عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- سەرەدانا موغان
- 1
- پشتی عیسا ل بێت‌لەحم، ل دەڤەرا یەهودیایێ ل سەردەمێ هێرودێسێ پاشا، ژ دایك بووی، وەسا چێبوو هندەك موغ[a] ژ لایێ رۆژهەلاتێ ڤە هاتنە ئورشەلیمێ
- 2
- و پرسیار كرن: «كانێ ئەوێ ژ دایك بووی كو پاشایێ جوهیانە؟ چنكو مە ستێرا وی ل رۆژهەلاتێ دیتیە، ئەڤجا ئەم یێن هاتین بۆ وی سوجدێ ببەین.»
- 3
- دەمێ هێرودێس پاشای ئەڤە بهیستی، ئەو و هەمی خەلكێ ئورشەلیمێ تێك چوون.
- 4
- ئینا وی هەمی سەرۆكێن كاهنان ل گەل مامۆستایێن دەستووری یێن جوهیان[b] كۆم كرن و ژێ پرسی: «مەسیح دێ ل كیرێ ژ دایك بیت؟»
- 5
- ئینا وان گۆتە وی: «ل بێت‌لەحما یەهودیایێ، چنكو هۆسا ل سەر ئەزمانێ پێغەمبەری یا هاتیە نڤیسین:
- 6
- ‹لێ تۆ، هەی بێت‌لەحما ل ئەردێ یەهودای،
قەت د ناڤ سەروەرێن یەهودای دا نە یا كێمترینی،
چنكو دێ ژ ناڤ تە سەروەرەك دەركەڤیت،
دێ شڤانیێ[c] ل گەلێ من ئیسرائیلێ كەت.›»[d] - 7
- پاشی هێرودێسی ب نهێنی ڤە گازی كرە موغان و دەمێ دیاربوونا ستێرێ ژ وان پرسی.
- 8
- پاشی هنارتنە بێت‌لەحم و گۆت: «هەڕن و باش ل زاڕۆكی بگەڕن و دەمێ هوین دبینن بێژنە من، دا ئەز ژی بهێم و سوجدێ بۆ ببەم.»
- 9
- پشتی وان ئاخفتنا پاشای بهیستی، ب رێ كەفتن، پاشی وەسا چێبوو ئەو ستێرا كو بەری هنگی وان ل رۆژهەلاتێ دیتی، ل پێشیا وان دچوو، هەتا ل هنداڤ وی جهی راوەستیای یێ زاڕۆك لێ.
- 10
- دەمێ وان ستێر دیتی، كەیفخۆشیەكا گەلەك مەزن بۆ وان چێبوو.
- 11
- دەمێ ب ژۆر كەفتینە مالێ، وان زاڕۆك ل گەل مەریەما دایكا وی دیت. ئینا چوك ڤەدان و سوجدە بۆ وی بر، پاشی سندوقێن خۆ ڤەكرن و خەلاتێن زێڕی و بخویر[e] و موڕ[f] پێشكێشی وی كرن.
- 12
- ئەو د رێكەكا دی را بەرەڤ وەڵاتێ خۆ ڤەگەڕیانەڤە، ژ بەر كو د خەونێ دا هاتنە ئاگەهدار كرن كو نەزڤڕنەڤە نك هێرودێسی.
- رەڤین بەرەڤ مسرێ
- 13
- دەمێ موغ چووین، وەسا چێبوو فریشتەیەكێ خودانی د خەونێ دا بۆ یوسڤی دیار بوو و گۆتێ: «رابە، زاڕۆكی و دایكا وی بڕەڤینە مسرێ و ل وێرێ بمینە هەتا ئەز دبێژمە تە، چنكو هێرودێسی ل بەرە ل زاڕۆكی بگەڕیێت، دا وی بكوژیت.»
- 14
- ئەڤجا یوسڤ د وێ شەڤێ دا رابوو و زاڕۆك و دایكا وی بەرەڤ مسرێ ڤە برن
- 15
- و هەتا مرنا هێرودێسی ل وێرێ ما. ئەڤ چەندە چێبوو دا ئەوا خودانی ل سەر ئەزمانێ پێغەمبەری گۆتی، ب جهـ بهێت: «من كوڕێ خۆ ژ مسرێ گازی كر.» [g]
- 16
- دەمێ هێرودێسی زانی موغان رێز لێ نەگرت، گەلەك تۆڕە بوو. سەرباز هنارتن و هەمی كوڕكێن بێت‌لەحم و دەوروبەرێن وێ، ئەوێن ژ دوو ساڵیێ بچویكتر كوشتن، ل دویڤ وی دەمی یێ ژ موغان زانی.
- 17
- هنگی ئەوا ل سەر ئەزمانێ یەرمیا پێغەمبەری هاتیە گۆتن، ب جهـ هات، ئەوا دبێژیت:
- 18
- «دەنگەك ل رامە هاتە بهیستن،
گری و نالینەكا دژوار!
راحێل بۆ كوڕێن خۆ دكەتە گری
و رازی نابیت دلێ وێ بهێتە خۆشكرن،
چنكو ئەو نەماینە.»[h] - ڤەگەڕیان ژ مسرێ بۆ ناسیرەیێ
- 19
- پشتی هێرودێس مری، وەسا چێبوو فریشتەیەكێ خودانی ل مسرێ د خەونەكێ دا بۆ یوسڤی دیار بوو
- 20
- و گۆتێ: «رابە زاڕۆكی و دایكا وی ببە و هەڕە ئەردێ ئیسرائیلێ، چنكو ئەوێن ل كوشتنا زاڕۆكی دگەڕیان، یێن مرین!»
- 21
- ئەڤجا رابوو زاڕۆك و دایكا وی برن و چوو د ئەردێ ئیسرائیلێ دا.
- 22
- لێ دەمێ گوهـ لێ بووی كو ئەرخیلاووس ل شوینا بابێ خۆ هێرودێسی یێ دەستهەلاتێ ل سەر دەڤەرا یەهودیایێ دكەت، ترسیا بچیتە وێرێ. هنگی د خەونێ دا هاتە ئاگەهدار كرن، ئەڤجا قەستا دەڤەرا جەلیل كر.
- 23
- هات و ل باژێڕێ دگۆتنێ ‹ناسیرە› خۆجهـ بوو. ئەڤ چەندە چێبوو، دا ئەوا ل سەر ئەزمانێ پێغەمبەران هاتیە گۆتن، ب جهـ بهێت: «دێ بێژنێ یێ ناسیرەیی.»
- a. 2:1
q موغ: ب یونانی ‹مەغۆس›. دبیت زانایێن ئایینێ زەرەدەشتی بن كو ستێرناسی ژی دكر. - b. 2:4 ل فەرهەنگۆكێ بنێڕە پەیڤێن كاهن* و مامۆستایێن دەستووری*.
- c. 2:6
q شڤانی: ئانكو چاڤدێری - d. 2:6 میخا 5:2
- e. 2:11 ب یونانی ‹لبان›. ل فەرهەنگۆكێ بنێڕە لبان*.
- f. 2:11
q موڕ: روینەكێ بێهنخۆشە. ل فەرهەنگۆكێ بنێڕە موڕ*. - g. 2:15 هۆشێیەع 11:1
- h. 2:18 یەرمیا 31:15
