عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
چاڤ ل من بكەن، هەروەكو ئەز چاڤ ل مەسیحی دكەم.[a]
سەرنخافتن ل دەمێ نڤێژێ 
2
ئەز پەسنا[b] هەوە دكەم، كو د هەمی تشتان دا هوین من دئیننە بیرا خۆ و نەریتێن من داینە هەوە، ب جهـ دئینن.
3
لێ من دڤێت هوین بزانن كو سەرێ هەر زەڵامەكی مەسیحە، سەرێ ژنێ مێرە و سەرێ مەسیحی ژی خودێیە.
4
هەر زەڵامەكێ نڤێژێ بكەت یان پەیاما خودێ رابگەهینیت و سەرێ وی یێ نخافتی بیت، ئەو سەرێ خۆ شەرمزار دكەت.
5
لێ هەر ژنەكا نڤێژێ بكەت یان ژی پەیاما خودێ رابگەهینیت و یا سەركۆل بیت، ئەو سەرێ خۆ شەرمزار دكەت، چنكو ئەو هەمان تشتە هەروەكو سەرێ وێ هاتیە حووچكرن.
6
ئەگەر ژن سەرێ خۆ نەنخێڤیت، بلا پرچا خۆ بتراشیت! لێ ئەگەر بۆ ژنێ شەرمزاری بیت كو سەرێ خۆ بتراشیت یان حووچ بكەت، بلا سەرێ خۆ بنخێڤیت.
7
نابیت زەڵام سەرێ خۆ بنخێڤیت، چنكو ئەو وێنە و مەزناهیا خودێیە. لێ ژن مەزناهیا مێریە.
8
چنكو زەڵام ژ ژنێ چێنەبوو، لێ ژن ژ زەڵامی چێبوو.[c]
9
هەروەسا زەڵام بۆ ژنێ نەهاتە ئافراندن، لێ ژن بۆ زەڵامی هاتە ئافراندن.
10
لەوما پێدڤیە ژنێ دەستهەلات ل سەر سەرێ خۆ هەبیت، ژ بەر فریشتەیان.
11
سەرەڕای ڤێ چەندێ، ل نك خودانی نە ژن ژ زەڵامی یا سەربخۆیە، نە ژی زەڵام ژ ژنێ یێ سەربخۆیە.
12
چنكو كا چەوا ژن ژ زەڵامی چێبوو، زەڵام ژی وەسا ب ژنێ ژ دایك دبیت، لێ هەمی تشت ژ خودێنە.
13
هوین ب خۆ بهەلسەنگینن: ما د جهێ خۆ دایە، ژن نڤێژێ بۆ خودێ بكەت و یا سەركۆل بیت؟
14
ما سرۆشت ب خۆ هەوە فێر ناكەت، كو زەڵام ئەگەر پرچا خۆ درێژ بكەت، بۆ وی شەرمزاریە،
15
لێ ئەگەر ژنێ پرچەكا درێژ هەبیت، بۆ وێ شانازیە؟ چنكو پرچا وێ بۆ نخافتنێ ب وێ هاتیە دان.
16
لێ ئەگەر ئێكی بڤێت گەنگەشەیێ ل سەر بكەت، مە نەریتەكێ دی نینە، هەروەسا كەنیسەیێن خودێ ژی نینە.
شیڤا خودانی 
17
لێ ئەز ب ڤان راسپاردەیان پەسنا هەوە ناكەم، چنكو دەمێ هوین كۆمبوونێ دكەن، زیان ژ قازانجی پترە.
18
یا ئێكێ، ئەز دبهیسم كو دەمێ هوین وەكو كەنیسە كۆمبوونێ دكەن، دووبەرەكی د ناڤبەرا هەوە دا هەنە و تا رادەیەكی ئەز باوەر ژ ڤێ چەندێ دكەم.
19
بێگۆمان دڤێت د ناڤ هەوە دا دەستەگەری هەبن، دا یێن پەسەند د ناڤ هەوە دا ئاشكرا ببن.
20
ئەڤجا دەمێ هوین كۆمبوونێ دكەن، ئەو نە شیڤا خودانیە هوین دخۆن،
21
چنكو ل سەر خوارنێ هەر ئێك بێی كو خۆ ل هیڤیا كەسێ بگریت شیڤا خۆ دخۆت، ئەڤجا ئێك برسی دمینیت و ئێكێ دی سەرخۆش دبیت.
22
ما هەوە مال نینن كو هوین تێدا بخۆن و ڤەخۆن؟ یان هوین سڤكاتیێ ب كەنیسەیا خودێ دكەن و دەستكورتان ددەنە شەرمێ؟ ئەڤجا ئەز چ بێژمە هەوە؟ ئایا ئەز پەسنا هەوە بكەم؟ نەخێر، ئەز ل سەر ڤێ چەندێ پەسنا هەوە ناكەم!
23
ئەڤ تشتێ من دایە هەوە، من ژ خودانی وەرگرتیە: ل وێ شەڤا خودان عیسا هاتیە رادەستكرن، وی نان هەلگرت
24
و پشتی سوپاسی كری، نان كەر كر و گۆت: «ئەڤە لەشێ منە، یێ كو بۆ هەوەیە. هوین ڤێ چەندێ بۆ بیرئینانا من بكەن.»
25
هەروەسا پشتی شیڤێ پەرداغ ژی هەلگرت و گۆت: «ئەڤ پەرداغە پەیمانا نویە ب خوینا من. ڤێ چەندێ بۆ بیرئینانا من بكەن، هەر جارەكا هوین ڤەخۆن.»[d]
26
هەر جارەكا هوین ڤی نانی بخۆن و ڤێ پەرداغێ ڤەخۆن، هوین مرنا خودانی ددەنە زانین، تاكو ئەو دهێت.
27
لەوما هەر كەسێ ب شێوەیەكێ نەهێژا ڤی نانی بخۆت یان پەرداغا خودانی ڤەخۆت، ئەو دێ د دەرهەقا لەش و خوینا خودانی دا یێ گونەهبار بیت.
28
ئەڤجا بلا مرۆڤ خۆ تاقی بكەت، پاشی ژ نانی بخۆت و ژ پەرداغێ ڤەخۆت.
29
چنكو هەر ئێكێ بخۆت و ڤەخۆت، ئەگەر لەشێ خودانی ل بەر چاڤ وەرنەگریت، ئەو بۆ گونەهباركرنا خۆ دخۆت و ڤەدخۆت.
30
ژ بەر ڤێ چەندێ، گەلەك لاواز و نەساخ د ناڤ هەوە دا هەنە، هندەكێن نڤستی[e] ژی.
31
لێ ئەگەر مە دادڤانی ل سەر خۆ كربا، ئەم نەدهاتینە دادكرن.
32
لێ دەمێ ئەم ژ لایێ خودانی ڤە بهێینە دادكرن، ئەو مە تەمبی دكەت، دا ل گەل جیهانێ نەهێینە گونەهبار كرن.
33
ئەڤجا گەلی برا، دەمێ هوین بۆ خوارنێ كۆم دبن، ل هیڤیا ئێكودوو بمینن.
34
ئەگەر ئێكێ برسی بیت، بلا ل مالا خۆ بخۆت، دا كۆمبوونا هەوە نەبیتە ئەگەرێ گونەهباركرنا هەوە. دەربارەی تشتێن ماین ژی، دەمێ ئەز بهێمە نك هەوە، دێ رێك ئێخم.
  1. a. ‏11‏:1 1 كورنتۆس ‏4‏:16؛ فیلیپی ‏3‏:17
  2. b. 11‏:2 q پەسن مەدح و سەنا
  3. c. ‏11‏:8 دەستپێكرن ‏2‏:18‏-23
  4. d. ‏11‏:24‏-25 لوقا ‏22‏:19‏-20
  5. e. ‏11‏:30 مەبەست پێ مرینە