عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
راگەهاندن دەربارەی مەسیحێ خاچدای 
1
ئەز ژی، گەلی برا، دەمێ هاتیمە نك هەوە و نهێنیا خودێ بۆ هەوە رادگەهاند، من ب رەهوانیا ئاخفتنێ یان ئاقلمەندیێ نەدكر.
2
چنكو من بڕیار دا، دەمێ ئەز د ناڤ هەوە دا، فێركرنێ ل دۆر تشتەكێ دی نەكەم[a] ، ژبلی عیسایێ مەسیح، ئەو ژی ب خاچدایی.
3
ل نك هەوە، ئەز یێ لاواز و د ترس و لەرزەكا مەزن دا بووم،
4
ئاخفتن و مزگینیدانا من نە ب ئاخفتنێن ئاقلمەندیا مرۆڤكانی یێن قاییلكەر بوو، لێ ب نیشانێن هێزا گیانێ پیرۆز بوو،
5
دا باوەریا هەوە نە ل سەر ئاقلمەندیا مرۆڤان یا ئاڤاكری بیت، لێ ل سەر هێزا خودێ بیت.
ئاقلمەندیا راستەقینە ژ گیانێ پیرۆزە 
6
لێ د ناڤ یێن پێگەهشتی دا، ئەم ئاقلمەندیێ دبێژین، هەر چەندە ئەڤ ئاقلمەندیە نە یا ڤێ جیهانێیە، نە ژی یا سەرۆكێن ڤێ جیهانێیە، ئەو سەرۆكێن ژ ناڤ دچن.
7
لێ یا خودێیە ئەو ئاقلمەندیا نهێنی و ڤەشارتی یا ئەم دبێژین، ئەوا خودێ بەری سەردەمان ژ بۆ مەزناهیا مە دەستنیشانكری،
8
ئەوا چ سەرۆكێن ڤێ جیهانێ تێنەگەهشتین، چنكو ئەگەر ئەو تێگەهشتبان، ئەوان خودانێ مەزناهیێ خاچ نەددا.
9
لێ هەروەكو هاتیە نڤیسین:
«ئەو تشتێن چ چاڤان نەدیتین
و چ گوهان نەبهیستین
و نەهاتینە سەر هزرا چ مرۆڤان،
ئەوێن خودێ ژ بۆ حەزژێكەرێن خۆ ئامادە كرین...»[b]
10
بۆ مە خودێ ب گیانێ خۆ ئەو دیار كرن. چنكو گیان هەمی تشتان دهلێڤڕینیت[c] ، خۆ كویراتیا ناخێ خودێ ژی.
11
ما كی تشتێن مرۆڤی دزانیت، ژبلی گیانێ مرۆڤی، ئەوێ د مرۆڤی دا؟ هۆسا ژی تشتێن خودێ كەس نزانیت، ژبلی گیانێ خودێ.
12
ئەڤجا مە نە گیانێ جیهانێ، لێ گیانێ كو ژ خودێ دهێت، یێ وەرگرتی، دا وان تشتان بزانین یێن خودێ ژ كەرەما خۆ داینە مە.
13
ئەم وان تشتان ژی دبێژین، نە ب پەیڤێن كو ئەم ژ ئاقلمەندیەكا مرۆڤكانی فێر بووین، لێ ب پەیڤێن كو ئەم ژ گیانێ پیرۆز فێر بووین، هۆسا ئەم تشتێن روحانی بۆ كەسێن روحانی شڕۆڤە دكەین[d] .
14
لێ مرۆڤێ سرۆشتی، تشتێن گیانێ خودێ قەبیل ناكەت، چنكو ئەو تشت بۆ وی بێئاقلینە و نەشێت تێبگەهیت، ژ بەر كو ب رێكا روحانی دهێنە هەلسەنگاندن.
15
مرۆڤێ روحانی هەمی تشتان دهەلسەنگینیت و ئەو ژ لایێ كەسێ ڤە ناهێتە هەلسەنگاندن.
16
هەروەكو هاتیە نڤیسین:
«ما كێ هزرا خودانی زانیە،
دا وی فێر بكەت؟»[e]
لێ مە هزرا مەسیحی یا هەی.
  1. a. 2‏:2 ب یونانی دەق و دەق دبێژیت: ‹ئەز تشتەكێ دی نەزانم›
  2. b. 2‏:9 ئیشایا 64‏:4
  3. c. 2‏:10 ئانكو: اكتشاف
  4. d. 2‏:13 هەروەسا ب ڤێ رامانێ ژی دهێتە تێگەهشتن: ‹ئەم پەیڤێن روحانی بۆ شڕۆڤەكرنا تشتێن روحانی ب كار دئینین›
  5. e. 2‏:16 ئیشایا 40‏:13