عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
خودانێ شەمبیێ 
1
وی دەمی عیسا ل رۆژا شەمبیێ د ناڤ دەخلان را بوری. شاگردێن وی برسی بوون و دەست ب گولیكرنێ كر و خوارن.
2
دەمێ فەریسیان دیتی، گۆتێ: «بەرێ خۆ بدێ، شاگردێن تە یێ وێ دكەن، ئەوا نە رەوایە د شەمبیێ[a] دا بهێتە كرن!»
3
ئینا گۆتە وان: «ما هەوە نە خواندیە كا داوودی چ كر[b] ، دەمێ ئەو و یێن ل گەل وی برسی بووین،
4
چەوا چوو د مالا خودێ ڤە و نانێ پێشكێشیێ[c] خوار، ئەوێ نە بۆ وی رەوا بوو بخۆت، نە بۆ یێن ل گەل وی، ب تنێ بۆ كاهنان رەوا بوو؟
5
یان ما هەوە د دەستووری دا نە خواندیە كو ل شەمبیێ كاهن د پەرستگەهێ ڤە زێدەگاڤیێ ل سەر پیرۆزیا شەمبیێ[d] دكەن و گونەهبار نابن؟
6
لێ ئەز دبێژمە هەوە: ئێكێ ژ پەرستگەهێ مەزنتر یێ ل ڤێرێ.
7
ئەگەر هوین د رامانا ڤێ ئاخفتنێ گەهشتبان: ‹من دلۆڤانی دڤێت، نەكو قوربان،›[e] هەوە یێن بێگونەهـ داد نەدكرن.
8
چنكو كوڕێ مرۆڤ خودانێ شەمبیێیە.»
عیسا د شەمبیێ دا مرۆڤەكێ دەست گورۆج ساخ دكەت 
9
پاشی وێرێ ب جهـ هێلا و چوو د كنیشتەیا وان ڤە،
10
وەسا چێبوو مرۆڤەكێ دەست گورۆج[f] ل وێرێ بوو. وان پرسیار ژ عیسای كر: «ئەرێ ساخكرن ل شەمبیێ رەوایە؟» مەبەستا وان ئەو بوو كو عیسای تاوانبار بكەن.
11
ئەوی گۆتە وان: «ئەگەر ئێك ژ هەوە پەزەك هەبیت و ل رۆژا شەمبیێ بكەڤیتە د چاڵەكێ دا، ما ناگریت و دەربئێخیت؟
12
ئەڤجا مرۆڤ چەند ژ پەزی ب بهاترە! ژ بەر هندێ رەوایە باشی ل شەمبیێ بهێتە كرن.»
13
پاشی گۆتە وی مرۆڤی: «دەستێ خۆ درێژ كە.» وی ژی دەستێ خۆ درێژ كر و ساخ بووڤە وەكو دەستێ دی لێ هات.
14
لێ فەریسی دەركەفتن و ل دژی عیسای دەست ب پیلان دانانێ كرن، كا چەوا وی بكوژن.
خزمەتكارێ خودێ یێ هەلبژارتی 
15
لێ عیسای زانی، ئینا ژ وێرێ چوو. گەلەك ب دویڤ كەفتن و وی هەمی نەساخێن وان ساخ كرن
16
و فەرمان ل وان كر كو وی ئاشكرا نەكەن.
17
ئەڤ چەندە چێبوو، دا ئەوا ل سەر ئەزمانێ ئیشایا پێغەمبەری هاتی ب جهـ بهێت، دەمێ دبێژیت:
18
«ئەڤەیە خزمەتكارێ من، یێ من هەلبژارتی،
خۆشتڤیێ من، یێ دلێ من پێ خۆش بووی.
ئەز دێ گیانێ خۆ دانمە سەر
و ئەو دێ دادوەریێ ل سەر مللەتان بەڵاڤ كەت.
19
نە هەڤڕكیێ دكەت و نە هەواران رادهێلیت
و كەسێ ل سەر جادەیان گوهـ ل دەنگێ وی نابیت،
20
لەڤەنەكێ هەڕشی ژی ناشكێنیت
و پەتیلەكا نیڤ ڤەمری ناڤەمرینیت[g] ،
هەتا كو دادوەریێ ب سەر نە ئێخیت.
21
هیڤیا مللەتان دێ ب ناڤێ وی ڤە هێتە گرێدان.»[h]
عیسا ب چ دەستهەلات ئەجنەیان دەردئێخیت؟ 
22
پاشی وان مرۆڤەكێ كۆرە و لال یێ ئەجنەیان هنگافتی ئینا نك عیسای و عیسای ئەو ساخ كر، ئێدی ئەو مرۆڤ شیا بئاخڤیت و ببینیت ژی.
23
هەمی خڕڤەبووی گوهشین و گۆتن: «ئەرێ ما ئەڤەیە كوڕێ داوودی؟»
24
لێ دەمێ فەریسیان ئەڤە بهیستی، وان گۆت: «ئەو ب تنێ ب دەستهەلاتا بەعلزەبولێ سەرۆكێ ئەجنەیان ئەجنەیان دەردئێخیت.»
25
ئینا عیسای هزرێن وان زانین و گۆتێ: «هەر پاشایەتیەكا دووبەرەكی بكەڤیتە د ناڤ دا، دێ وێران بیت و هەر باژێڕەك یان مالەكا دووبەرەكی بكەڤیتە د ناڤ دا، خۆ راناگریت.
26
ئەگەر ئبلیس ئبلیسی دەربئێخیت، ئەڤە دووبەرەكی كەفتە د ناڤ دا، ئەڤجا چەوا پاشایەتیا وی دێ خۆ راگریت؟
27
و ئەگەر ئەز ب ‹بەعلزەبولی› ئەجنەیان دەربئێخم، پا كوڕێن هەوە[i] ب كێ دەردئێخن؟ ژ بەر هندێ ئەو دێ دادوەرێن هەوە بن،
28
لێ ئەگەر ئەز ب گیانێ خودێ ئەجنەیان دەردئێخم، ئەڤە پاشایەتیا خودێ یا ب سەر هەوە دا هاتی.
29
یان چەوا ئێك دشێت بچیتە د مالا زەڵامەكێ هێزدار ڤە و كەلوپەلێن وی تالان بكەت، ئەگەر ئەو ل بەراهیێ وی زەڵامێ هێزدار گرێ نەدەت و پشتی هنگی مالا وی تالان بكەت؟
30
هەر كەسێ ل گەل من نەبیت، ئەو دژی منە و هەر كەسێ ل گەل من خڕڤە نەكەت، ئەو بژاڵە دكەت.
31
ژ بەر هندێ ئەز دبێژمە هەوە: هەر گونەهەك و هەر گۆتنەكا خراب دێ ل مرۆڤان هێنە بورین، لێ ل كوفركرنێ د دەرهەقا گیانی[j] دا ناهێتە بورین.
32
هەر كەسێ گۆتنەكا خراب د دەرهەقا كوڕێ مرۆڤ دا بێژیت، دێ ل وی هێتە بورین، لێ هەر كەسێ كوفریەكێ د دەرهەقا گیانێ پیرۆز دا ببێژیت، ل وی ناهێتە بورین، نە د ڤی جیهانێ دا و نە ژی د جیهانا دی دا.
دار ژ بەرهەمێ وێ دهێتە نیاسین 
33
دار ژ بەرهەمێ وێ دهێتە نیاسین، ئەڤجا خۆ ئێك دل بكەن: یان دار یا باشە و بەرهەمێ وێ یێ باشە، یان ژی دار یا خرابە و بەرهەمێ وێ یێ خرابە!
34
هەی تێژكێن ماران، چەوا هوینێن خراب دشێن ئاخفتنەكا چاك بێژن؟ چنكو دل ب چ یێ پڕە، دەڤ وێ دبێژیت.
35
مرۆڤێ باش ژ گەنجینەیا باشیێ، باشیێ دەردئێخیت و مرۆڤێ خراب ژ گەنجینەیا خرابیێ، خرابیێ دەردئێخیت.
36
لێ ئەز دبێژمە هەوە: هەر پەیڤەكا پویچ یا مرۆڤ بێژیت، ل رۆژا دادكرنێ دێ ژێ بەرپرسیار بیت.
37
چنكو تۆ ب ئاخفتنا خۆ دێ هێیە بێگونەهكرن و تۆ ب ئاخفتنا خۆ دێ هێیە گونەهبار كرن.»
نیشانا یونس پێغەمبەری 
38
وی دەمی هندەك مامۆستایێن دەستووری و فەریسیان بەرسڤا وی دا و گۆتن: «مامۆستا، ئەم حەز دكەین نیشانەكێ ل سەر دەستێ تە ببینین!»
39
وی بەرسڤا وان دا و گۆت: «نفشەكێ خرابكار و دەهمەنپیس[k] نیشانەكێ دخوازیت، لێ ژبلی نیشانا یونس پێغەمبەری چ نیشان بۆ ڤی نفشی ناهێنە دان.
40
هەروەكو یونس سێ شەڤ و سێ رۆژان مایە د زكێ نەهنگی دا[l] ، هەروەسا كوڕێ مرۆڤ ژی سێ شەڤ و سێ رۆژان دێ مینیتە د دلێ ئەردی دا.
41
خەلكێ نەینەوا دێ د رۆژا دادكرنێ دا ل گەل ڤی نفشی رابن و دێ وی گونەهبار كەت، چنكو ئەو ژ بەر ئاگەهداریا یونسی راگەهاندی، ل خۆ زڤڕین و ئەڤە ئێكێ ژ یونسی مەزنتر ل ڤێرێیە!
42
شاژنا باشووری[m] دێ د رۆژا دادكرنێ دا، ل گەل ڤی نفشی رابیت و دێ وی گونەهبار كەت، چنكو ئەو ژ دویماهیا جیهانێ هات دا گوهـ بدەتە ئاقلمەندیا سلێمانی و ئەڤە ئێكێ ژ سلێمانی مەزنتر ل ڤێرێیە!
ڤەگەڕیانا گیانێ پیس 
43
دەمێ گیانێ پیس ژ مرۆڤی دەردكەڤیت، د ناڤ بیابانێ دا ل حەوانگەهەكێ دگەڕیێت، لێ نابینیت.
44
هنگی ئەو دبێژیت: ‹دا بزڤڕمە مالا خۆ یا ئەز ژێ دەركەفتیم.› دەمێ دگەهیتە مالێ، دبینیت یا ڤاڵا و مالشتی و لێكدایە.
45
پاشی دچیت حەفت گیانێن دی یێن ژ خۆ پیستر ل گەل خۆ دئینیت و دچنە د وی جهی دا و تێدا ئاكنجی دبن. ئەڤجا رەوشا دویماهیێ یا وی مرۆڤی ژ یا بەرێ كمباختر لێ دهێت. رەوشا ڤی نفشێ خرابكار ژی دێ یا هۆسا بیت!»
دایك و برایێن عیسای 
46
دەمێ ئەو هێشتا بۆ خڕڤەبوویان دئاخفت، وەسا چێبوو دایك و برایێن وی هاتن و ژ دەرڤە راوەستیان، داخواز دكر ل گەل وی بئاخڤن.
47
ئینا ئێك ژ ئامادەبوویان گۆتێ: «ئەڤە دایكا تە و برایێن تە ژ دەرڤە د راوەستیاینە، دڤێن ل گەل تە بئاخڤن.»
48
لێ عیسای بەرسڤا وی دا و گۆت: «دایكا من كیە و برایێن من كینە؟»
49
و دەستێ خۆ درێژ كرە شاگردێن خۆ و گۆت: «ئها ئەڤەنە دایك و برایێن من.
50
چنكو هەر كەسێ ب حەزا بابێ من یێ ل ئەسمانان بكەت، ئەوە خویشك و برا و دایكا من.»
  1. a. 12‏:2 q رۆژا شەمبی: بۆ جوهیان رۆژەكا تایبەت و پیرۆزە و كار تێدا ناهێتە كرن. ل فەرهەنگۆكێ بنێڕە.
  2. b. 12‏:3 1 ساموئێل 21‏:1‏-6
  3. c. 12‏:4 ئەو نانە یێ د پەرستگەهێ ڤە ل بەرامبەری خودێ دهاتە دانان. ل فەرهەنگۆكێ بنێڕە نانێ پێشكێشیێ*.
  4. d. 12‏:5 ژ بەر كو ئەو د رۆژا شەمبیێ دا كارێ پەرستگەهێ دكەن.
  5. e. 12‏:7 هۆشێیەع 6‏:6
  6. f. 12‏:10 q گورۆج: ئانكو سەقەت
  7. g. 12‏:20 ئانكو ئەو دێ ل گەل كەسێن لاواز و بندەست یێ دلنەرم و دلۆڤان بیت.
  8. h. 12‏:21 ئیشایا 42‏:1‏-4
  9. i. 12‏:27 بەهرا پتر مەبەست ب ‹كوڕێن هەوە› شاگردێن فەریسیانە، یان ژی شاگردێن عیسایێ مەسیح ب خۆنە كو ئەو ژی جوهینە.
  10. j. 12‏:31 q گیان: ئانكو گیانێ پیرۆز، كو گیانێ خودێیە.
  11. k. 12‏:39 q دەهمەنپیس: هێمایە بۆ كەسێن نە وەفادار ل گەل خودێ.
  12. l. 12‏:40 دەق و دەق: ‹د زكێ ئافراندیەكێ دەریایی یێ زەبەلاح دا›.
  13. m. 12‏:42 مەبەست پێ شاژنەكا سەبەئیە. هندەك بۆچوون دبێژن ناڤێ وێ بەلقیس بوو.