عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- ئازادیا خۆ بپارێزن
- 1
- مەسیحی ئەم یێن ئازاد كرین، دا د ئازاد بین. ئەڤجا خۆ تێدا راگرن و جارەكا دی نەكەڤنە بن نیركێ[a] بەنیاتیێ.
- 2
- گوهداریێ بكەن، ئەز پاولۆس دبێژمە هەوە: ئەگەر هوین بهێنە سونەتكرن، ئێدی مەسیح چ مفای ناگەهینیتە هەوە.
- 3
- ئەز جارەكا دی، بۆ هەر مرۆڤەكێ بهێتە سونەتكرن، شاهدەییێ ددەم، كو پێدڤیە ئەو هەمی دەستووری ب جهـ بینیت.
- 4
- هەی ئەوێن هەوە دڤێت ب رێكا دەستووری راستدار[b] دەركەڤن، هوین ژ مەسیحی ڤەقەتیان و ژ كەرەمێ كەفتن.
- 5
- لێ ئەم ژ دەولەتسەرێ گیانێ پیرۆز ب رێكا باوەریێ د چاڤەڕێینە خودێ مە راستدار دەربئێخیت، كو هیڤیا مە ئەوە.
- 6
- چنكو د ئێكبوونا ل گەل مەسیح عیسای دا، سونەتبوون و سونەتنەبوون هەردوو د بێ مفانە، لێ ب تنێ ئەو باوەریا ب حەزژێكرنێ كار دكەت، یا ب مفایە.
- 7
- هوین د غاردانێ دا باش پێشڤە دچوون. كێ بۆ هەوە ئاستەنگ دانان، كو هوین گوهداریا راستیێ نەكەن؟
- 8
- ئەڤ خۆشخۆشكێن بووینە ئاستەنگ نە ژ وینە یێ گازی هەوە كری.
- 9
- پیچەكا هەڤیرترشی، هەمی هەڤیری ترش دكەت.
- 10
- لێ دەربارەی هەوە، ئەز پشتا خۆ ب خودانی گەرم دكەم، كو هوین چ هزروبیرێن دی ناگرن. لێ ئەوێ هزرێن هەوە ئالۆز دكەت، ئەو كی بیت، دێ سزایێ خۆ وەرگریت.
- 11
- لێ ئەز، گەلی خویشك و برایان، ئەگەر هێشتا راگەهاندنێ بۆ سونەتكرنێ دكەم، پا بۆچی هێشتا دهێمە تەپەسەر كرن؟ ئەگەر وەسا با، هنگی دا ئاستەنگا خاچێ یا راكری بیت.
- 12
- خوزی ئەوێن هزرێن هەوە ئالۆز دكەن، خۆ خەساندبان!
- 13
- هوین گەلی خویشك و برایان، ژ بۆ ئازادیێ یێن هاتینە گازی كرن، لێ وێ ئازادیێ نەكەنە بەهانە بۆ حەزێن لەشی، بەلكو ب حەزژێكرنێ خزمەتا ئێكودوو بكەن.
- 14
- چنكو هەمی دەستوور د گۆتنەكێ دا دهێتە كۆمكرن: «حەز ژ نێزیكێ خۆ بكە، وەك چەوا تۆ حەز ژ خۆ دكەی.»[c]
- 15
- ئەڤجا ئەگەر هوین لەقان ل ئێكودوو بدەن و ئێكودوو بخۆن، هشیار بن، ئێكودوو نەبرینن.
- كارێن لەشی و بەرهەمێ گیانی
- 16
- ئەڤجا ئەز دبێژم: ل دویڤ گیانێ پیرۆز بڕێڤە هەڕن، هۆسا هوین چ جاران حەزێن لەشی تێر ناكەن،
- 17
- چنكو حەزا لەشی دژی گیانێ پیرۆزە و حەزا گیانێ پیرۆز دژی لەشیە. ئەڤ هەردوویە بەرهنگاریا ئێكودوو دكەن، لەوما هوین نەشێن هەر حەزەكا هەوە بڤێت، ب جهـ بینن.
- 18
- لێ ئەگەر هوین ژ لایێ گیانێ پیرۆز ڤە دهێنە بڕێڤەبرن، هوین نە د بن دەستهەلاتا دەستووری دانە.
- 19
- كارێن لەشی د ئاشكرانە، ئەو ژی ئەڤەنە: دەهمەنپیسی، پویچاتی، بێدەلنگی،
- 20
- پووتپەرێسی[d] ، جادووگەری، دوژمناتی، هەڤڕكی، چاڤپێنەڕابوون، كینداری، خۆپەرێسی، دووبەرەكی، جوداخوازی،
- 21
- زكڕەشی، سەرخۆشی، ئاهەنگێن بێتۆرەیێ و تشتێن وەكو ڤان. ئەز هەوە ئاگەهدار دكەم، هەروەكو من بەری نوكە ژی گۆتی: ئەو كەسێن تشتێن هۆسا دكەن، نابنە میراتگرێن پاشایەتیا خودێ.
- 22
- لێ بەرهەمێ گیانێ پیرۆز ئەڤەیە: حەزژێكرن، دلخۆشی، ئاشتی، بێهنفرەهی، جوامێری، چاكی، دلسۆزی،
- 23
- دلنەرمی و لخۆزاڵبوون. چ دەستوور نینن دژی ڤان تشتان بن.
- 24
- ئەو كەس ژی كو یێن مەسیح عیساینە، ئەوان لەش ل گەل حەز و ڤیانێن د لەشی دا یێن ل خاچێ داین.
- 25
- مادەم ئەم ب گیانێ پیرۆز دژین، بلا ل دویڤ گیانێ پیرۆز بڕێڤە ژی بچین.
- 26
- بلا ئەم د دفنبلند نەبین، ئێكودوو نەئازرینین و ل گەل ئێكودوو د زكڕەش نەبین.
- a. 5:1 ئەو دارە یێ ستۆیێ گایێن جۆتی ب هنجاڕی ڤە گرێ ددەت.
- b. 5:4 ئانكو بێگونەه
- c. 5:14 پەرستن و پیرۆزی 19:18
- d. 5:20
q پووتپەرێسی: صەنەمپەرێسی
