عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ژیانا ل دویڤ گیانێ پیرۆز یێ خودێ 
1
لەوما، ژ نوكە و پێڤە گونەهباركرن بۆ وان نینە یێن ل گەل مەسیح عیسای بووینە ئێك.
2
چنكو یاسایا گیانێ ب رێیا مەسیح عیسای ژیانێ ددەت، تۆ ژ یاسایا گونەهـ و مرنێ ئازاد كری.
3
ئەو تشتێ دەستووری ژ بەر لاوازیا سرۆشتێ لەشكانی یێ مرۆڤی نەشیای بكەت، خودێ ئەو كر: وی كوڕێ خۆ ب لەشەكێ وەكو لەشێ مە یێ گونەهكار هنارت بۆ كەفارەتا گونەهان، هۆسا وی گونەهـ د لەشی دا گونەهبار كر،
4
داكو رێسایێن دادپەروەرانە یێن دەستووری د مە دا بهێنە بجهئینان، ئەم یێن كو ل دویڤ لەشی ناژین، لێ ل دویڤ گیانێ پیرۆز دژین.
5
چنكو ئەوێن ل دویڤ لەشی دژین، گرنگیێ ددەنە تشتێن لەشی و ئەوێن ل دویڤ گیانێ پیرۆز دژین، گرنگیێ ددەنە تشتێن گیانێ پیرۆز.
6
دویماهیا وی زێهنێ گرنگیێ ب لەشی ددەت، مرنە، لێ دویماهیا وی زێهنێ گرنگیێ ب گیانی ددەت، ژیان و ئاشتیە.
7
ژ بەر كو ئەو زێهنێ گرنگیێ ب لەشی ددەت، دوژمناتیا خودێ دكەت، ئەو خۆ ملكەچی دەستوورێ خودێ ناكەت و نەشێت ژی خۆ ملكەچ بكەت.
8
ئەوێن ل دویڤ لەشی دژین، نەشێن خودێ رازی بكەن.
9
لێ هوین ل دویڤ لەشی ناژین، هوین ل دویڤ گیانێ پیرۆز دژین، ئەگەر ب راستی گیانێ خودێ د هەوە دا یێ ئاكنجی بیت. هەر كەسێ گیانێ مەسیحی تێدا نەبیت، ئەو نە یێ ویە،
10
لێ ئەگەر مەسیح د هەوە دایە، لەشێ هەوە ژ بەر گونەهێ یێ مریە، لێ گیانێ خودێ ژیانێ ددەتە هەوە، ژ بەر كو هوین هاتنە بێگونەهكرن.
11
ئەگەر گیانێ وی یێ عیسا ژ ناڤ مریان راكری، د هەوە دا یێ ئاكنجیە، ئەوێ كو مەسیح ژ ناڤ مریان راكری، دێ ب گیانێ خۆ یێ د هەوە دا ئاكنجی، لەشێن هەوە یێن مربار[a] ژی ڤەژینیت.
12
لەوما، گەلی خویشك و برایان، قەرەك د ستۆیێ مە دایە، لێ نە قەرێ لەشیە، داكو ل دویڤ لەشی بژین.
13
چنكو ئەگەر هوین ل دویڤ لەشی بژین، دێ مرن، لێ ئەگەر هوین ب گیانێ پیرۆز كریارێن لەشی بمرینن، هوین دێ ژین.
14
هەمی یێن كو ب گیانێ خودێ دهێنە بڕێڤەبرن، ئەون كوڕێن خودێ.
15
چنكو هەوە گیانێ بەنیاتیێ وەرنەگرتیە كو هەوە بۆ ترسێ بزڤڕینیت، لێ هەوە ئەو گیان وەرگرتییە یێ هەوە دكەتە زاڕۆكێن خودێ، ب رێكا وی گیانی ئەم دكەینە گازی: «ئابا[b] ، بابۆ!».
16
گیانێ پیرۆز ب خۆ ژی ل گەل گیانێ مە شاهدەییێ ددەت، كو ئەم زاڕۆكێن خودێینە.
17
ئەڤجا ئەگەر ئەم زاڕۆكێن وی بین، ئەم میراتگرین ژی، میراتگرێن خودێ و هەڤپشكێن مەسیحینە د میراتی دا، لێ پێدڤیە ئەم ل گەل وی د ئازاران دا پشكدار ببین، داكو د مەزناهیا وی ژی دا پشكدار ببین.[c]
ئەو مەزناهیا دهێت 
18
ئەز دبینم كو ئازارێن مە ل ڤی سەردەمی ل گەل وێ مەزناهیا كو دێ بۆ مە هێتە ئاشكراكرن، ناهێنە هەڤبەركرن.
19
ئافرندە[d] ب گەرمی چاڤەڕێیا دیاربوونا كوڕێن خودێ دكەن.
20
ژ بەر كو ئافرندە كەفتنە دبن دەستێ پویچبوونێ ڤە، نە ب حەزا خۆ، لێ ب حەزا وی یێ ئەو بندەست كرین، ب وێ هیڤیێ[e]
21
كو ئافرندە ب خۆ ژی دێ ژ بەنیاتیا رزیبوونێ هێنە ئازادكرن، بەرەڤ ئازادیا ب مەزناهی یا زاڕۆكێن خودێ.
22
ئەم دزانین، تا نوكە هەمی ئافرندە پێكڤە دنالن و ژانێن وەكو یێن زاڕۆكبوونێ دهێنێ.
23
نە ب تنێ ئافرندە، لێ ئەم ب خۆ ژی، یێن كو مە گیانێ پیرۆز وەكو خێڤە[f] وەرگرتی، د ناخێ خۆ دا دنالین و د چاڤەڕێی وێ رۆژێینە كو مافێن خۆ یێن كوڕێن خودێ وەرگرین و لەشێ مە رزگار ببیت.
24
چنكو ئەم ب هیڤیێ قورتال بووین، لێ ئەو هیڤیا بەرچاڤ، نە هیڤیە. ما تشتێ مرۆڤ دبینیت، دێ چەوا هیڤیا وی تشتی هەبیت؟
25
لێ ئەگەر مە هیڤیا تشتەكی هەبیت كو ئەم نابینین، ئەم ب هەدارێ ل چاڤەڕێ دمینین.
26
هۆسا گیانێ پیرۆز ژی د هەوارا لاوازیا مە دهێت، چنكو ئەم نزانین كا پێدڤیە د نڤێژێ دا چ بێژین. لێ گیان ب خۆ، ب نالینێن كو نەهێنە دەربڕین، مەهدەریێ[g] بۆ مە دكەت.
27
ئەوێ كو دلان دپشكنیت ژی، دزانیت كا هزرێن گیانێ پیرۆز چنە، چنكو گیان ل گۆر حەزا خودێ مەهدەریێ بۆ پیرۆزكریان دكەت.
28
ئەم دزانین كو خودێ وە دكەت هەمی تشت پێكڤە كار بكەن ژ بۆ باشیا وان یێن حەز ژ خودێ دكەن و ل دویڤ مەبەستا وی هاتینە گازیكرن.
29
چنكو ئەوێن خودێ ئەو پێشوەخت هەلبژارتین، وی ئەو پێشوەخت ژی دەستنیشان كرن، دا وەكو وێنەیێ كوڕێ وی لێ بهێن، دا كوڕ د ناڤ گەلەك خویشك و برایێن خۆ دا یێ نەخری بیت.
30
ئەوێن خودێ پێشوەخت دەستنیشان كرین، وی ئەو گازی كرن ژی، ئەوێن وی گازی كرین، وی ئەو بێگونەهكرن ژی، ئەوێن وی بێگونەهـ كرین، وی ئەو مەزنكرن ژی.
حەزژێكرنا خودێ بۆ مە ب رێكا مەسیحی 
31
ئەڤجا ئەم دەربارەی ڤان تشتان چ بێژین؟ ئەگەر خودێ ل گەل مە بیت، كی دشێت ل دژی مە بیت؟
32
ئەوێ دەستێ خۆ ژ كوڕێ خۆ ڤەنەگرتی، لێ ژ پێخەمەتی مە هەمیان ئەو رادەستی مرنێ كر، ئێدی چەوا ئەو هەمی تشتی ل گەل وی بێ بەرامبەر نادەتە مە؟
33
كی دێ هەلبژارتیێن خودێ تاوانبار كەت؟ خودێیە یێ وان بێگونەهـ دكەت،
34
كی دشێت وان گونەهبار بكەت؟ مەسیح عیسایە یێ كو مری، لێ ئەوە یێ ژ ناڤ مریان رابووی ژی و هەر ئەوە یێ ل دەستێ راستێ یێ خودێ بۆ مە مەهدەریێ دكەت.
35
كی دێ حەزژێكرنا مەسیحی ژ مە ڤەكەت؟ ئایا دژواری، تەنگاڤی، تەپەسەری، كولب، رویساتی، مەترسی یان شیر؟
36
هەروەكو هاتیە نڤیسین:
«رۆژێ هەمیێ ژ پێخەمەتی تە ئەم یێ ل بەر كوشتنێ،
وەكو پەزێن سەرژێكرنێ دهێینە هژمارتن.»[h]
37
لێ ب رێكا وی یێ حەز ژ مە دكەت، ئەم د ڤان هەمی تشتان دا، هێشتا پتر سەركەفتنێ ب دەست خۆ ڤە دئینین.
38
چنكو ئەز یێ پشتڕاستم كو نە مرن، نە ژیان، نە فریشتە، نە سەروەر، نە تشتێن هەیی، نە تشتێن دێ هێن، نە هێز،
39
نە بلنداهی، نە كویراتی[i] و نە ژی تشتەكێ دی یێ هاتیە ئافراندن دێ شێت حەزژێكرنا خودێ ژ مە ڤەكەت، ئەوا ب رێیا خودانێ مە مەسیح عیسای دهێت.
  1. a. 8‏:11 q مربار: ئانكو تۆڤێ مرنێ یێ دێ هەر مریت.
  2. b. 8‏:15 پەیڤەكا ئارامیە ئانكو: ‹باب›
  3. c. 8‏:15‏-17 گالاتیا 4‏:5‏-7
  4. d. 8‏:19 q ئافرندە: ب عەرەبی ‹مخلوقات›
  5. e. 8‏:20 دەستپێكرن 3‏:17‏-19
  6. f. 8‏:23 ئانكو بەرهەمێ دەستپێكێ. ل فەرهەنگۆكێ بنێڕە.
  7. g. 8‏:26 q مەهدەری: ب عەرەبی ‹شفاعة›
  8. h. 8‏:36 زەبوور 44‏:22
  9. i. 8‏:39 ئانكو نە ئەسمان و نە ئەرد