31
دەربارەی رابوونا مریان، ما هەوە نەخواندیە ئەوا ژ لایێ خودێ ڤە بۆ هەوە هاتیە گۆتن:
32
ئەز خودایێ ئیبراهیمی و خودایێ ئیسحاقی و خودایێ یەعقوبیمە[c] ؟ ئەو نە خودایێ مریانە، لێ یێ زیندیانە.»
33
دەمێ خەلكی ئەڤ چەندە بهیستی، ژ بەر فێركرنا وی حێبەتی بوون.
فەرمانا هەری مەزن 
34
لێ دەمێ فەریسیان بهیستی كو عیسای سەدوقی یێن بێدەنگ كرین، ل گەل ئێك كۆمبوون
35
و ئێك ژ وان كو زانایێ دەستووری بوو، ئەڤ پرسیارە ژێ كر، دا وی تاقی بكەت:
36
«مامۆستا، فەرمانا هەری مەزن د دەستووری دا چیە؟»
37
بەرسڤا وی دا: « ژ هەمی دلێ خۆ و ژ هەمی دەروونێ خۆ و ژ هەمی هزرا خۆ حەز ژ خودان خودایێ خۆ بكە.[d]
38
ئەڤەیە فەرمانا ئێكێ و یا هەری مەزن.
39
یا دوویێ ژی وەكو وێیە: حەز ژ نێزیكێ خۆ بكە، وەك چەوا تۆ حەز ژ خۆ دكەی.[e]
40
دەستوور هەمی و پەیامێن پێغەمبەران ب ڤان هەردوو فەرمانان ڤە د هەلاویستینە.»
مەسیح كوڕێ كێیە؟ 
41
دەمێ فەریسی پێكڤە كۆمبووین، عیسای پرسیار ژ وان كر:
42
«هوین دەربارەی مەسیحی چ دبێژن: ئەو كوڕێ كێیە؟» وان بەرسڤا وی دا: «كوڕێ داوودیە.»
43
گۆتە وان: «ئەڤجا چەوا داوود ب گیانێ پیرۆز دبێژیتە وی خودان:
44
خودانی گۆتە خودانێ من:
ل دەستێ منێ راستێ روینە،
تاكو ئەز دوژمنێن تە بكەمە دبن پێیێن تە ڤە. [f]
45
ئەڤجا ئەگەر داوود دبێژیتێ ‹خودان›، پا چەوا كوڕێ ویە؟»
46
كەس ژ وان نەشیا خۆ ب پەیڤەكێ ژی بەرسڤا وی بدەت. ژ وێ رۆژێ وەرە كەس نەدوێریا پرسیاران ژێ بكەت.
  1. a. 22‏:13 گڤاشتنا ددانان نیشانە كو ژانا وان كەسان گەلەك یا مەزنە
  2. b. 22‏:24 گۆتارا مووسای 25‏:5
  3. c. 22‏:32 دەركەفتن 3‏:6
  4. d. 22‏:37 گۆتارا مووسای 6‏:5
  5. e. 22‏:39 پەرستن و پیرۆزی 19‏:18
  6. f. 22‏:44 زەبوور 110‏:1