عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- ل بێت‌عەنیا مەریەم گولاڤێ ب پێیێن عیسای دا دكەت
- 1
- بەری جەژنا دەربازبوونێ ب شەش رۆژان، عیسا هاتە بێت‌عەنیا، كو لەعازەر، ئەوێ عیسای ئەو ژ ناڤ مریان راكری، ئاكنجیێ وێرێ بوو.
- 2
- ل وێرێ شیڤەك بۆ وی چێكر و مەرتایێ خزمەت دكر، لەعازەر ژی ئێك ژ وان بوو یێن ل گەل وی روینشتی.
- 3
- مەریەمێ لیترەك[a] ژ روینێ بێهنخۆش یێ بهاگران ژ جۆرێ ناردینا خۆڕستی هەلگرت و پێیێن عیسای پێ ڤەمالین و ب پرچا خۆ پێیێن وی زوها كرن. مال ژ بێهنا خۆش تژی بوو.
- 4
- ئینا ئێك ژ شاگردێن وی، كو یەهودایێ ئەسخەریوتی بوو، ئەوێ دێ پاشی بێبەختیێ لێ كەت، گۆت:
- 5
- «بۆچی ئەڤ گولاڤە ب سێ سەد دیناران[b] نەهاتە فرۆتن و بهایێ وێ دابا هەژاران؟»
- 6
- وی ئەڤ چەندە گۆت، نە چنكو دلێ وی ب هەژاران ڤە بوو، لێ چنكو ئەو دز بوو، ئەو بەرپرسێ سندوقكا پارەیان بوو و وی ژ پارەیێ دهاتە تێدا، ددزی.
- 7
- ئەڤجا عیسای گۆت: «بهێلە، وێ ئەڤ گولاڤە بۆ رۆژا ڤەشارتنا من یا ل نك خۆ هەلگرتی.
- 8
- هەژار هەمی دەمان یێن ل نك هەوە هەین، لێ ئەز هەمی دەمان ل نك هەوە نابم.»
- پیلانا كوشتنا لەعازەری
- 9
- دەمێ جەماوەرەكێ مەزن ژ جوهیان زانی كو ئەو یێ ل وێرێ، ئەو هاتن، نە ب تنێ ژ بەر عیسای، لێ دا لەعازەرێ ژی، ئەوێ ژ ناڤ مریان راكری، ببینن.
- 10
- ئەڤجا سەرۆكێن كاهنان پیلان دانا كو لەعازەری ژی بكوژن،
- 11
- چنكو گەلەك ژ جوهیان ژ بەر وی دچوون و باوەری ب عیسای دئینا.
- عیسا ب رێزگرتن دچیتە د ئورشەلیمێ ڤە
- 12
- ل رۆژا پاشتر، ئەو جەماوەرێ زۆر یێ هاتیە جەژنێ، بهیست كو عیسا دێ هێتە ئورشەلیمێ.
- 13
- ئینا ئەوان چەقێن دارقەسپێ هەلگرتن و دەركەفتنە پێشوازیا وی و كرنە هەوار:
«هۆساننا! ‹یێ بەرەكەتدارە ئەوێ ب ناڤێ خودانی دهێت!›[c]
پاشایێ ئیسرائیلێ یێ بەرەكەتدارە!» - 14
- عیسای جانەكەرەك دیت و لێ سیار بوو، هەروەكو هاتیە نڤیسین:
- 15
- «نەترسە سییۆنا كچ[d] ،
ئها ئەڤە پاشایێ تە یێ دهێت،
ل جانەكەرەكی یێ سیارە.»[e] - 16
- (ل دەستپێكێ شاگردێن وی د ڤان تشتان نەگەهشتن، لێ دەمێ عیسا هاتیە مەزنكرن، بیرا وان هات كو ئەڤ تشتە دەربارەی وی یێن هاتینە نڤیسین و وان ژ بۆ وی ئەڤ تشتە كر.)
- 17
- ئەو جەماوەرێ ل گەل وی، دەمێ وی گازی لەعازەری كری كو ژ گۆڕی دەركەڤیت و ئەو ژ ناڤ مریان راكری، شاهدەیی ل سەر ڤێ چەندێ ددا.
- 18
- لەوما خەلك چوو پێشوازیا وی، چنكو وان بهیستبوو كو وی ئەو نیشان یا كری.
- 19
- ئەڤجا فەریسیان گۆتە ئێكودوو: «هوین دبینن، تشتەك ژ دەستێ مە ناهێت! ئەڤە هەمی جیهان ب دویڤ وی كەفت!»
- هندەك یونانی ل عیسای دگەڕیێن
- 20
- د ناڤ وان دا یێن سەركەفتینە ئورشەلیمێ، دا د جەژنێ دا پەرستنێ بكەن، هندەكێن یونانی هەبوون.
- 21
- ئەو هاتنە نك فیلیپۆسێ خەلكێ بێت‌سایدایا دەڤەرا جەلیلێ و گۆتێ: «ئەزبەنی، مە دڤێت عیسای ببینین.»
- 22
- فیلیپۆس چوو و گۆتە ئەندراوسی، پاشی ئەندراوس و فیلیپۆس چوون و گۆتنە عیسای.
- 23
- عیسای بەرسڤا وان دا و گۆت: «دەم هات كو كوڕێ مرۆڤ[f] بهێتە مەزنكرن.
- 24
- ب راستی ب راستی دبێژمە هەوە: ئەگەر دندكا گەنمی نەكەڤیتە د ناڤ ئەردی دا و نەمریت، دێ مینیتە ب تنێ، لێ ئەگەر مر، دێ گەلەك بەرهەمی دەت.
- 25
- هەر كەسێ حەز ژ ژیانا خۆ بكەت، دێ وێ ژ دەست دەت و هەر كەسێ كەرب ژ ژیانا خۆ ل ڤێ جیهانێ ڤەببن، دێ وێ بۆ ژیانا هەروهەر هەلگریت.
- 26
- هەر كەسێ بڤێت خزمەتا من بكەت، بلا ب دویڤ من بكەڤیت، ئەز ل كیرێ بم، خزمەتكارێ من ژی دێ ل وێرێ بیت. هەر كەسێ خزمەتا من بكەت، باب دێ رێزێ ل وی گریت.
- عیسا بەحسێ مرنا خۆ دكەت
- 27
- نوكە گەلەكێ دلتەنگم. ئەز چ بێژم؟ ‹باب، من ژ ڤێ دەمژمێرێ[g] قورتال بكە›؟ نەخێر! ژ بەر ڤێ ئەگەرێ ئەز یێ گەهشتیمە ڤێ دەمژمێرێ.
- 28
- باب، ناڤێ خۆ مەزن بكە!» پاشی دەنگەكی ژ ئەسمانی بەرسڤ دا: «من یێ مەزن كری و دێ هێشتا مەزن كەم.»
- 29
- ئەو جەماوەرێ ل وێرێ یێ راوەستیای و ئەو بهیستی گۆت: «گڕگڕا عەوران بوو!» هندەكێن دی گۆت: «فریشتەیەك ل گەل وی ئاخفت!»
- 30
- عیسای بەرسڤ دا و گۆت: «ئەڤ دەنگە نە ژ بەر من چێبوو، لێ ژ بەر هەوە.
- 31
- نوكە دەمێ دادكرنێیە ل سەر ڤێ جیهانێ، نوكە سەرۆكێ ڤێ جیهانێ[h] دێ بۆ ژ دەرڤە هێتە دەرئێخستن.
- 32
- دەمێ ئەز ژ ئەردی هاتمە بلندكرن، دێ هەمی مرۆڤان بۆ خۆ راكێشم.»
- 33
- ب ڤێ گۆتنێ ئەوی ئاماژە دكر كا دێ ب مرنەكا چەوا مریت.
- 34
- ئینا جەماوەری بەرسڤا وی دا: «مە ژ دەستووری یا بهیستی كو مەسیح دێ هەتا هەتایێ مینیت. ئەڤجا چەوا تۆ دبێژی كو پێدڤیە كوڕێ مرۆڤ بهێتە بلند كرن؟ ئەڤ كوڕێ مرۆڤ كیە؟»
- 35
- عیسای گۆتە وان: «رۆناهی بۆ دەمەكێ دی ژی یێ كورت دێ ل گەل هەوە مینیت. ئەڤجا هندی رۆناهی ل گەل هەوەیە بڕێڤە هەڕن، نەكو تاری ب سەر هەوە دا بهێت. ئەوێ ل تاریاتیێ بڕێڤە دچیت، ئەو نزانیت كیڤە دچیت.
- 36
- هندی رۆناهی ل گەل هەوەیە، باوەریێ ب رۆناهیێ بینن، دا ببنە كوڕێن رۆناهیێ.»
پشتی عیسای ئەڤ چەندە گۆتی، چوو و خۆ ژ وان ڤەشارت. - بێباوەریا خەلكی
- 37
- سەرەڕای كو وی ل بەرامبەری وان ئەڤ هەمی نیشانە كرن، وان باوەری ب وی نەئینا،
- 38
- دا گۆتنا ئیشایا پێغەمبەری ب جهـ بهێت:
«خودان، كێ باوەر ژ پەیاما مە كر؟
زەندێ خودانی[i] بۆ كێ دیار بوو؟»[j] - 39
- لەوما ئەو نەشیان باوەریێ بینن، چنكو ئیشایای ئەڤە ژی یا گۆتی:
- 40
- «وی چاڤێن وان كۆرە كرینە و مەژیێ وان هشك كریە،
دا ب چاڤێن خۆ نەبینن و ب مەژیێ خۆ تێنەگەهن
و بۆ من ڤەنەگەڕن، دا ئەز وان ساخ بكەم.»[k] - 41
- ئیشایای ئەڤ چەندە گۆت، چنكو مەزناهیا مەسیحی دیت و بەحسێ وی كر.
- 42
- سەرەڕای وێ چەندێ ژی گەلەك ژ سەرۆكێن جوهیان ژی باوەری ب عیسای ئینا، لێ وان ژ بەر فەریسیان دانپێدان نەكر، دا ژ كنیشتەیێ نەهێنە دەرئێخستن،
- 43
- چنكو وان حەز ژ وێ مەزناهیێ كر یا ژ نك مرۆڤان دهێت، پتر ژ وێ مەزناهیێ یا ژ نك خودێ دهێت.
- گۆتنێن عیسای ل رۆژا دویماهیێ دادكرنێ دكەن
- 44
- ئینا عیسای ب دەنگەكێ بلند گۆت: «هەر كەسێ باوەریێ ب من بینیت، ئەو باوەریێ ب وی دئینیت یێ ئەز هنارتیم، نە ب من
- 45
- و هەر كەسێ من دبینیت، وی دبینیت یێ ئەز هنارتیم.
- 46
- ئەز وەكو رۆناهی هاتیمە جیهانێ، دا هەر كەسێ باوەریێ ب من بینیت، د تاریاتیێ دا نەمینیت.
- 47
- ئەگەر ئێكی گۆتنا من بهیست و ب جهـ نەئینا، ئەز وی داد ناكەم، چنكو ئەز نەهاتیمە جیهانێ داد بكەم، لێ جیهانێ قورتال بكەم.
- 48
- ئەوێ من رەت بكەت و گۆتنێن من قەبیل نەكەت، ئێك یێ هەی وی داد بكەت، ئەو گۆتنا من گۆتی، دێ ل رۆژا دویماهیێ وی داد كەت.
- 49
- چنكو ئەز ژ نك خۆ نە ئاخفتیمە، لێ ئەو بابێ ئەز هنارتیم، وی فەرمانا ل من كری كا دێ چ بێژم و چ ئاخڤم.
- 50
- ئەز دزانم فەرمانا وی ژیانا هەروهەرە. ئەڤجا ئەو ئاخفتنا ئەز دبێژم، ئەز وەسا دبێژم هەروەكو بابی گۆتیە من.»
- a. 12:3 لیترەكا رۆمایی یا وی سەردەمی، نێزیكی 325 گرامێن ئەڤرۆنە.
- b. 12:5 ل وی سەردەمی هەر دینارەك، كرێیا رۆژەكێ یا پالەی بوو.
- c. 12:13
q هۆساننا: د زمانێ عیبرانی دا ب رامانا ‹مە رزگار بكە› دهێت. زەبوور 118:25-26 - d. 12:15
q سییۆنا كچ: ئانكو ئورشەلیم. ل فەرهەنگۆكێ بنێڕە سییۆن*. - e. 12:15 زەكەریا 9:9
- f. 12:23 ل فەرهەنگۆكێ بنێڕە.
- g. 12:27
q ڤێ دەمژمێرێ: دەمێ ئازاركێشان و مرنا وی ل سەر خاچێ. - h. 12:31 مەبەست پێ ئبلیسە. بنێڕە 14:30
- i. 12:38 ئانكو هێزا خودێ.
- j. 12:38 ئیشایا 53:1
- k. 12:40 ئیشایا 6:10
