عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
مەبەستا من ئەڤەیە: هندی میراتگر هێشتا زاڕۆك بیت، چ جوداهی د ناڤبەرا وی و بەنی دا نینە، هەر چەندە ئەو خودانێ هەمی تشتانە.
2
لێ دێ ل بن سەرپەرشتیا سەرپەرشتكار و بریكاران بیت، تا ئەو دەم دهێت یێ بابێ وی دەستنیشانكری.
3
هەروەسا ئەم ژی: دەمێ ئەم هێشتا زاڕۆك بووین، ئەم ل بن دەستێ هێزێن روحانی[a] یێن جیهانێ بەنی بووین.
4
لێ گاڤا دەم تەمام بووی، خودێ كوڕێ خۆ هنارت، ئەو ژ ژنەكێ ژ دایك بوو و ل بن دەستهەلاتا دەستووری ژ دایك بوو،
5
داكو یێن ل بن دەستهەلاتا دەستووری رزگار كەت و ئەم كوڕینیا خودێ[b] وەرگرین.
6
ژ بەر كو هوین كوڕێن وینە، خودێ گیانێ كوڕێ خۆ هنارتە د ناڤ دلێ مە دا، كو گازی خودێ دكەت: «ئابا![c] بابۆ!».
7
ئەڤجا ئێدی تۆ نە بەنی، لێ تۆ كوڕی و مادەم تۆ كوڕی، خودێ تۆ كریە میراتگر ژی.
ترسا پاولۆسی ل سەر كەنیسەیێن گالاتیایێ 
8
بەری هنگی، دەمێ هەوە خودێ نەدنیاسی، هەوە بۆ یێن كو ب راستی نە خودێ بوون، بەنیاتی دكر،
9
لێ نوكە پشتی كو هەوە خودێ نیاسی، ئانكو هێشتا دروستتر: هوین ژ لایێ خودێ ڤە هاتنە نیاسین، ئەڤجا چەوا دێ بۆ هێزێن روحانی یێن لاواز و بەلەنگاز زڤڕنەڤە؟ چەوا هەوە دڤێت هوین دیسان بەنیاتیێ بۆ وان بكەن؟!
10
هوین گرنگیەكا تایبەت ب هندەك رۆژان و هەیڤان و دەمان و ساڵان ددەن.
11
ئەز ژ بەر هەوە دترسم كو وەستیانا من ژ پێخەمەت هەوە یا ژ قەستا بیت.
12
ئەز هیڤی ژ هەوە دكەم گەلی برا، كو هوین وەكو من بن، چنكو ئەز ب خۆ ژی وەكو هەوە بووم. هەوە چ بێدادی ل من نەكر.
13
هوین دزانن، ژ بەر نەساخیێ بوو، ل جارا ئێكێ من مزگینی دایە هەوە.
14
هەر چەندە نەساخیا من بۆ هەوە تاقیكرن بوو، لێ هەوە ئەز بێڕێز نەكرم و پشتا خۆ نەدا من، بەلكو وەكو فریشتەیەكێ خودێ یان وەكو مەسیح عیسای هەوە ئەز قەبیل كرم.
15
چ ل وێ دلخۆشیا هەوە هات؟ ئەز شاهدەییێ ددەم كو ئەگەر هەوە شیابا، هوین دا چاڤێن خۆ ئیننە دەرێ و دەنە من.
16
ئایا نوكە، چنكو ئەز راستیێ دبێژمە هەوە، ئەز بوومە دوژمنێ هەوە؟
17
ئەو كەس گەلەك گرنگیێ ب هەوە ددەن، لێ نە بۆ مەبەستەكا باش، بەلكو وان دڤێت هەوە ژ من ڤەدەر بكەن، دا هوین گرنگیێ ب وان بدەن.
18
گرنگیدان تشتەكێ باشە، ئەگەر بۆ مەبەستەكا باش بیت و بۆ هەمی دەمان بیت، نە ب تنێ دەمێ ئەز ل نك هەوە یێ ئامادە بم.
19
گەلی زاڕۆكێن من، یێن ئەز ب وان جارەكا دی ژانێن زاڕۆكبوونێ دكێشم، تاكو وێنەیێ مەسیحی د هەوە دا بەرجەستە ببیت.
20
من دڤیا ئەز نوكە ل نك هەوە یێ ئامادە بام و ب شێوازەكێ دی ل گەل هەوە ئاخفتبام، چنكو دەربارەی هەوە ئەز یێ شەپرزەمە.
نموونەیا هاجەرێ و سارایێ 
21
گەلی ئەوێن هەوە دڤێت د بن دەستووری دا بن، بێژنە من: ما هوین دەستووری نابهیسن؟
22
یا هاتیە نڤیسین كو ئیبراهیمی دوو كوڕ هەبوون، ئێك ژ كەنیزەیێ و یێ دی ژ ژنا ئازاد[d] .
23
كوڕێ كەنیزەیێ ل دویڤ لەشی ژ دایك بوو، لێ كوڕێ یا ئازاد ب رێكا سۆزا خودێ.
24
ئەڤە هەمی هێمانە: ئەڤ ژنە دوو پەیمانن. ئێك ژ وان پەیمانان ژ چیایێ سینایە و زاڕۆكان ژ بۆ بەنیاتیێ دئینیت: ئەو هاجەرە[e] .
25
هاجەر هێمایا چیایێ سینایە ل عەرەبستانێ، هەروەسا هاجەر ل هەمبەر ئورشەلیما نوكەیە، كو ئەو ل گەل زاڕۆكێن خۆ یا د بەنیاتیێ دا.
26
لێ یا ئازاد وەكو ئورشەلیما ئەسمانیە، كو ئەو ژی دایكا مەیە.
27
چنكو یا هاتیە نڤیسین:
«دلخۆش بە، هەی خرشێ،
ئەوا زاڕۆك نەبووین،
قێڕكە سترانان و شاهیێ بكە
تۆ ئەوا ژانێن زاڕۆكبوونێ نەدیتین،
چنكو زاڕۆكێن ژنا هاتیە هێلان،
پترن ژ زاڕۆكێن ژنا ل گەل مێری.»[f]
28
ئەڤجا هوین، گەلی برا، وەكو ئیسحاقی زاڕۆكێن سۆزێنە.
29
لێ كا چەوا وی دەمی، ئەوێ ل دویڤ لەشی بووی، یێ ل دویڤ گیانی بووی تەپەسەر دكر، نوكە ژی وەسایە.
30
لێ نڤیسار چ دبێژیت؟ « كەنیزەیێ و كوڕێ وێ دەربئێخە، چنكو كوڕێ كەنیزەیێ نابیتە میراتگر ل گەل كوڕێ یا ئازاد.»[g]
31
ئەڤجا، گەلی برا، ئەم نە كوڕێن كەنیزەیێینە، لێ كوڕێن یا ئازادین.
  1. a. 4‏:3 بۆ نموونە: رۆژ و هەیڤ و ستێر و ئاڤ و ئاگر و.. هتد ئەوێن دهاتنە پەرستن.
  2. b. 4‏:5 q كوڕینیا خودێ ئانكو ئەم ببینە كوڕێن خودێ و میراتگرێن وی بین.
  3. c. 4‏:6 پەیڤەكا ئارامیە، ئانكو «باب»
  4. d. 4‏:22 مەبەست پێ سارایە. دەستپێكرن 12‏:5
  5. e. 4‏:24 دەستپێكرن 16‏؛ 21‏:1‏-3 ل فەرهەنگۆكێ بنێڕە: \k هاجەر\k*
  6. f. 4‏:27 ئیشایا 54‏:1
  7. g. 4‏:30 دەستپێكرن 21‏:10