عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- عیسای ددەنە دەستێ پیلاتۆسی
- 1
- دەمێ بوویە سپێدە، هەمی سەرۆكێن كاهنان و ریهسپیێن مللەتی پیلانەك ل سەر عیسای دانا، كا دێ چەوا دەنە كوشتن.
- 2
- پاشی ئەو گرێ دا و بر و رادەستی پیلاتۆسێ والی كر.
- خۆكوشتنا یەهودای
- 3
- دەمێ یەهودای، ئەوێ عیسا رادەست كری، دیتی كو عیسا هاتە گونەهباركرن، پەشیمان بوو و ئەو سیهـ زیڤ بۆ سەرۆكێن كاهنان و ریهسپیان ڤەگێڕانەڤە
- 4
- و گۆت: «من گونەهـ كر، دەمێ من خوینەكا بێگونەهـ رادەست كری.» وان بەرسڤ دا: «مە چ ژێیە؟ ئەو د ستۆیێ تە دایە!»
- 5
- ئینا وی زیڤ هاڤێتنە د پەرستگەهێ ڤە، پاشی چوو و خۆ سێدارە دا.
- 6
- سەرۆكێن كاهنان زیڤ هەلگرتن و گۆتن: «نە یا رەوایە بكەینە د گەنجینێ دا، چنكو پارەیێن خوینێنە.»
- 7
- ئەڤجا ئەو رێككەفتن كو ب وی پارەی زەڤیا گلكاری[a] بكڕن، دا بكەنە گۆڕستان بۆ بیانیان.
- 8
- ژ بەر هندێ هەتا ئەڤرۆ دبێژنێ زەڤیا خوینێ.
- 9
- وی دەمی، ئەو پەیڤا ب رێیا یەرمیا پێغەمبەر هاتیە گۆتن، ب جهـ هات: «وان ئەو سیهـ زیڤ برن، كو بهایێ وی بوون، ل دویڤ وی بهایێ ژ لایێ هندەك ژ كوڕێن ئیسرائیلی ڤە بۆ وی هاتیە ڤەبڕین،
- 10
- و ژ پێش بهایێ زەڤیا گلكاری ڤە دان، هەروەكو خودانی فەرمان ل من كری.»[b]
- عیسا ل بەرامبەر پیلاتۆسی
- 11
- ئینا عیسا بەرامبەری والی راوەستیا و والی پرسیار ژێ كر: «ئەرێ تۆ پاشایێ جوهیانی؟» عیسای بەرسڤا وی دا: «تە ب خۆ گۆت.»
- 12
- دەمێ سەرۆكێن كاهنان و ریهسپیان ئەو تاوانبار دكر، وی چ بەرسڤ نەدان.
- 13
- ئەڤجا پیلاتۆسی گۆتە وی: «ما تە گوهـ لێ نینە ئەو یێ چەند شاهدەییان ل دژی تە ددەن؟»
- 14
- عیسای دەربارەی تاوانەكێ ژی بەرسڤا وی نەدا و والی گەلەك حێبەتی بوو.
- دادكرنا عیسای ب مرنێ
- 15
- والی نەریتەك هەبوو، ل جەژنێ گرتیەكی یێ كو خەلك دخوازیت، ئازاد بكەت.
- 16
- وی دەمی گرتیەكێ ناڤدار هەبوو ناڤێ وی باراباس بوو.
- 17
- ئەڤجا دەمێ ئەو كۆم بووین، پیلاتۆسی پرسیار ژ وان كر: «هەوە دڤێت بۆ هەوە كێ ئازاد بكەم: باراباسی یان ژی عیسایێ دبێژنێ مەسیح؟»
- 18
- وی دزانی وان ژ زكڕەشی عیسا رادەستی وی كریە.
- 19
- دەمێ ئەو ل سەر كورسیكا دادوەریێ یێ روینشتی، هەڤژینا وی ئێك هنارتە نك و گۆتێ: «نەكەی چ ل وی مرۆڤێ راستدار بكەی! چنكو ئەڤرۆ د خەونێ دا، ژ بەر وی، من گەلەك ئازار یا دیتی.»
- 20
- لێ سەرۆكێن كاهنان و ریهسپیان جەماوەر هاندا، كو داخوازا ئازادكرنا باراباسی و كوشتنا عیسای بكەن.
- 21
- ئەڤجا پیلاتۆسی گۆتە وان: «هەوە كی ژ هەردوویان دڤێت ئەز بۆ هەوە ئازاد بكەم؟» وان بەرسڤ دا: «باراباسی.»
- 22
- پیلاتۆسی گۆتە وان: «پا ئەز چ ل عیسایێ دبێژنێ مەسیح بكەم؟» هەمیان بەرسڤ دا: «بلا بهێتە خاچدان!»
- 23
- والی گۆت: «ما ئەڤی چ خرابی كریە؟» ئینا قێڕیێن وان بلندتر لێ هاتن: «بلا بهێتە خاچدان!»
- 24
- دەمێ پیلاتۆسی دیتی چ مفا نینە، لێ تێكدان دێ پەیدا بیت، ئاڤ ئینا و ل بەرامبەر جەماوەری دەستێن خۆ شویشتن و گۆت: «ئەز ژ خوینا ڤی مرۆڤی یێ بێگونەهم، ئەو ل ستۆیێ هەوەیە!»
- 25
- خەلكێ هەمیێ بەرسڤ دا: «بلا خوینا وی ل سەر ستۆیێ مە و زاڕۆكێن مە بیت!»
- 26
- وی دەمی باراباس بۆ وان ئازاد كر، لێ عیسا قامچی دا، پاشی رادەستی وان كر داكو بهێتە خاچدان.
- سەرباز تڕانەیان ب عیسای دكەن
- 27
- هنگی سەربازێن والی عیسا برە د كۆچكا والی ڤە و هەمی بەتالیون[c] ل وی كۆم كر.
- 28
- ئەو رویس كر و كوركەكێ سۆر كرە بەر
- 29
- و تانجەك ژ ستریان ڤەهاند و دانا سەر سەرێ وی، لەڤەنەك ژی كرە د دەستێ وی یێ راستێ دا و ل بەر سینگێ وی چۆكڤەدان و تڕانە پێ كرن و گۆت: «بژی پاشایێ جوهیان!»
- 30
- و وان تف كرێ و لەڤەن ژێ ستاند و ل سەرێ وی ددا.
- 31
- پشتی تڕانە پێ كرین، كورك ژ بەر كر و جلكێن وی كرنە بەر و بۆ خاچدانێ بر.
- خاچدانا عیسای
- 32
- دەمێ ئەو دەردكەفتن، وان زەڵامەكێ قەیرەوانی دیت، ناڤێ وی شەمعون بوو، وان ئەو نەچار كر كو خاچا عیسای هەلگریت.
- 33
- دەمێ ئەو گەهشتینە وی جهێ دبێژنێ گۆلگۆتە (كو رامانا وی كلۆخە)
- 34
- شەرابەكا تێكهەل ل گەل زەرداڤێ[d] دانە عیسای، دا ڤەخۆت، لێ دەمێ تام كریێ رازی نەبوو ڤەخۆت.
- 35
- پشتی ئەو خاچ دای، پشك هاڤێتە جلكێن وی و ل خۆ لێكڤەكرن
- 36
- و ل وێرێ روینشتن و زێرەڤانی ل وی دكر.
- 37
- تاوانا وی ل هنداڤ سەرێ وی هەلاویست، كو هاتبوو نڤیسین: «ئەڤە عیسایە، پاشایێ جوهیان.»
- 38
- هنگی ل گەل وی دوو قاچاخ ل خاچێ دان، ئێك ل لایێ وی یێ راستێ و یێ دی ل لایێ وی یێ چەپێ.
- 39
- یێن كو د وێرێ را دهاتن و دچوون ئەو كرێت دكر و سەرێ خۆ لێ دهەژاند
- 40
- و دگۆت: «هەی ئەوێ دا پەرستگەهێ د سێ رۆژان دا هەڕفینیت و ئاڤا كەتەڤە، خۆ قورتال بكە! ئەگەر تۆ كوڕێ خودێی ژ خاچێ وەرە خوار!»
- 41
- هەروەسا سەرۆكێن كاهنان ل گەل مامۆستایێن دەستووری و ریهسپیان ژی تڕانە پێ دكرن و دگۆتن:
- 42
- «هندەكێن دی قورتال كرن، لێ نەشێت خۆ قورتال بكەت! پاشایێ ئیسرائیلێیە ژی! بلا نوكە ژ خاچێ بهێتە خوارێ، دێ باوەریێ پێ ئینین.
- 43
- خۆ ب هیڤیا خودێ ڤە هێلا، ئەگەر خودێ ئەو بڤێت، بلا نوكە وی قورتال بكەت، چنكو وی گۆتبوو: ‹ئەز كوڕێ خودێمە!›»
- 44
- و ئەو قاچاخێن ل گەل وی هاتینە خاچدان ژی وەسا ئەو فهێت دكر.
- مرنا عیسای
- 45
- ژ دەمژمێر دوازدەی نیڤرۆ تا دەمژمێر سێ، تاریاتیێ هەمی ئەرد گرت.
- 46
- ل دۆرێن دەمژمێر سێ، عیسای ب دەنگەكێ بلند كرە هەوار: «ئێلی، ئێلی، لەما ساباختانی؟» ئانكو: «خودایێ من، خودایێ من، بۆچی تە ئەز هێلام؟»[e]
- 47
- هندەك ژ ئامادەبوویان گوهـ ل وی بوو و گۆتن: «ئەو یێ گازی ئلیاسی دكەت!»
- 48
- دەملدەست ئێك ژ وان كرە غار و ئیسفەنجەك د سهكێ[f] هەلاند و دانا سەر لەڤەنەكی و گەهاندە وی، دا ڤەخۆت.
- 49
- لێ ئەوێن دی گۆت: «بهێلە دا ببینین كا دێ ئلیاس هێت وی قورتال كەت؟»
- 50
- عیسای جارەكا دی ب دەنگەكێ بلند كرە هەوار و گیانێ خۆ ژ دەست دا.
- 51
- ئها وێ گاڤێ پەردەیا پەرستگەهێ ژ سەری تا بنی شەق بوو و بوو دوو پارچە و ئەرد هەژیا و كەڤر كەلشین
- 52
- و گۆڕ ڤەبوون و گەلەك كەسێن پیرۆز یێن مری، رابوون.
- 53
- ئەو ژ گۆڕان دەركەفتن و پشتی رابوونا عیسای، چوونە د باژێڕێ پیرۆز ڤە و بۆ گەلەكان دیار بوون.
- 54
- دەمێ سەرلەشكەری و ئەوێن د گەل دا زێرەڤانیا عیسای دكر، ئەو بیڤەلەرز و هەمی تشتێن رویدای دیتین، ترسەكا مەزن گرتن و گۆتن: «ب راستی، ئەڤە كوڕێ خودێ بوو.»
- 55
- گەلەك ژنك ل وێرێ بوون، ژ دویر ڤە بەرێ خۆ ددایێ، ئەو ژ جەلیلێ ب دویڤ عیسای كەفتبوون و خزمەتا وی دكر.
- 56
- د ناڤ وان دا مەریەما مەجدەلی و مەریەما دایكا یەعقوب و یوسڤی و دایكا كوڕێن زەبەدی بوون.
- ڤەشارتنا تەرمێ عیسای
- 57
- دەمێ بوویە ئێڤار، زەڵامەكێ دەولەمەند ژ باژێڕێ رامە هات، ناڤێ وی یوسڤ بوو، ئەو ژی شاگردێ عیسای بوو.
- 58
- ئەو چوو نك پیلاتۆسی و داخوازا تەرمێ عیسای ژێ كر. ئینا پیلاتۆسی فەرمان دا، كو تەرمی بدەنێ.
- 59
- یوسڤی تەرم بر و ب كتانەكێ پاقژ كفن كر
- 60
- و دانا د گۆڕێ[g] خۆ یێ نوی، یێ د كەڤری كۆلای دا. پاشی بەرەكێ مەزن گڕێل كرە بەر دەرێ گۆڕی و چوو.
- 61
- مەریەما مەجدەلی و مەریەما دی ل وێرێ بوون، بەرامبەری گۆڕی د روینشتی بوون.
- زێرەڤانیكرن ل گۆڕی
- 62
- رۆژا پاشتر، كو پشتی رۆژا ئامادەكرنێ[h] ژی بوو، سەرۆكێن كاهنان و فەریسی پێكڤە چوونە نك پیلاتۆسی
- 63
- و گۆتن: «ئەزبەنی، بیرا مە هات، وی خاپینۆكی ب ساخیا خۆ گۆتبوو: ‹ئەز دێ پشتی سێ رۆژان رابم.›
- 64
- ئەڤجا فەرمانێ بدە، داكو هەتا رۆژا سێیێ گۆڕ بهێتە پاراستن، نەوەكو شاگردێن وی بهێن و بدزن و بێژنە مللەتی: ‹ئەو یێ ژ ناڤ مریان رابووی.› هنگی خاپاندنا دویماهیێ دێ ژ یا ئێكێ خرابتر بیت.»
- 65
- پیلاتۆسی بەرسڤا وان دا: «ئەڤە زێرەڤان یێ ل بن فەرمانا هەوە. هەڕن و وەكو هوین دزانن وەسا گۆڕی بپارێزن.»
- 66
- ئەڤجا ل گەل كۆما سەربازان چوون و بەر موهر كر و زێرەڤان دانانە بەر گۆڕی.
- a. 27:7
q گلكار: ئەو كەسە یێ كارێ چێكرنا (دەن، گۆسك، جەڕ و.. هتد) دكەت. - b. 27:10 زەكەریا 11:12-13؛ یەرمیا 32:6-9
- c. 27:27
q بەتالیون: ئانكو فەوج - d. 27:34
q زەرداڤ: ئاڤەكا زەر و تەحلە یا د زراڤی دا ل بن مێلاكێ. ژ بۆ كێمكرنا ئێشانێ دهاتە بكارئینان. - e. 27:46 زەبوور 22:1
- f. 27:48
q سهك: ب عەرەبی ‹خەل› - g. 27:60 ل فەرهەنگۆكێ بنێڕە گۆڕ*.
- h. 27:62 خۆ ئامادەكرن بۆ رۆژا شەمبیێ. ل فەرهەنگۆكێ بنێڕە رۆژا ئامادەكرنێ*.
