عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
عیسا و یوحەننایێ تافیركەر 
1
پشتی عیسا ژ شیرەتكرنا هەر دوازدە شاگردێن خۆ ب دویماهی هاتی، ژ وێرێ چوو دا فێركرنێ بكەت و مزگینیێ د باژێڕێن جەلیل دا بدەت.
2
دەمێ یوحەننای د زیندانێ دا گوهـ ل كارێن عیسای بووی، هندەك ژ شاگردێن خۆ هنارتنە نك و
3
پرسیار ژێ كر: «ئەرێ تۆی ئەوێ دێ هێت، یان خۆ ل هیڤیا ئێكێ دی بگرین؟»
4
عیسای بەرسڤا وان دا و گۆت: «هەڕن و ئەو تشتێن هوین دبهیسن و دبینن، بێژنە یوحەننای:
5
كۆرە یێ دبینن، لەنگ یێ بڕێڤە دچن، گوڕی یێ پاقژ دبن، كەڕ یێ دبهیسن، مری یێ رادبنەڤە و مزگینی بۆ بەلەنگازان دهێتە دان.
6
خوزیكێن وی یێ د من نەهەلنگڤیت[a]
7
دەمێ شاگردێن یوحەننای دچوون، عیسای بۆ وی خەلكێ كۆمبووی دەربارەی یوحەننای دەست ب ئاخفتنێ كر و گۆت: «هوین دەركەفتنە چۆلی دا چ ببینن؟ لەڤەنەكێ ب بای دهەژیێت؟
8
ئەڤجا هوین دەركەفتن دا چ ببینن؟ مرۆڤەكێ جلكێن نازك ل بەر؟ نەخێر، خودانێن جلكێن نازك د كۆچكێن پاشایان دانە.
9
ئەڤجا هوین دەركەفتن دا چ ببینن؟ پێغەمبەرەكی؟ بەلێ، ئەز دبێژمە هەوە، ئەو ژ پێغەمبەرەكی ژی زێدەترە.
10
ئەڤەیە یێ دەربارەی وی هاتیە نڤیسین:
‹ئەڤە ئەز دێ هنارتیێ خۆ ل پێشیا تە هنێرم،
ئەوێ دێ رێكا تە ل پێشیا تە ئامادە كەت.›[b]
11
راستیێ دبێژمە هەوە: كەسەك ژ دایكا خۆ نەبوویە ژ یوحەننایێ تافیركەر مەزنتر. لێ بچویكترین كەس ل پاشایەتیا ئەسمانان ژ وی مەزنترە.
12
ژ دەمێ یوحەننایێ تافیركەر هەتا نوكە، خورتی یا ل پاشایەتیا ئەسمانان دهێتە كرن و یێن خورت ب توندی ب دەست خۆ ڤە دئینن.
13
چنكو هەمی پێغەمبەران و دەستووری هەتا دەمێ یوحەننای پەیام رادگەهاندن،
14
ئەگەر هەوە دڤێت قەبیل بكەن ژی، ئەڤەیە ئەو ئلیاسێ پێدڤیە بهێت.[c]
15
ئەوێ گوهـ هەبن، بلا ببهیسیت.
16
لێ پا ئەز ڤی نفشی ب چ هەڤبەر بكەم؟ ئەو وەكو وان زاڕۆكانە یێن ل ناڤ بازاڕی دروینشتی و گازی هەڤالێن خۆ دكەن
17
و دبێژن:
‹مە زڕنا بۆ هەوە لێ دا، هەوە سەما نەكر
و مە بۆ هەوە ڤەلووراند، هەوە شینی نەكر.›
18
ژ بەر كو یوحەننا هات، نەدخۆت و نەڤەدخۆت و ئەو دبێژن: ‹ئەجنەیەكێ تێدا.›
19
كوڕێ مرۆڤ هات، دخۆت و ڤەدخۆت و ئەو دبێژن: ‹ئەڤە مرۆڤەكە یێ ب دویڤ خوارنێ و مەی ڤەخوارنێ كەفتی و هەڤالێ باجگر و گونەهكارانە.› لێ ئاقلمەندی ب كریارێن وێ دهێتە سەلماندن.»
باژێڕێن ل خۆ نەزڤڕین 
20
پاشی عیسای دەست ب پاشڤەبرنا وان باژێڕان كر، ئەوێن پڕانیا حنێرێن وی لێ هاتینە كرن، چنكو ل خۆ نەزڤڕین.
21
گۆت: «نەخوزیكێن تە خۆرازین[d] ! نەخوزیكێن تە بێت‌سایدا! ئەو حنێرێن ل ناڤ هەوە روی داین، ئەگەر ل سور و سایدا روی دابان، ئەو هەر ژ مێژە دا ل خۆ زڤڕن، كو خراری[e] بكەنە بەر خۆ و خولیێ ب سەرێ خۆ دا كەن،
22
لێ دبێژمە هەوە: ل رۆژا دادكرنێ دێ رەوشا سور و سایدایێ ژ یا هەوە باشتر بیت.
23
تۆ ژی هەی كەفەرناحوم، ما دێ بۆ ئەسمانی هێیە بلندكرن؟ نەخێر! تۆ دێ كەڤیە وارێ مریان[f] . ئەگەر ئەو حنێرێن ل ناڤ تە هاتینە كرن ل سەدۆمێ هاتبانە كرن، دا هەتا ئەڤرۆ مینیت،
24
لێ دبێژمە هەوە: ل رۆژا دادكرنێ دێ رەوشا وەڵاتێ سەدۆمێ ژ یا تە باشتر بیت.»
بێهنڤەدان بۆ ماندیبوویان 
25
ل وی دەمی عیسای گۆت: «باب، خودانێ ئەرد و ئەسمانی، ئەز سوپاسیا تە دكەم، چنكو تە ئەڤ تشتێن هەنێ ژ تێگەهشتی و ئاقلمەندان ڤەشارتن و تە بۆ زاڕۆكان ئاشكرا كرن.
26
بەلێ باب، چنكو هۆسا د دیتنا تە دا باش بوو.
27
هەمی تشت ژ لایێ بابێ من ڤە بۆ من یێن هاتینە دان. كەس كوڕی ناس ناكەت ژبلی بابی، كەس بابی ژی ناس ناكەت ژبلی كوڕی و هەر كەسێ كوڕی بڤێت بابی بۆ وی ئاشكرا بكەت.
28
وەرنە نك من، هەی هەمی ماندیبووی و بارگرانان، ئەز دێ بێهنا هەوە ڤەدەم.
29
نیركێ[g] من داننە سەر ستۆیێ خۆ و ژ من فێر ببن، چنكو ئەز یێ دلنەرم و دەروونبچویكم و دێ بۆ دەروونێن خۆ بێهنڤەدانێ بینن.
30
چنكو نیركێ منێ گونجایە و بارێ منێ سڤكە.»
  1. a. 11‏:6 ئانكو خوزیكێن وی یێ دلێ وی ژ من سار نەبیت.
  2. b. 11‏:10 مەلاخی 3‏:1
  3. c. 11‏:14 مەلاخی 4‏:5
  4. d. 11‏:21 q خۆرازین و بێت‌سایدا: دوو گوندێن دەڤەرا جەلیل بوون.
  5. e. 11‏:21 q خرار: نیشان بوو بۆ تۆبەكرنێ. ل فەرهەنگۆكێ بنێڕە.
  6. f. 11‏:23 q وارێ مریان: ئانكو دۆزەخ. ل فەرهەنگۆكێ بنێڕە.
  7. g. 11‏:29 q نیرك: ئەو دارە یێ ستۆیێ گایێن جۆتی ب هنجاڕی ڤە گرێ ددەت.