عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
ئەم وەك یێن كو ل گەل وی كار دكەین، هیڤی ژ هەوە دكەین كو وەرگرتنا كەرەما خودێ ژ لایێ هەوە ڤە یا ژ قەستا نەبیت.
2
چنكو خودێ دبێژیت:
«من د دەمێ گونجای دا گوهداریا تە كر
و د رۆژا قورتالبوونێ دا هاریكاریا تە كر.»[a]
ئها دەمێ گونجای نوكەیە، ئها رۆژا قورتالبوونێ نوكەیە.
3
ئەم د چ تشتی دا بۆ كەسێ ئاستەنگان نادانین، دا گازندە ژ خزمەتێ نەهێنە كرن.
4
لێ د هەمی تشتان دا، ئەم خۆ وەكو خزمەتكارێن خودێ پەسەند دكەین: د گەلەك خۆڕاگرتنێ دا، د تەنگاڤیان دا، د بن فشاران ڤە، د دژواریان دا،
5
د قوتانان دا، د زیندانكرنان دا، د تێكدانان دا، د رەنجكێشانان دا، د بێ خەویێ دا، د برسێ دا،
6
د دلپاكیێ دا، د زانینێ دا، د بێهنفرەهیێ دا، د قەنجیێ دا، د گیانێ پیرۆز دا، د حەزژێكرنا بێ دووڕویاتی دا،
7
د گۆتنا راستیێ دا، د هێزا خودێ دا، ب چەكێن راستداریێ یێن دەستێ راستێ و یێن دەستێ چەپێ،
8
ب رێزگرتنێ و بێرێزكرنێ، ب ناڤودەنگەكێ باش یان یێ خراب. ئەم وەك خاپینۆك دهێینە هژمارتن، لێ ئەم د راستین.
9
وەك نەنیاس، لێ د ناڤدارین. وەك یێن ل بەر مرنێ، لێ ئها ئەم د ساخین. وەك یێن سزادایی، لێ نەهاتینە كوشتن.
10
وەك كۆڤاندار، لێ هەردەم د دلخۆشین. وەك هەژار، لێ گەلەكان دەولەمەند دكەین. وەك مە چ نەبیت، لێ ئەم خودانێن هەمی تشتاینە.
11
ئەم ب ئاشكرایی ل گەل هەوە ئاخڤتین، گەلی كورنتۆسیان! دلێ مە ژی بۆ هەوە یێ ڤەكریە.
12
ڤیانا مە بۆ هەوە نەهاتیە بەرتەنگكرن، لێ ڤیانا هەوە بۆ مە یا بەرتەنگە.
13
ئەز وەسا دبێژمە هەوە، هەروەكو ئەز دبێژمە زاڕۆكێن خۆ: كا چەوا مە دلێ خۆ بۆ هەوە ڤەكریە، هوین ژی وەسا دلێ خۆ بۆ مە ڤەكەن.
ئەم پەرستگەها خودایێ زیندینە 
14
ل گەل بێباوەران د بن ئێك نیرك ڤە نەبن. چ هەڤپشكی د ناڤبەرا راستداریێ و خرابیێ دا هەیە؟ رۆناهیێ چ پشكداری ل گەل تاریێ هەیە؟
15
چ رێككەفتن د ناڤبەرا مەسیحی و بەلیعاری[b] دا هەیە؟ یان یێ باوەردار چ بەهر ل گەل یێ بێباوەر هەیە؟
16
ما چ سازان د ناڤبەرا پەرستگەها خودێ و پووتان[c] دا هەیە؟ چنكو ئەم پەرستگەها خودایێ زیندینە، هەروەكو خودێ گۆتی:
«ئەز دێ د ناڤ وان دا ئاكنجی بم
و د ناڤبەرا وان دا گەڕیێم.
ئەز دێ خودایێ وان بم
و ئەو دێ گەلێ من بن.»[d]
17
لەوما
«خودان دبێژیت: ژ ناڤ وان دەركەڤن و خۆ ڤەدەر كەن،
دەست نەكەنە تشتەكێ هەڕمی،
ئەڤجا ئەز دێ هەوە قەبیل كەم.[e]
18
ئەز دێ بۆ هەوە بمە باب،
هوین ژی دێ كوڕ و كچێن من بن.
خودان، هێزدارێ هەر تشتی ڤێ دبێژیت.»[f]
  1. a. 6‏:2 ئیشایا 49‏:8
  2. b. 6‏:15 مەبەست پێ ئبلیسە
  3. c. 6‏:16 صەنەمان
  4. d. 6‏:16 پەرستن و پیرۆزی 26‏:12؛ یەرمیا 32‏:38؛ حزقیێل 37‏:27
  5. e. 6‏:17 ئیشایا 52‏:11؛ حزقیێل 20‏:34، 41
  6. f. 6‏:18 2 ساموئێل 7‏:8،14