عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
شاهدێن باوەریێ 
1
باوەری پشتڕاستیە ژ وان تشتێن مرۆڤی هیڤی پێ هەی و بێگۆمانیە ژ وان تشتێن ناهێنە دیتن.
2
ب باوەریێ بابكال ژ لایێ خودێ ڤە هاتنە پەسەندكرن.
3
ب باوەریێ ئەم تێدگەهین كو جیهان ب پەیڤا خودێ هاتیە ئافراندن و تشتێن دهێنە دیتن ژ تشتێن نەهێنە دیتن چێبووینە.
4
ب باوەریێ هابیلی قوربانیەكێ باشتر ژ یێ قایینی[a] پێشكێشی خودێ كر. هەر ب وێ باوەریێ شاهدەیی بۆ هاتە دان كو یێ راستدارە، دەمێ خودێ رازیبوونا خۆ ل سەر قوربانیێن وی دیار كری. ب باوەریێ ئەو هێشتا دئاخڤیت، هەر چەندە یێ مری.
5
ب باوەریێ حەنۆخ بۆ ئەسمانی هاتە ڤەگوهاستن[b] ، دا مرنێ نەبینیت، ئێدی ئەو نەهاتە دیتن، چنكو خودێ ئەو ڤەگوهاست. بەری ڤەگوهاستنا وی شاهدەیی بۆ هاتە دان كو ئەوی خودێ رازی كر.
6
بێی باوەریێ ژی مەحالە مرۆڤ خودێ رازی بكەت، چنكو پێدڤیە ئەوێ خۆ نێزیكی خودێ بكەت، باوەری هەبیت كو خودێ یێ هەی و خەلاتی ددەتە وان یێن قەستا وی دكەن.
7
ب باوەریێ دەمێ دەربارەی رویدانێن هێشتا نەهاتینە دیتن هاتیە ئاگەهداركرن، نوحی ژ ترسا خودێ گەمیەك ژ بۆ قورتالكرنا مالا خۆ چێكر.[c] ب وێ باوەریێ جیهان گونەهبار كر و بوو میراتگرێ راستداریا كو ب باوەریێ دهێت.
8
ب باوەریێ ئیبراهیمی گوهداری كر، دەمێ هاتیە گازیكرن كو دەركەڤیتە وی جهی یێ ل بەر بوو ب میرات وەرگریت، ئەو دەركەفت و نەدزانی بۆ كیڤە دچیت.
9
ب باوەریێ ئەوی كۆچ كرە ئەردێ سۆزپێدای، ئەو هەروەكو ل ئەردەكێ بیانی بیت د بن خیڤەتان ڤە ئاكنجی بوو ل گەل ئیسحاقی و یەعقوبی، هەڤمیراتێن وی د هەمان سۆزێ دا.
10
چنكو ئەو چاڤەڕێی وی باژێڕی بوو یێ بنیات هەی، كو ئەندازیار و ئاڤاكەرێ وێ خودێیە.
11
ب باوەریێ ئیبراهیمی هێز بۆ زاڕۆكئینانێ وەرگرت، هەر چەندە ئەو یێ پیر بوو و سارا ب خۆ ژی یا خرش بوو[d] ، چنكو ئەو یێ پشتڕاست بوو كو ئەوێ سۆز دای یێ دلسۆزە.
12
لەوما ژ كەسەكێ وەكو ئێكێ مری دویندەهەك پەیدا بوو، ژمارەیا وان تەمەت ستێرێن ئەسمانی و تەمەت خیزێ ل سەر كنارێ دەریای ناهێتە هژمارتن.[e]
13
ئەو هەمی د باوەریێ دا مرن و سۆز ب دەست خۆ ڤە نەئینا، لێ ژ دویر ڤە دیتن و بخێرهاتنا وان كر و دانپێدان كر كو ئەو ل سەر ئەردی د هاڤی[f] و بیانینە.
14
ئەوێن تشتێن هۆسا دبێژن، ئاشكرا دكەن كو بۆ خۆ ل وەڵاتەكی دگەڕیێن.
15
ئەگەر ئەوان بیریا وی جهێ ژێ دەركەفتین كربا، دا وان دەلیڤە بۆ ڤەگەڕیانێ هەبیت.
16
لێ ل شوینا وێ چەندێ مەرەقا وان وەڵاتەكێ باشتر بوو، ئانكو وەڵاتەكێ ئەسمانی. لەوما خودێ ب شەرم نابینیت كو ب خودایێ وان بهێتە بناڤكرن، چنكو وی بۆ وان باژێڕەك ئامادە كریە.
17
ب باوەریێ ئیبراهیمی ئیسحاق وەكو قوربانی پێشكێش كر، دەمێ خودێ ئەو ئێخستیە د تاقیكرنێ دا.[g] ئەوێ سۆز وەرگرتین ئێكانەیێ خۆ پێشكێش كر،
18
سەبارەت وی خودێ گۆتیە: «دویندەها تە دێ ژ ئیسحاقی هێتە حساب كرن.»[h]
19
ئیبراهیمی د دلێ خۆ دا دگۆت كو خودێ دشێت مریان راكەتەڤە. ب شێوەیەكێ هێماكی[i] كوڕێ خۆ، وەكو ئێكێ ژ ناڤ مریان رابووی، وەرگرتەڤە.
20
ب باوەریێ ئیسحاقی داخوازا بەرەكەتێ، دەربارەی رویدانێن پاشەڕۆژێ، بۆ یەعقوب و عیسۆی كر.
21
ب باوەریێ یەعقوبی، دەمێ ل بەر مرنێ، داخوازا بەرەكەتێ بۆ هەر ئێك ژ كوڕێن یوسڤی كر و خۆ خواركرە سەر دەستكێ گۆپالێ خۆ و سەرێ خۆ بۆ خودێ چەماند.
22
ب باوەریێ یوسڤی دەمێ ل بەر مرنێ بەحسێ دەركەفتنا گەلێ ئیسرائیل كر و دەربارەی هەستیێن خۆ ئەو راسپاردن.[j]
23
ب باوەریێ مووسا دەمێ ژ دایك بووی، سێ هەیڤان ژ لایێ دای و بابێن وی ڤە هاتە ڤەشارتن، چنكو وان دیت كو زاڕۆك یێ جوانە و ژ فەرمانا پاشای نەترسیان.
24
ب باوەریێ مووسا، دەمێ مەزن بووی، رازی نەبوو كو ب كوڕێ كچا فیرعەونی[k] بهێتە بناڤكرن.
25
وی ب باشتر دیت كو ل گەل گەلێ خودێ سڤكاتی پێ بهێتە كرن، نەكو خۆشیا گونەهێ یا دەمكی هەبیت.
26
وی ئەڤ شەرمزاریا ژ پێخەمەت مەسیحی ب سامانەكێ مەزنتر ژ گەنجینەیێن مسرێ دانا، چنكو چاڤێ وی ل خەلاتی بوو.
27
ب باوەریێ وی مسر هێلا، بێی كو ژ تۆڕەبوونا پاشای بترسیت. وی خۆڕاگری كر، هەروەكو وی ببینیت یێ كو ناهێتە دیتن.
28
ب باوەریێ وی جەژنا دەربازبوونێ[l] كر و خوینا وێ رەشاند، داكو ئەوێ نەخری دكوشتن، وان نەهنگێڤیت.
29
ب باوەریێ ئیسرائیلی د دەریایێ سۆر را دەرباز بوون، هەروەكو ل سەر هشكاتیێ، لێ دەمێ مسریان بزاڤ كری ژێ دەرباز ببن، خەندقین.
30
ب باوەریێ شویرهێن ئەریحا هەڕفتن، پشتی ئەو حەفت رۆژان ل دۆر وێ زڤڕین[m] .
31
ب باوەریێ راحابا لەشفرۆش ل گەل نەگوهداران ژ ناڤ نەچوو، چنكو ب ئاشتیانە بخێرهاتن ل سیخوڕان كر[n] .
32
چ دی بێژم؟ من دەم نینە بەحسێ گدعون و باراق و شەمشون و یەفتاح و داوود و ساموئێل و پێغەمبەران بكەم.
33
ئەوان ب باوەریێ پاشایەتی بندەست كرن، دادپەروەری ب جهـ ئینا، سۆز ب دەست خۆ ڤە ئینان، دەڤێ شێران گرێ دا،
34
هێزا ئاگری ڤەمراند، ژ دەڤێ شیری رزگار بوون، د ناڤ لاوازیێ دا هێز ب دەست خۆ ڤە ئینا، د شەڕی دا بوونە هێزدار، لەشكەرێن بیانیان راتەقاندن،
35
ژنان مریێن خۆ ب ساخی وەرگرتنەڤە. هندەكێن دی ژی هاتنە ئەشكەنجەدان و قەبیل نەكر بهێنە ئازاد كرن، داكو ل رۆژا رابوونێ بگەهنە ژیانەكا باشتر.
36
هندەكێن دی كەفتنە د تاقیكرنا سڤكاتیپێكرنێ و قامچیلێدانێ دا، هەروەسا زنجیركرن و زیندانكرنێ.
37
هاتنە بەربارانكرن، ب مشاری هاتنە قەدكرن، ب دربێ شیری هاتنە كوشتن، د پیستێ پەز و بزنان دا گەڕیان، ب نەداری، تەپەسەركری و ستەملێكری.
38
جیهان نە یا هەژی وان بوو. ئەو دەربەدەری بیابان و چیا و شكەفت و كونێن بن ئەردی بوون.
39
ئەڤ هەمی مرۆڤە، سەرەڕای كو ژ ئەگەرێ باوەریا وان هاتنە پەسەندكرن، لێ وان سۆز ب دەست خۆ ڤە نەئینا،
40
چنكو خودێ پێشوەخت تشتەكێ باشتر بۆ مە ئامادە كریە، داكو ئەو بێی مە نەهێنە كاملكرن.
  1. a. 11‏:4 كوڕێ ئادەمیە و برایێ هابیلیە، د ناڤ هندەك مللەتێن رۆژهەلاتا ناڤین دا ب ‹قابیل› دهێتە بناڤكرن. بنێڕە: دەستپێكرن 4‏:1‏-10
  2. b. 11‏:5 بەرەبابێ حەفتێیە ژ كوڕێن ئادەمی، ئەو بەری توفانێ دژیا. دەستپێكرن 5‏:18‏-24
  3. c. 11‏:7 دەستپێكرن 6‏:14‏-22
  4. d. 11‏:11 دەستپێكرن 18‏:11‏-12؛ 21‏:1‏-7
  5. e. 11‏:12 دەستپێكرن 22‏:17
  6. f. 11‏:13 q هاڤی ئەوێ ژ نەچاری وەڵاتێ خۆ هێلای.
  7. g. 11‏:17 دەستپێكرن 22‏:1‏-14
  8. h. 11‏:18 دەستپێكرن 21‏:12
  9. i. 11‏:19 q هێماكی رەمزی
  10. j. 11‏:22 یوسڤی وەسیەت كر كو پشتی مرنا وی، هەستیێن وی ژ مسرێ ببەنە ئەردێ سۆزپێدای. بنێڕە دەستپێكرن 50‏:24‏-25
  11. k. 11‏:24 بنێڕە دەركەفتن 2‏:1‏-15
  12. l. 11‏:28 دەركەفتن 12‏:1‏-13 و ل فەرهەنگۆكێ بنێڕە \k جەژنا دەربازبوونێ\k*
  13. m. 11‏:30 یەشوع 6‏:1‏-21
  14. n. 11‏:31 یەشوع پشكا 2؛ 6‏:22‏-25