عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دەربارەی رەفتارا بەنیان 
1
هەمی یێن كو د بن نیركێ[a] بەنیاتیێ دا، بلا خودانێن خۆ هەژی هەمی رێزگرتنێ ببینن، دا ب خرابی بەحسێ ناڤێ خودێ و فێركرنا مە نەهێتە كرن.
2
ئەوێن خودانێن وان د باوەردار، بلا ژ بەر برایینیێ رێزگرتنا وان كێم نەكەن، لێ بلا پتر خزمەتا وان بكەن، چنكو ئەوێن مفای ژ خزمەتا وان وەردگرن، باوەردار و خۆشتڤینە.
فێركرنێ و هاندانێ ب وان هەمی تشتان بكە.
راسپاردەیێن پاولۆسی ژ بۆ تیمۆتاوسی 
3
ئەگەر ئێك فێركرنەكا دی فێری خەلكی دكەت و ل گەل پەیڤێن ساخلەم یێن خودانێ مە عیسایێ مەسیح و فێركرنا ل دویڤ خودێترسیێ رێك ناكەڤیت،
4
ئەڤە ئەو كەسەكێ دفنبلندە و تشتەكی تێناگەهیت. ئەو نەساخێ گەنگەشەیێ و شەڕەدەڤێیە، كو دبنە ئەگەرێ زكڕەشی، هەڤڕكی، بوهتان، گۆمانێن خراب
5
و گەنگەشەیێن بێ دویماهی، ئەڤ هەمی تشتە ژ مرۆڤێن زێهنێ وان پویچ بووی و راستی ل نك نەمای پەیدا دبن. ئەو هزر دكەن خودێترسی رێكە بۆ قازانجكرنێ.
6
راستە، خودێترسی قازانجەكێ مەزنە، ئەگەر مرۆڤ ل سەر تشتێ وی هەی یێ رازی بیت،
7
چنكو مە تشتەك نەئینایە جیهانێ و ئەم نەشێن تشتەكی ژێ ببەین.[b]
8
ئەڤجا ئەگەر مە خوارن و جلك هەبن، بلا ئەم ب وان د رازی بین.[c]
9
لێ ئەوێن دڤێن دەولەمەند ببن، ئەو دكەڤنە تاقیكرنێ و خەفكێ و گەلەك ئارەزوویێن بێئاقلانە و زیانبەخش، یێن مرۆڤی د وێرانكرنێ و ژناڤچوونێ دا نقووم دكەن،[d]
10
چنكو حەزژێكرنا پارەی رەها هەمی خرابیانە. ژ ڤێ حەزژێكرنێ هندەكان خۆ تێ وەركر و ژ باوەریێ ڤاڕێبوون و گەلەك برین ل خۆ كرن.
11
لێ تۆ، هەی مرۆڤێ خودێ، ژ ڤان تشتان بڕەڤە و بكەڤە دویڤ راستداریێ، خودێترسیێ، دلسۆزیێ، حەزژێكرنێ، خۆڕاگریێ و دلنەرمیێ.
12
د خەباتا باش یا باوەریێ دا خۆ بوەستینە و خۆ ب ژیانا هەروهەر ڤە بگرە، ئەوا تۆ بۆ وێ هاتیە گازیكرن و تە ل بەرامبەر گەلەك شاهدان شاهدەییا باش بۆ وێ دای.
13
ل بەرامبەر خودێ، ئەوێ ژیانێ ددەتە هەمیان و ل بەرامبەر مەسیح عیسای، ئەوێ ل بەرامبەر پیلاتۆسێ پونتی شاهدەییا باش دای، تە رادسپێرم[e]
14
كو تۆ ڤێ فەرمانێ بێكێماسی و بێگازندە ب جهـ بینی، تا دیاربوونا خودانێ مە عیسایێ مەسیح.
15
خودێ دێ دیاربوونا وی د دەمێ خۆ یێ دەستنیشانكری دا ئاشكرا كەت، ئەو خودایێ هەژی پەسنێ[f] و سەروەرێ ئێكانە، پاشایێ پاشایان و خودانێ خودانان،
16
ئەوێ ب تنێ وی نەمری هەی، د رۆناهیەكێ دا ئاكنجیە كو كەس نەشێت خۆ نێزیك بكەت، ئەوێ كەسێ نەدیتی و كەس نەشێت ببینیت، رێز و سەروەریا هەروهەر بۆ وی بن! ئامین.[g]
17
دەولەمەندێن ڤێ جیهانێ راسپێرە، كو د دفنبلند نەبن و هیڤیا خۆ ب دەولەمەندیا نە مسۆگەر ڤە گرێ نەدەن، لێ هیڤیا خۆ ب خودێ ڤە گرێ بدەن، یێ هەمی تشتان ب زێدەیی ددەتە مە، دا خۆشیێ ژێ وەرگرین.[h]
18
وان راسپێرە كو باشیێ بكەن، ب كریارێن باش د دەولەمەند بن، د مەرد بن و بۆ پشكداریێ ژ مالێ خۆ ل گەل كەسێن دی د ئامادە بن.
19
هۆسا دێ بۆ خۆ گەنجینەیەكێ عومبار كەن كو بۆ پاشەڕۆژێ بنیاتەكێ باش بیت، دا ژیانا راستەقینە ب دەست خۆ ڤە بینن.
راسپاردەیا دویماهیێ و سڵاڤ 
20
هەی تیمۆتاوس! ئەو تشتێ ب تە هاتیە راسپاردن[i] بپارێزە، خۆ ژ پڕبێژیێن نەپیرۆز و هەڤدژیێن ناڤێ ‹زانین› ب درەو ل سەر هاتینە دانان، دویر بئێخە،
21
ئەوا هندەك ب دویڤ كەفتین و ژ باوەریێ ڤاڕێ بووین.
كەرەم ل سەر هەوە بیت.
  1. a. 6‏:1 q نیرك: ئەو دارە یێ ستۆیێ گایێن جۆتی ب هنجاڕی ڤە گرێ ددەت.
  2. b. 6‏:7 ئەیوب 1‏:21
  3. c. 6‏:8 پەند 30‏:8
  4. d. 6‏:9 پەند 23‏:4؛ 28‏:22
  5. e. 6‏:13 یوحەننا 18‏:37
  6. f. 6‏:15 q پەسن: مەدح و سەنا
  7. g. 6‏:16 دەركەفتن 33‏:20
  8. h. 6‏:17 زەبوور 62‏:10
  9. i. 6‏:20 مەبەست پێ مزگینیا مەسیحیە. بنێڕە 2 تیمۆتاوس 1‏:14