عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من یێ ریهسپی، بۆ گایوسێ خۆشتڤی، ئەوێ ئەز د راستیێ دا حەز ژێ دكەم.
2
هەی خۆشتڤی، ئەز نڤێژێ دكەم كو تۆ د هەمی تشتان دا یێ سەركەفتی و ساخلەم بی، هەروەكو دەروونێ تە یێ سەركەفتی.
3
ئەز گەلەك دلخۆش بووم دەمێ هندەك برا هاتین و دەربارەی دلسۆزیا تە بۆ راستیێ شاهدەیی دای، كا چەوا تۆ ل سەر راستیێ دچی.
4
من دلخۆشیەكا ژ ڤێ مەزنتر نینە كو ئەز ببهیسم زاڕۆكێن من ل سەر راستیێ دچن.
پشتەڤانیكرنا برایان 
5
هەی خۆشتڤی، تۆ یێ دلسۆزی د كارێن خۆ دا، یێن تۆ بۆ برایان دكەی، هەر چەندە د بیانینە.
6
وان ل بەرامبەر كەنیسەیێ شاهدەیی ل سەر حەزژێكرنا تە دا. تۆ دێ كارەكێ باش كەی، دەمێ تۆ ب شێوەیەكێ هەژی خودێ وان ب رێ بئێخی.
7
چنكو ئەو ژ پێخەمەت ناڤی[a] دەركەفتینە و تشتەك ژ مللەتان[b] وەرنەگرتیە.
8
لەوما پێدڤیە ئەم پشتەڤانیا كەسێن وەسا بكەین، دا هەڤكارێن وان بین بۆ راستیێ.
دیۆتریفس و دیمیتریۆس 
9
من تشتەك بۆ كەنیسەیێ نڤیسی، لێ دیۆتریفس، ئەوێ دڤێت د ناڤ وان دا كەسێ ئێكێ بیت، مە قەبیل ناكەت.
10
لەوما ئەگەر ئەز هاتم، دێ سەرنجا هەوە راكێشمە سەر كارێن ئەو دكەت، كا چەوا ب گۆتنێن خراب نەكامیا مە دكەت. ئەو ب ڤێ چەندێ ژی بەس ناكەت، لێ برایان ژی قەبیل ناكەت و هەر ئێكێ دڤێت برایان قەبیل بكەت، ئەو رێكێ لێ دگریت و ژ كەنیسەیێ دەردئێخیت.
11
هەی خۆشتڤی، چاڤ ل خرابیێ نەكە، لێ ل باشیێ بكە. هەر ئێكێ باشیێ دكەت، ئەو ژ خودێیە و یێ خرابیێ دكەت، ئەوی خودێ نەدیتیە[c] .
12
سەبارەت دیمیتریۆسی، هەمی كەس بۆ باشیا وی شاهدەییێ ددەن، خۆ راستی ب خۆ ژی. ئەم ژی شاهدەییێ بۆ ددەین و هوین دزانن كو شاهدەییا مە یا راستە.
سڵاڤێن ئاشتیێ 
13
من گەلەك تشت هەبوون بۆ تە بنڤیسم، لێ من نەڤێت ب حبری و پێنڤیسی بیت.
14
ئەز هیڤیدارم ل دەمەكێ نێزیك تە ببینم و دێ روی ب روی ئاخڤین.
15
ئاشتی ل سەر تە بیت. هەڤال سڵاڤان ل تە دكەن. ناڤ ب ناڤ سڵاڤان ل هەڤالان بكە.
  1. a. 1‏:7 مەبەست پێ ناڤێ عیسایێ مەسیحە. بنێڕە كارێن هنارتیان 4‏:9‏-12؛ فیلیپی 2‏:9‏-10
  2. b. 1‏:7 ئانكو ئەوێن نەباوەردار
  3. c. 1‏:11 ئانكو خودێ نەنیاسیە