عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
عیسا مرۆڤەكێ گوڕی ساخ دكەت 
1
دەمێ ژ چیای هاتیە خوارێ، جەماوەرەكێ مەزن ب دویڤ كەفت.
2
وەسا چێبوو مرۆڤەكێ گوڕی[a] هاتە نك و سوجدە بۆ بر و گۆت: «خودان! ئەگەر تە بڤێت، تۆ دشێی من پاقژ بكەی!»
3
عیسای دەستێ خۆ درێژ كر و دەست كرێ و گۆت: «من دڤێت، پاقژ ببە!» د جهـ دا ژ گوڕیاتیا خۆ پاقژ بوو.
4
ئەڤجا عیسای گۆتێ: «هشیار بە، بۆ چ كەسان نەبێژی! لێ هەڕە و خۆ نیشا كاهنی بدە و وی پێشكێشیێ مووسای فەرمان پێ كری، بدە، وەك شاهدەیی بۆ وان.»
ساخكرنا خزمەتكارێ سەرلەشكەری 
5
دەمێ عیسا چوویە كەفەرناحوم، سەرلەشكەرەك[b] هاتە نك وی و هیڤی ژێ كرن و گۆت:
6
«خودان! خزمەتكارێ من یێ فاڵنجیە و یێ ل مال د ناڤ نڤینان دا، ژ ئێشانێ گەلەك دنالیت.»
7
عیسای گۆتێ: «دێ هێم و ساخ كەم.»
8
سەرلەشكەری بەرسڤ دا و گۆت: «خودان، ئەز نە هەژی وێ چەندێمە تۆ بهێیە مالا من، لێ ب تنێ تۆ پەیڤەكێ بێژە، دێ خزمەتكارێ من ساخ بیت،
9
چنكو ئەز ب خۆ ژی یێ ل ژێر دەستهەلاتێ و من سەرباز یێ ل ژێر دەستێ خۆ هەین. دەمێ دبێژمە ئێك ژ وان: ‹هەڕە!› دچیت و دبێژمە ئێكێ دی: ‹وەرە!› دهێت و دبێژمە بەنیێ خۆ: ‹ڤێ بكە!› دكەت.»
10
دەمێ عیسای گوهـ لێ بووی، حێبەتی بوو و گۆتە وان یێن ل دویڤ وی هاتین: «ئەز راستیێ دبێژمە هەوە: من كەسەك ژ ئیسرائیلیان ب باوەریەكا هۆسا مەزن نەدیتیە!
11
و دبێژمە هەوە كو دێ گەلەك ژ رۆژهەلات و رۆژئاڤای ڤە هێن و دێ ل گەل ئیبراهیمی و ئیسحاقی و یەعقوبی د ناڤ پاشایەتیا ئەسمانان دا ل سەر سفرێ روینن،
12
لێ كوڕێن پاشایەتیێ[c] دێ بۆ تاریا ژ دەرڤە هێنە هاڤێتن. ل وێرێ گری و گڤاشتنا ددانانە[d]
13
پاشی عیسای گۆتە سەرلەشكەری: «هەڕە، وەكو تە باوەری پێ ئینای، بلا ببیت.» د وێ گاڤێ دا خزمەتكارێ وی ساخ بوو.
عیسا ل مالا پەترۆسی گەلەكان ساخ دكەت 
14
دەمێ عیسا هاتیە مالا پەترۆسی، خەسیا وی ل ناڤ نڤینان دیت یا تا گرتی بوو.
15
وی دەستێ خۆ كرە دەستێ وێ، تایێ بەردا و رابوو و وێ دەست ب خزمەتا وی كر.
16
دەمێ بوویە ئێڤار، گەلەك ئەوێن گیانێن پیس تێدا، ئینانە نك و وی ئەو گیان ب پەیڤەكێ ژ ناڤ وان دەرئێخستن و هەمی نەخۆش ساخ كرن.
17
ئەڤ چەندە چێبوو دا ئەوا ل سەر ئەزمانێ ئیشایا پێغەمبەر هاتی، ب جهـ بهێت، دەمێ گۆتی:
وی دەردێن مە برن
و نەخۆشیێن مە راكرن.[e]
بهایێ ل دویڤچوونا عیسای 
18
دەمێ عیسای جەماوەرەكێ مەزن ل دەوروبەرێن خۆ دیتی، فەرمان دا كو ئەو و شاگردێن خۆ دەربازی رەخێ دی یێ دەریاكێ ببن.
19
هنگی مامۆستایەكێ دەستووری هاتە نك و گۆتێ: «مامۆستا، تۆ كیڤە بچی دێ ل دویڤ تە هێم!»
20
ئینا عیسای گۆتێ: «رویڤیان كون رویڤیێن هەین و باڵندەیێن ئەسمانی هێلینێن هەین، لێ كوڕێ مرۆڤ[f] چ جهـ نینن سەرێ خۆ دانیتێ.»
21
ئێكێ دی ژ شاگردێن وی گۆتێ: «خودان، دەستویریا من بدە، دا ئەز ل پێشیێ بچم بابێ خۆ ڤەشێرم!»
22
لێ عیسای گۆتێ: «ب دویڤ من بكەڤە و بهێلە مری مریێن خۆ ڤەشێرن.»
عیسا باڕۆڤەی ئارام دكەت 
23
پاشی ئەو ل بەلەمێ سیار بوو و شاگردێن وی كەفتنە دویڤ.
24
وەسا چێبوو باڕۆڤەیەكێ ب هێز ب سەر دەریاكێ دا گرت، هەتا پێلێن ئاڤێ ب سەر بەلەمێ كەفتین، لێ ئەو یێ نڤستی بوو.
25
شاگرد چوون و ئەو هشیار كر و گۆتێ: «خودان، مە قورتال بكە! ئەم یێ ژ ناڤ دچین!»
26
وی بەرسڤ دا: «هەی كێمباوەران، بۆچی هوین دترسن؟» پاشی رابوو با و دەریاك پاشڤە برن و ئارامیەكا مەزن پەیدا بوو.
27
هەمی گوهشین و پرسیاركرن: «ئەرێ ئەڤە چ جۆرێ مرۆڤانە؟ هەتا با و دەریا ژی گوهێ خۆ ددەنێ!»
ساخكرنا دوو مرۆڤێن ئەجنەیان هنگافتین 
28
دەمێ ئەو گەهشتیە لایێ دی یێ دەڤەرا گادارینان، دوو مرۆڤێن ئەجنەیان هنگافتی ژ ناڤ گۆڕستانێ هاتنە بەرسینگی. ئەو گەلەك د هار بوون، هەتا كەس نەدشیا د وێرێ را بچیت.
29
ژ نشكەكێ ڤە كرنە گازی و گۆتن: «تە چ ژ مە دڤێت، عیسایێ كوڕێ خودێ؟ ئەرێ تۆ بەری دەمێ دەستنیشانكری هاتی، دا مە ئەشكەنجە بدەی؟»
30
پیچەكێ دویر ژ وان، رەڤدەكا مەزن یا بەرازان دچەری.
31
ئەجنەیان هیڤی ژ عیسای كرن و گۆتنێ: «ئەگەر دێ مە دەرئێخی، مە بهنێرە د ناڤ رەڤدا بەرازان دا.»
32
وی گۆتە وان: «هەڕن». ئەڤجا ئەو دەركەفتن و چوونە د بەرازان دا، ئێكسەر رەڤدە هەمی ژ قونتارا رك بەرەڤ دەریاكێ بەزی و خۆ هاڤێتە د ئاڤێ دا و ژ ناڤ چوو.
33
گاڤان رەڤین و چوونە باژێڕی و هەمی تشتێ ب سەرێ ئەجنە هنگافتیان هاتی، راگەهاند.
34
پاشی وەسا چێبوو هەمی خەلكێ باژێڕی دەركەفتن دا عیسای ببینن و دەمێ وان ئەو دیتی، وان هیڤی ژێ كر كو ژ دەڤەرا وان بچیت.
  1. a. 8‏:2 q گوڕی: نەساخیەكا پیستیە، نەساخ وەكو كەسەكێ هەڕمی دهاتە دیتن. ل فەرهەنگۆكێ بنێڕە.
  2. b. 8‏:5 سەرلەشكەر، د ناڤ لەشكەرێ رۆمایی دا، سەركێشێ سەد سەربازان بوو.
  3. c. 8‏:12 مەبەست پێ ئەون یێن پێدڤیە میراتگرێن پاشایەتیێ بن، ئانكو جوهینە
  4. d. 8‏:12 گڤاشتنا ددانان نیشانە كو ژانا وان كەسان گەلەك یا مەزنە
  5. e. 8‏:17 ئیشایا 53:
  6. f. 8‏:20 ناڤەكە د ناڤ جوهیان دا یێ بەرنیاس بوو، ژ بەر كو د پەرتووكا دانیێل پێغەمبەری دا هەیە دانیێل 7‏:13‏-14. دەمێ عیسای ب كار دئینا، وی بەحسێ خۆ دكر. ل فەرهەنگۆكێ بنێڕە.