عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ساخكرنا خزمەتكارێ سەرلەشكەری 
1
پشتی هەمی ئاخفتنێن خۆ گەهاندینە گوهێن خەلكی، چوو باژێڕێ كەفەرناحوم.
2
سەرلەشكەری[a] بەنیەكێ نەساخ هەبوو، كەفتبوو دەراڤێ مرنێ و ل نك وی گەلەك یێ خۆشتڤی بوو.
3
دەمێ وی گوهـ ل ناڤودەنگێن عیسای بووی، ریهسپیێن جوهیان هنارتنە نك وی و هیڤی ژێ كرن، كو بهێت بەنیێ وی چارەسەر بكەت،
4
دەمێ گەهشتینە نك عیسای، گەلەك هیڤی ژێ كرن و گۆتنێ: «ئەڤ سەرلەشكەرە گەلەكێ هەژییە تۆ داخوازا وی ب جهـ بینی،
5
چنكو ئەو گەلەك حەز ژ مللەتێ مە دكەت و كنیشتە یا بۆ مە ئاڤاكری.»
6
ئینا عیسا ل گەل وان چوو. دەمێ گەهشتیە نێزیكی مالا سەرلەشكەری، وی هندەك هەڤالێن خۆ هنارتن داكو بێژنە عیسای: «ئەزبەنی، خۆ زەحمەت نەدە، چنكو ئەز نە هەژی وێ چەندێمە تۆ بهێیە مالا من.
7
لەوما من خۆ هەژی نەدیت بهێمە دیدارا تە. هەما ب تنێ تۆ پەیڤەكێ بێژە، دێ خزمەتكارێ من ساخ بیت.
8
چنكو ئەز ب خۆ ژی یێ ل ژێر دەستهەلاتێ دانایمە و من سەرباز یێ ل ژێر دەستێ خۆ هەین، دەمێ دبێژمە ئێك ژ وان: ‹هەڕە!› دچیت و دبێژمە ئێكێ دی: ‹وەرە!› دهێت. دبێژمە بەنیێ خۆ: ‹ڤێ بكە!› دكەت.»
9
دەمێ عیسای گوهـ ل ڤێ چەندێ بووی، ژ وی حێبەتی بوو، پاشی ل خۆ زڤڕی و بەرێ خۆ دا وێ كۆما ل دویڤ دهێت و گۆت: «ئەز دبێژمە هەوە: خۆ ل ئیسرائیلێ ژی من باوەریەكا هۆسا مەزن نەدیتیە.»
10
دەمێ هنارتیێن سەرلەشكەری ڤەگەڕیاینە مال، دیتن بەنی یێ ساخ بووی.
عیسا كوڕێ بیژنەكێ زیندی دكەت 
11
ل رۆژا دی ئەو چوو باژێڕەكی دبێژنێ «نایین». شاگردێن وی و خەلكەكێ زۆر ل گەل چوون.
12
دەمێ نێزیكی دەرگەهێ باژێڕی بووی، وەسا چێبوو مریەك ژ باژێڕی دەردئێخست، كو ئێكانەیێ دایكا خۆ یا بیژن بوو و جەماوەرەكێ مەزن ژ باژێڕی د گەل وێ دا بوو.
13
دەمێ خودانی دایك دیتی، دلێ وی پێ سۆت و گۆتێ: «نەكە گری».
14
پاشی چوو پێش و دەست كرە داربەستێ، ئەو مرۆڤێن مری ل سەر ملێن وان، راوەستیان. وی گۆت: «لاوو، ئەز دبێژمە تە: رابە.»
15
ئینا مری روینشت و دەست ب ئاخفتنێ كر و عیسای ئەو گەنج دا دەستێ دایكا وی.
16
ترسێ دلێ وی خەلكی هەمیێ گرت، پەسنا خودێ كر و گۆتن: «پێغەمبەرەكێ مەزن یێ ژ ناڤ مە رابووی و خودێ سەرەدانا گەلێ خۆ كر.»
17
ئەڤ دەنگوباسە ل هەمی دەڤەرا یەهودیایێ و دەوروبەرێن وێ بەڵاڤ بوو.
عیسا و یوحەننایێ تافیركەر 
18
شاگردێن یوحەننای ئەڤە هەمی گەهاندنە وی. یوحەننای گازی كرە دوو شاگردێن خۆ
19
و هنارتنە نك خودانی، كو بێژنێ: «ئەرێ تۆی ئەوێ دێ هێت، یان خۆ ل هیڤیا ئێكێ دی بگرین؟»
20
دەمێ هەردوو زەڵام هاتینە نك وی، گۆتنێ: یوحەننایێ تافیركەر ئەم یێن هنارتینە نك تە و دبێژیت: «ئەرێ تۆی ئەوێ دێ هێت یان خۆ ل هیڤیا ئێكێ دی بگرین؟»
21
ل وی دەمی عیسای گەلەك ژ نەساخی و دەرد و گیانێن پیس ساخ كرن و بیناهی دا گەلەك مرۆڤێن كۆرە.
22
ئینا عیسای بەرسڤا وان دا و گۆت: «هەڕن ئەوا هەوە دیتی و بهیستی بگەهیننە یوحەننای: كۆرە یێ دبینن، لەنگ یێ بڕێڤە دچن، گوڕی یێ پاقژ دبن، كەڕ یێ دبهیسن، مری یێ رادبنەڤە و مزگینی بۆ بەلەنگازان دهێتە دان.
23
خوزیكێن وی یێ د من نەهەلنگڤیت.»
24
چەوا هنارتیێن یوحەننای چوون، عیسا بۆ وی خەلكێ كۆمبووی دەربارەی یوحەننای دەست ب ئاخفتنێ كر و گۆت: «هوین دەركەفتنە چۆلی دا چ ببینن؟ لەڤەنەكێ ب بای دهەژیێت؟
25
ئەڤجا هوین دەركەفتن دا چ ببینن؟ مرۆڤەكێ جلكێن نازك ل بەر؟ ئەڤە خودانێن جلێن بهاگران و حەمەر د كۆچكێن پاشایان دانە.
26
ئەڤجا هوین دەركەفتن دا چ ببینن؟ ئایا پێغەمبەرەكی؟ بەلێ، ئەز دبێژمە هەوە، ژ پێغەمبەرەكی ژی زێدەترە.
27
ئەڤەیە یێ دەربارەی وی هاتیە نڤیسین:
‹ئەڤە ئەز دێ هنارتیێ خۆ ل پێشیا تە هنێرم،
ئەوێ دێ رێكا تە ل پێشیا تە ئامادە كەت.›[b]
28
ئەڤجا ئەز دبێژمە هەوە: ل ناڤ وان یێن كو ژ ژنان بووین، كەس ژ یوحەننای مەزنتر نینە. لێ بچویكترین كەس ل پاشایەتیا خودێ ژ وی مەزنترە.»
29
هەمی خەلكێ گوهـ ل ڤێ چەندێ بووی، تا باجگران ژی، دانپێدان ب دادپەروەریا خودێ كر، چنكو ل سەر دەستێ یوحەننای هاتبوونە تافیركرن.
30
لێ فەریسی و زانایێن دەستووری حەزا خودێ رەتكر، چنكو ل سەر دەستێ یوحەننای نەهاتبوونە تافیركرن.
31
«ئەرێ ئەز مرۆڤێن ڤی نفشی ب چ هەڤبەر بكەم؟ ئەرێ وەكو چنە؟
32
ئەو وەكو زاڕۆكێن ل بازاڕی دروینشتینە، گازی ئێكودوو دكەن و دبێژن:
‹مە زڕنا بۆ هەوە لێ دا، هەوە سەما نەكر
و مە بۆ هەوە ڤەلووراند، هەوە نەكرە گری.›
33
یوحەننایێ تافیركەر هات، نە نانی دخۆت، نە ژی مەیێ ڤەدخۆت و هەوە گۆت: ‹ئەجنەیەكێ تێدا›.
34
كوڕێ مرۆڤ هات، دخۆت و ڤەدخۆت و هەوە گۆت ‹ئەڤە مرۆڤەكە یێ ب دویڤ خوارنێ و مەی ڤەخوارنێ كەفتی و هەڤالێ باجگر و گونەهكارانە›،
35
لێ ئاقلمەندی ژ لایێ هەمی كوڕ و كچێن وێ ڤە دهێتە سەلماندن.»
عیسا ل ژنەكا گونەهكار دبوریت 
36
ئێك ژ فەریسیان داخواز ژێ كر خوارنێ ل گەل وی بخۆت، چوو مالا یێ فەریسی و ل سەر سفرێ روینشت.
37
ل وی باژێڕی ژنەكا گونەهكار هەبوو. چەوا وێ ژنێ زانی عیسا ل مالا یێ فەریسی یێ روینشتیە[c] ، گولاڤدانكەكا[d] روینێ بێهنخۆش هەلگرت و چوو مالا وی
38
و ل پشت عیسای و ل نك هەردوو پێیێن وی و ب گریڤە راوەستیا و دەست پێ كر ب رۆندكان پێیێن وی تەڕ كرن و ب پرچا خۆ زوها كرن و هەردوو پێیێن وی ماچی دكرن و بێهنا خۆش لێ دكر.
39
دەمێ فەریسیێ ئەو مێڤان كری ئەڤ تشتە دیتی، ل گەل خۆ ئاخفت و گۆت: «ئەگەر ئەڤە پێغەمبەر با، دا زانیت كا كیە دەست دكەتێ و كا چ جۆرە ژنە، چنكو یا گونەهكارە!»
40
ئینا عیسای بەرسڤا وی دا و گۆت: «شەمعون، من تشتەكێ هەی دێ بۆ تە بێژم» شەمعونی بەرسڤ دا و گۆت: «بێژە مامۆستا.»
41
عیسای گۆت: «قەردەرەكی دوو قەردار هەبوون، پێنج سەد دینار ل سەر ئێكی بوون و پێنجی دینار ل سەر یێ دی.
42
لێ چنكو هەردوویان پارە نەبوون وان قەران ژ سەر خۆ راكەن، ئینا خودانێ قەری هەردوو ئازا كرن. تۆ بێژی كی ژ وان هەردوویان دێ پتر حەز ژ وی كەت؟»
43
ئینا شەمعونی بەرسڤ دا: «ئەز دبێژم ئەوێ وی پتر پێ هێلاین.» عیسای گۆتێ: «تە راست گۆت.»
44
پاشی بەرێ خۆ دا ژنێ و گۆتە شەمعونی: «تۆ ڤێ ژنێ دبینی؟ ئەز هاتمە مالا تە و تە ئاڤەك نەئینا ئەز پێیێن خۆ پێ بشووم، لێ ئەوێ پێیێن من ب رۆندكان شویشتن و ب پرچا خۆ ڤەمالین.
45
تە ماچەك ژی ل من نەدا، لێ ئەوە ئەز هاتیمە د ژۆرڤە ئەو ژ ماچیكرنا پێیێن من ڤەنەبوویە.
46
تە زەیت ل سەرێ من نەكر، لێ ئەوێ روینێ بێهنخۆش ل پێیێن من كر.
47
ژ بەر ڤێ چەندێ ئەز دبێژمە تە، ل گونەهێن وێ یێن گەلەك هاتە بورین، لەوما وێ گەلەك حەزژێكرن دیار كر. ئەوێ پیچەك ژی لێ دهێتە بورین، پیچەك حەزژێكرنێ دكەت.»
48
پاشی گۆتە وێ: «ل گونەهێن تە هاتە بورین.»
49
ئینا ئەوێن ل سەر سفرێ روینشتی د ناڤبەرا خۆ دا گۆتن: «ئەڤە كیە هەتا ل گونەهان ژی ببوریت؟»
50
وی گۆتە ژنێ «باوەریا تە تۆ قورتال كری، ب ئاشتی هەڕە».
  1. a. 7‏:2 سەرلەشكەر، د ناڤ لەشكەرێ رۆمایی دا، سەركێشێ سەد سەربازان بوو.
  2. b. 7‏:27 مەلاخی 3‏:1
  3. c. 7‏:37 شێوازێ روینشتنا جوهیان ل سەر سفرێ پالڤەدان بوو ل سەر كێلەكێ.
  4. d. 7‏:37 ب یونانی: ئەلەباسترە، ئامانەكە ژ مەرمەری دهاتە دروستكرن