عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دووبەرەكی د ناڤ جڤاكا باوەرداران دا 
1
ئەڤجا ئەز، گەلی خویشك و برایان، نەشیام ل گەل هەوە وەكو مرۆڤێن روحانی بئاخڤم، لێ وەكو مرۆڤێن لەشكانی[a] ، وەكو زاڕۆك د باوەریا مەسیحی دا.
2
من شیر دایە هەوە، نە خوارن، چنكو هێشتا هوین نەدشیان خوارنێ بخۆن، هەروەسا نوكە ژی هوین نەشێن،
3
چنكو هێشتا هوین لەشكانینە. مادەم د ناڤ هەوە دا چاڤپێنەڕابوون و هەڤڕكی هەنە، ما نە هوین لەشكانینە و وەكو مرۆڤێن سرۆشتی دژین؟
4
دەمێ ئێك دبێژیت: «ئەز لایەنگرێ پاولۆسیمە» و ئێكێ دی دبێژیت: «ئەز لایەنگرێ ئەپولۆسیمە»، ما نە هنگی هوین وەكو مرۆڤێن سرۆشتینە؟
5
ئەڤجا ئەپولۆس كیە؟ پاولۆس كیە؟ ئەو خزمەتكارن، هەوە ل سەر دەستێ وان باوەری ئینایە، هەروەكو خودانی ئەڤ ئەركە دایە هەر ئێك ژ وان.
6
من چاند و ئەپولۆسی ئاڤدا؛ لێ خودێ وەرار دایێ.[b]
7
ئەڤجا نە یێ چاندی یێ گرنگە و نە ژی یێ ئاڤدای، لێ ئەوێ وەرارێ ددەت یێ گرنگە، كو ئەو خودێیە.
8
یێ چاندی و یێ ئاڤدای وەكو ئێكن، هەر ئێك ژ وان دێ ل دویڤ رەنجا خۆ كرێیا خۆ وەرگریت.
9
چنكو ئەم پێكڤە بۆ خودێ كار دكەین، هوین ژی زەڤیا خودێنە و ئاڤاهیێ خودێنە.
10
ل دویڤ وێ كەرەمێ یا خودێ دایە من، وەكو هۆستایەكێ شارەزا من بنیاتەك دانا و ئێكێ دی ل سەر ئاڤا دكەت. ئەڤجا بلا هەر ئێك یێ هشیار بیت، كا چەوا ل سەر ئاڤا دكەت،
11
چنكو كەس نەشێت بنیاتەكێ دی دانیت، ژبلی وی یێ هاتیە دانان، كو ئەو ژی عیسایێ مەسیحە.
12
ئەڤجا ئەگەر ئێك ل سەر ڤی بنیاتی زێڕی، زیڤی، بەرێن بهاگران، داری، ریسیان[c] یان كایێ ئاڤا بكەت،
13
كارێ هەر كەسەكی دێ بەرچاڤ بیت. ئەو رۆژ[d] دێ وی ئاشكرا كەت، چنكو ئەو دێ ل گەل ئاگری دیار بیت، ئاگر ژی دێ كارێ هەر كەسەكی تاقی كەت، كا یێ چەوایە.
14
ئەگەر كارێ ئێكی بمینیت، یێ كو ل سەر وی بنیاتی ئاڤا كری، ئەو دێ خەلاتەكی وەرگریت.
15
ئەگەر كارێ ئێكی بسوژیت، دێ زیانێ كەت. ئەو ب خۆ دێ قورتال بیت، لێ وەكو وی یێ د ئاگری را دەرباز بووی.
16
ما هوین نزانن، كو هوین پەرستگەها خودێنە و گیانێ خودێ د هەوە دا یێ ئاكنجیە؟[e]
17
ئەگەر كەسەك پەرستگەها خودێ وێران بكەت، خودێ ژی دێ وی وێران كەت، چنكو پەرستگەها خودێ یا پیرۆزە، ئەو پەرستگەهـ ژی هوینن.
18
بلا كەس خۆ نەخاپینیت. ئەگەر ئێك ژ هەوە هزر دكەت، كو ئەو ل دویڤ پیڤەرێن ڤێ جیهانێ ئاقلمەندە، بلا بێئاقل ببیت، دا ببیتە ئاقلمەند.
19
چنكو ئاقلمەندیا ڤێ جیهانێ ل نك خودێ بێئاقلیە. هەروەكو هاتیە نڤیسین: «ئەو ئاقلمەندان د فێلبازیێن وان دا دگریت.»[f]
20
دیسان هاتیە نڤیسین: «خودان هزرێن ئاقلمەندان دزانیت، كو د خرشن.»[g]
21
لەوما بلا كەس شانازیێ ب مرۆڤان نەبەت، چنكو هەمی تشت یێن هەوەنە:
22
پاولۆس بیت، یان ئەپولۆس، یان كیفاس[h] ، یان جیهان، یان ژیان، یان مرن، یان تشتێن ڤی دەمی، یان ژی یێن پاشەڕۆژێ بن، هەمی تشت یێن هەوەنە
23
و هوین یێن مەسیحینە و مەسیح ژی یێ خودێیە.
  1. a. 3‏:1 q مرۆڤێن لەشكانی: ئەوێن وەكو نەباوەرداران ل دویڤ حەزێن لەشی دژین، ئانكو ئەوێن هێشتا گرێدای جیهانێنە.
  2. b. 3‏:6 كارێن هنارتیان 18‏:4‏-11؛ 18‏:24‏-28
  3. c. 3‏:12 q ریسی: گیایێ كو هاتیە بادان و ل بەر تاڤێ هشك بووی.
  4. d. 3‏:13 رۆژا هاتنەڤەیا مەسیحی بۆ دادكرنا جیهانێ.
  5. e. 3‏:16 1 كورنتۆس 6‏:19؛ 2 كورنتۆس 6‏:16
  6. f. 3‏:19 ئەیوب 5‏:13
  7. g. 3‏:20 زەبوور 94‏:11
  8. h. 3‏:22 ناڤێ ئارامی یێ ‹پەترۆس›یە.