عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
رەفتاركرن ل گەل باوەرداران 
1
ل زەڵامێ پیر نەحەیتینە[a] ، لێ هان بدە، هەروەكو ئەو بابێ تە، رەفتارێ ل گەل گەنجان ژی بكە هەروەكو برایێن تە،
2
ل گەل پیرەژنان ژی هەروەكو دایكا تە، ل گەل كچ و ژنێن گەنج ژی ب هەمی دەهمەنپاكی هەروەكو خویشكێن تە.
دەربارەی هاریكاریكرنا بیژنان 
3
رێزێ ل وان بیژنان[b] بگرە یێن كو ب دروستی بیژنن.
4
لێ ئەگەر بیژنەكێ زاڕۆك یان نەڤی هەبن، بلا ئەو ل بەراهیێ فێر ببن كو ئایینداریا خۆ ل گەل خەلكێ مالا خۆ ب جهـ بینن و قەنجیێن دایك و بابێن خۆ ل سەر خۆ راكەن، چنكو ئەڤ چەندە جهێ دلخۆشیا خودێیە.
5
بیژنا ب دروستی ئەوە یا بێ سەمیان، ئەوا هیڤیا خۆ ب خودێ ڤە گرێ دای و ب شەڤ و رۆژ ب نڤێژ و هیڤیكرنێ ڤە دمینیت.
6
لێ ئەوا خۆ رادەستی خۆشیێن دلی دكەت، ئەو ب زیندی یا مریە.
7
وان ب ڤان تشتان راسپێرە، دا د بێگازندە بن.
8
لێ ئەگەر ئێك چاڤێ خۆ نادەتە مرۆڤێن خۆ، ب تایبەتی خەلكێ مالا خۆ، ئەڤە وی باوەری ماندەل[c] كریە و ئەو ژ بێباوەران خرابترە.
9
بلا ناڤێ بیژنێ د تۆمارا بیژنان دا بیت، ئەگەر ژیێ وێ ژ شێست ساڵان كێمتر نەبیت و ب تنێ شویەك كربیت
10
و ل سەر كریارێن چاك شاهدەیی بۆ بهێتە دان: ئەگەر زاڕۆكێن خۆ بخودان كربن، مێڤان حەواندبن، پێیێن پیرۆزكریان شویشتبن[d] ، هاریكاریا كەسێن د تەنگاڤیێ دا كربیت و ل دویڤ هەر كارەكێ باش چووبیت.
11
لێ بلا ناڤێن بیژنێن گەنج د تۆمارێ دا نەبن، چنكو دەمێ ئارەزوویێن لەشی رێكا وان ژ مەسیحی ڤەدگوهێزن، ئەو حەز دكەن شوی بكەن.
12
ب ڤی ئاوایی ئەو دادكرنێ د ئیننە سەر خۆ، چنكو ئەو سۆزا خۆ یا پێشیێ دشكێنن.[e]
13
ل گەل هندێ، ئەو فێری تەمبەلیێ دبن و ژ ڤێ مالێ دچنە ڤێ مالێ. نە ب تنێ تەمبەلیێ، لێ نەكامیێ و مایتێكرنێ دكەن و تشتێن نەژێهاتی ژی دبێژن.
14
لەوما من دڤێت بیژنێن گەنج شوی بكەن، زاڕۆك ببن و د مالدار بن، دەرفەتێ نەدەنە نەیاری كو بوهتانان ب دویڤ مە[f] ڤەنیت.
15
چنكو ئەڤە هندەك ڤاڕێ بووینە و ب دویڤ ئبلیسی كەفتینە.
16
ئەگەر باوەردارەكێ بیژن هەبن، بلا هاریكاریا وان بكەت و بارێ كەنیسەیێ گران نەكەت، دا كەنیسە هاریكاریا وان بكەت یێن ب دروستی بیژنن.
دەربارەی ریهسپیێن كەنیسەیێ 
17
ئەو ریهسپیێن ب باشی رێڤەبەریێ دكەن، بلا بهێنە دیتن كو ژ هەژی رێزگرتنەكا دووجاركینە، ب تایبەت ئەوێن د پەیڤێ و فێركرنێ دا وەستیانێ دكێشن.
18
چنكو نڤیسار دبێژیت: «دەڤێ گای گرێ نەدە، دەمێ گێرێ دكەت»[g] و «پالە هەژی كرێیا خۆیە».[h]
19
سكالایێ ل سەر چ ریهسپیان قەبیل نەكە، ئەگەر دوو یان سێ شاهد نەبن.[i]
20
ئەوێن ل سەر گونەهكرنێ ماین، ل بەر چاڤێن هەمیان پاشڤە ببە، دا یێن دی ژی بترسن.
21
ئەز ل بەرامبەر خودێ و مەسیح عیسای و فریشتەیێن هەلبژارتی فەرمانێ ل تە دكەم، كو تۆ وان تشتان بێی حوكمێ پێشوەخت ب جهـ بینی و تشتەكی ب لایەنگری نەكەی.
22
دەستێ خۆ ب لەز نەدانە سەر چ كەسی، پشكدار ژی نەبە د گونەهێن كەسێن دی دا. خۆ ب پاقژی راگرە.[j]
23
ئێدی ئاڤێ ب تنێ ڤەنەخۆ، لێ پیچەك شەرابێ ژی ب كار بینە، ژ بەر ئاشكێ[k] خۆ و ژ بەر نەساخیێن خۆ یێن گەلەك جاران دووبارە دبن.
24
گونەهێن هندەك مرۆڤان د دیارن و بۆ دادكرنێ ب پێش وان دكەڤن، لێ گونەهێن هندەكان ب دویڤ وان را دچن.
25
هەروەسا كریارێن باش د دیارن، یێن نە د دیار ژی د شیان دا نینە بهێنە ڤەشارتن.
  1. a. 5‏:1 پەرستن و پیرۆزی 19‏:32
  2. b. 5‏:3 د پەرتووكا پیرۆز دا مەبەست ژ ‹بیژن› ئەو ژنە یا مێرێ وێ مری، نە یا بەردای.
  3. c. 5‏:8 ئینكار
  4. d. 5‏:10 بنێڕە یوحەننا 13‏:5‏-17
  5. e. 5‏:12 شویكرنا بیژنەكێ تشتەكێ رەوایە ( 1 كورنتۆس 7‏:39‏-40)، لێ دبیت وان سۆز دا بیت دەمێ ناڤێ خۆ د تۆمارا بیژنان دا نڤیسی، كو پشتی هنگی شوی نەكەن.
  6. f. 5‏:14 ئانكو باوەرداران
  7. g. 5‏:18 گۆتارا مووسای 25‏:4
  8. h. 5‏:18 بنێڕە لوقا 10‏:7؛ مەتتا 10‏:10
  9. i. 5‏:19 گۆتارا مووسای 19‏:15؛ مەتتا 18‏:16
  10. j. 5‏:22 1 تیمۆتاوس 4‏:14؛ كارێن هنارتیان 6‏:6؛ 13‏:1؛ 2 تیمۆتاوس 1‏:6
  11. k. 5‏:23 گەدە یان مەعیدە