عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
پێغەمبەرێن درەوین 
1
لێ كا چەوا پێغەمبەرێن درەوین د ناڤ گەلی[a] دا پەیدا بوون، هەروەسا د ناڤ هەوە ژی دا دێ مامۆستایێن درەوین پەیدا بن. ئەو دێ ب نهێنی فێركرنێن وێرانكەر ئیننە د ناڤ هەوە دا، خۆ ئەو دێ وی خودانێ باڵادەست ماندەل[b] كەن یێ ئەو كڕین[c] ، هۆسا ئەو دێ ژناڤچوونەكا ب لەز ئیننە سەرێ خۆ.
2
دێ گەلەك مرۆڤ ب دویڤ بێدەلنگیا وان كەڤن و ژ بەر وان دێ ب خرابی بەحسێ رێبازا راستیێ هێتە كرن.
3
ئەو دێ ژ بەر چاڤبرساتیا خۆ ب گۆتنا چیڕۆكێن چێكری بازرگانیێ ب هەوە كەن. ئەو حوكمێ ژ كەڤن وەرە ل سەر هاتیە دان، ژ كار نەكەفتیە و ژناڤبرنا وان نە یا نڤستیە.
4
چنكو ئەگەر خودێ دلۆڤانی ب وان فریشتەیان نەبربیت یێن گونەهـ كرین، لێ هاڤێتبنە د دۆزەخێ دا، كو ئەو د كویراتیا تاریاتیێ دا بۆ رۆژا دادكرنێ د زنجیركری بن
5
و ئەگەر دلۆڤانی ب جیهانا كەڤنار نەبربیت، لێ نوح كو راستداری بۆ خەلكی رادگەهاند ل گەل حەفتێن دی پاراستبن، دەمێ توفان ب سەر جیهانا بەدكاران دا ئینای[d]
6
و ئەگەر حوكمێ وێرانكرنێ ل سەر باژێڕێن سەدۆم و عەمۆرا دانابیت و كربنە خولی، كربنە نموونە بۆ بەدكارێن پشتی وان بهێن
7
و ڵۆتێ راستدار قورتال كربیت، ئەوێ ژ ژیانا بێدەلنگیێ یا بەدكاران دلتەنگ بووی،[e]
8
چنكو ئەو مرۆڤێ راستدار، ئەوێ د ناڤ وان دا دژیا، ژ بەر كریارێن وان یێن خراب یێن وی ددیتن و دبهیستن، رۆژ بۆ رۆژێ گیانێ وی یێ راستدار ئازار دكێشا،
9
ئەڤجا خودان دزانیت كا چەوا خودێترسان ژ تاقیكرنێ قورتال بكەت و خرابكاران تا رۆژا دادكرنێ بهێلیتە د بن سزای ڤە،
10
نەخاسمە ئەوێن ب دویڤ حەزێن هەڕمی یێن لەشی دكەڤن و سڤكاتیێ ب سەروەریێ دكەن.
ئەو د رویقاییمن و خۆ دسەپینن، ناترسن كو ب خرابی بەحسێ خودانێن مەزناهیێ[f] بكەن.
11
خۆ فریشتە، هەر چەندە ژ وان[g] ب هێزتر و شیانترن، لێ ل نك خودانی ب ئاخفتنەكا كرێت وان[h] گونەهبار ناكەن.
12
لێ ئەو كەس وەكو گیانەوەرێن بێ مەژینە، یێن ب خۆرسكێ[i] دهێنە بڕێڤەبرن، ژ بۆ نێچیركرنێ و كوشتنێ چێبووینە، دەربارەی تشتێن وان پێزانین ل سەر نەی كوفریان دكەن، ئەڤجا ئەو دێ وەكو وان گیانەوەران ژ ناڤ چن
13
و ل شوینا زیانا وان كری، ئەو دێ زیانێ وەرگرن. دهژمێرن خۆشیە كو ل رۆژا نیڤرۆ ب دویڤ كەیفا دلێ خۆ بكەڤن. ئەو خالەكا رەش و شەرمزارینە، تامێ ژ فێلبازیێن خۆ وەردگرن دەمێ د ئاهەنگان دا ل گەل هەوە پشكدار دبن.
14
چاڤێن وان د تژی دەهمەنپیسینە، ژ گونەهكرنێ تێر نابن، دەروونێن لاواز دخاپینن. دلێ وان ل سەر چاڤبرساتیێ یێ مەشقدایە. نفرین ل سەر وانە![j]
15
وان ژ رێكا راست لادا، ئەڤجا ئەو د سەر دا چوون و رێكا بەلعامێ كوڕێ بەعوری گرت، ئەوێ حەز ژ كرێیا خرابیێ كری.[k]
16
لێ ئەو ژ بەر سەرپێچیا وی كری هاتە پاشڤەبرن، دەمێ كەرێ بێ زمان ب زمان كەفتی و رێ ل دیناتیا پێغەمبەری گرتی.
17
ئەڤ كەسە كانیێن بێ ئاڤن، مژن ب باڕۆڤەی دهێنە هاژوتن. بۆ وان كویرترین تاریستان هاتیە تەرخان كرن.
18
چنكو گۆتنێن مەزن و ڤاڵا دبێژن، هۆسا ب ئارەزوویێن لەشی یێن بێدەلنگیێ وان كەسان د سەر دا دبەن یێن ژ نوی رزگار بووین ژ ئەوێن د شاشیێ دا دژین.
19
سۆزا ئازادیێ ددەنە وان، هەر چەندە ئەو ب خۆ بەنیێن پویچاتیێنە، چنكو ئەو تشتێ ل سەر مرۆڤی زاڵ دبیت، مرۆڤ دبیتە بەنیێ وی.
20
ئەگەر ئەو ب نیاسینا خودان و قورتالكەرێ مە عیسایێ مەسیح ژ هەڕماتیێن جیهانێ رزگار ببن و پشتی هنگی كەفتبنە د تەڤنێ وان دا و بندەست ببنەڤە، ئەڤە دویماهیا وان ژ دەستپێكا وان كمباخترە.
21
بۆ وان باشتر بوو كو رێكا راستداریێ نەنیاسیبا، نەكو ئەوان نیاسیبا و پشتی هنگی ژ فەرمانا پیرۆز یا بۆ وان هاتیە دان پاشگەز[l] ببان.
22
ئەڤ پەندە ب دروستی ل سەر وان دهێت: «سە ل دلڕابوونا خۆ ڤەدگەڕیێت»[m] و: «بەرازا شویشتی، ڤەدگەڕیێت خۆ د ناڤ هەڕیێ دا دگەڤزینیت.»
  1. a. 2‏:1 مەبەست پێ مللەتێ ئیسرائیلە
  2. b. 2‏:1 ئینكار
  3. c. 2‏:1 q كڕین ئاماژەیە بۆ قورتالكرنا مەسیحی، كو وی ب خوینا خۆ مرۆڤ ژ دیلاتیێ كڕین و رزگار كرن. بنێڕە: مەرقۆس 10‏:45؛ 1 كورنتۆس 6‏:19‏-20؛ 1 تیمۆتاوس 2‏:6؛ ئاشكراكرن 5‏:9.
  4. d. 2‏:5 دەستپێكرن 6‏:18؛ 7‏:13‏-22
  5. e. 2‏:6‏-7 دەستپێكرن پشكا 19
  6. f. 2‏:10 مەبەست پێ هەبوویێن روحانینە وەكو فریشتە و ئەجنە و.. هتد.
  7. g. 2‏:11 مەبەست پێ ‹مامۆستایێن درەوین› یان ژی ‹خودانێن مەزناهیێ›نە.
  8. h. 2‏:11 بەهرا پتر مەبەست پێ ‹خودانێن مەزناهیێ›نە.
  9. i. 2‏:12 ئانكو: غريزة
  10. j. 2‏:14 دەقێ یونانی دبێژیت ‹زاڕۆكێن نفرینێنە›.
  11. k. 2‏:15 سەرژمێری پشكا 22
  12. l. 2‏:21 q پاشگەز ئانكو ‹مرتد› ئەون یێن ژ راستیێ لێڤە بووین و پشتا خۆ دایێ
  13. m. 2‏:22 پەند 26‏:11