عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ئەركێن مە ل بەرامبەری دەستهەلاتێن ڤێ جیهانێ 
1
بلا هەر كەسەك ملكەچی دەستهەلاتدارێن كاربدەست بیت، چنكو چ دەستهەلات نینن ژ لایێ خودێ ڤە نەبن، ئەڤجا ئەوێن هەین ژی ژ لایێ خودێ ڤە هاتینە دانان.
2
لەوما یێ بەرهنگاریا دەستهەلاتێ بكەت، ئەو بەرهنگاریا دانانا خودێ دكەت و ئەوێن بەرهنگاریێ دكەن، دێ دادكرنێ ب سەرێ خۆ دا ئینن.
3
چنكو حوكمڕان نە ژ بۆ كارێ باش، لێ ژ بۆ كارێ خراب جهێ ترسێنە. ما تە دڤێت ژ دەستهەلاتێ نەترسی؟ تشتێ باش بكە، دێ ژ لایێ وێ ڤە هێیە پەسنكرن[a] .
4
چنكو ئەو خزمەتكارێ خودێیە ژ بۆ باشیا تە. لێ ئەگەر تۆ خرابیێ بكەی، بترسە، ژ بەر كو ئەو ژ قەستا شیری هەلناگریت. ئەو خزمەتكارێ خودێیە، دا تۆڕەبوونێ ب سەرێ خرابكاران دا بینیت.
5
لەوما پێدڤیە ملكەچ بن، نە ب تنێ ژ بەر تۆڕەبوونێ، لێ ژ بەر وژدانا خۆ ژی.
6
ژ بەر ڤێ چەندێ هوین خویكێ ژی ددەن، چنكو ئەو خزمەتكارێن خودێنە و بەردەوام ڤی كاری دكەن.[b]
7
مافێ هەمی كەسان بدەنێ: ئەوێ مافێ خویكێ هەی، خویكێ بدەنێ. ئەوێ مافێ باجێ هەی، باجێ بدەنێ. ئەوێ مافێ ترسێ هەی، ترسێ بدەنێ و ئەوێ مافێ رێزگرتنێ هەی، رێزێ لێ بگرن.
حەزژێكرنا ئێكودوو یا برایانە 
8
ژبلی كو هوین حەز ژ ئێكودوو بكەن، ب چ تشتی قەردارێن كەسێ نەبن، چنكو یێ حەز ژ مرۆڤێن دی بكەت، ئەوی دەستوور ب جهـ ئینا.
9
ئەو فەرمانێن دبێژن: «دەهمەنپیسیێ نەكە»، «كوشتنێ نەكە»، «دزیێ نەكە»، «دلچوونێ نەكە[c] »[d] و هەر فەرمانەكا دی هەبیت، د ناڤ ڤێ گۆتنێ دا كۆمڤە دبن: «حەز ژ نێزیكێ خۆ بكە، وەك چەوا تۆ حەز ژ خۆ دكەی.»[e]
10
حەزژێكرن خرابیێ ل یێ نێزیك ناكەت، لەوما حەزژێكرن بجهئینانا دەستووریە.
هاندان بۆ رەفتارێن باش 
11
ڤێ چەندێ بكەن، چنكو هوین دزانن چ دەمە. ئەڤە دەمژمێر هات كو هوین ژ خەوێ هشیار ببن، ژ بەر كو قورتالبوونا مە، نوكە نێزیكترە ژ وی دەمێ مە باوەری ئینای.
12
گەلەك ژ شەڤێ چوویە و رۆژ نێزیك بوویە، ئەڤجا دا كارێن تاریێ ژ بەر خۆ بكەین و چەكێن رۆناهیێ بكەینە بەر خۆ.
13
بلا رەفتارێن مە د بەڕێز بن، هەروەكو رۆژ بیت: نە ب ئاهەنگێن بێتۆرەیێ و سەرخۆشیێ، نە ب دەهمەنپیسیێ و بێدەلنگیێ، نە ب هەڤڕكیێ و دەخەسیێ.
14
لێ خۆ ب خودان عیسایێ مەسیح راپێچن و چ هزرێ بۆ تێركرنا حەزێن لەشی نەكەن.
  1. a. ‏13‏:3 پەسن: مەدح و سەنا
  2. b. ‏13‏:6 مەتتا ‏22‏:21
  3. c. ‏13‏:9 ئانكو دلێ خۆ نەبە ژن و مال و تشتێن كەسەكێ دی.
  4. d. ‏13‏:9 دەركەفتن ‏20‏:13‏-15، 17؛ گۆتارا مووسای ‏5‏:17‏-19، 21
  5. e. ‏13‏:9 پەرستن و پیرۆزی ‏19‏:18