عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- مەسیح پەیڤا خودێیە
- 1
- ل دەستپێكێ پەیڤ هەبوو. پەیڤ ل گەل خودێ بوو و پەیڤ خودێ بوو.
- 2
- ئەو ل دەستپێكێ ل گەل خودێ بوو.
- 3
- ب وی هەمی تشت چێبوون، تشتەك ژ ئەوێن چێبووین بێی وی چێنەبوویە.
- 4
- ژیان د وی دا بوو[a] و ئەو ژیان بۆ مرۆڤان رۆناهی بوو.
- 5
- رۆناهی د تاریاتیێ دا شەوقێ ددەت و تاری ب سەر رۆناهیێ نەكەفت[b] .
- 6
- مرۆڤەك هات، خودێ ئەو هنارت بوو، ناڤێ وی یوحەننا بوو.
- 7
- ئەڤە بۆ شاهدەییێ هاتبوو، دا شاهدەییێ بۆ رۆناهیێ بدەت، دا هەمی ب رێیا وی باوەریێ بینن.
- 8
- ئەو ب خۆ نە رۆناهی بوو، لێ ئەو هات دا شاهدەییێ بۆ رۆناهیێ بدەت.
- 9
- رۆناهیا راستەقینە، ئەوا هەمی مرۆڤان روهن دكەت، دهاتە جیهانێ.[c]
- 10
- ئەو[d] ل جیهانێ بوو و جیهان ب وی چێبوو، لێ جیهانێ ئەو نەنیاسی.
- 11
- ئەو هاتە سەر ملكێ خۆ و خەلكێ وی ئەو قەبیل نەكر،
- 12
- لێ هەمی ئەوێن ئەو قەبیل كری، ئانكو باوەری ب ناڤێ وی ئینای، ماف دا وان كو ببنە زاڕۆكێن خودێ،
- 13
- ئەوێن نە ژ خوینێ[e] و نە ژ حەزا لەشی و نە ب بڕیارا زەڵامەكی بووین، لێ ئەوێن ژ خودێ بووین.
- 14
- پەیڤ ژی بوو لەش و د ناڤ مە دا ئاكنجی بوو، ئەو یێ پڕی كەرەم و راستی بوو. مە مەزناهیا وی دیت، مەزناهیا كوڕێ ئێكانەیێ بابی.
- 15
- یوحەننای بۆ وی شاهدەیی دا و كرە گازی و گۆت: «ئەڤەیە ئەوێ من دەربارەی وی گۆتی: ئەوێ پشتی من دهێت ب پێش من كەفت، چنكو ئەو بەری من هەبوو.»
- 16
- ژ پڕبوونا وی مە هەمیان كەرەم ل سەر كەرەمێ وەرگرت.
- 17
- دەستوور ب رێكا مووسای هاتبوو دان، كەرەم و راستی ب رێكا عیسایێ مەسیح هاتن.
- 18
- كەسێ چ جاران خودێ نەدیتیە، لێ كوڕێ ئێكانە، كو ئەو ب خۆ ژی خودێیە، ئەوێ د هەمبێزا بابی دا، ئەوی خودێ یێ دایە نیاسین.
- شاهدەییا یوحەننایێ تافیركەر
- 19
- ئەڤە شاهدەییا یوحەننایە، دەمێ جوهیان[f] هندەك كاهن و لێڤی[g] ژ ئورشەلیمێ هنارتین، دا پرسیارێ ژێ بكەن: «تۆ كی؟»
- 20
- ئینا دانپێدان كر و ماندەل[h] نەكر و گۆت: «ئەز نە مەسیحم[i] .»
- 21
- وان پرسیار ژێ كر: «پا تۆ كی؟ تۆ ئلیاسی؟» وی گۆت: «ئەز نە ئەوم.» «ما تۆ ئەو پێغەمبەری[j] ؟» بەرسڤ دا: «نەخێر.»
- 22
- ئینا وان گۆتێ: «تۆ كی، دا بەرسڤێ بدەینە وان ئەوێن ئەم هنارتین؟ تۆ دەربارەی خۆ چ دبێژی؟»
- 23
- گۆت: «ئەز دەنگەكم ل چۆلی گازی دكەت: ‹رێكێ بۆ هاتنا خودانی راست بكەن،›[k] هەروەكو ئیشایا پێغەمبەر گۆتی.»
- 24
- ئەوێن هاتینە هنارتن، ژ فەریسیان بوون.
- 25
- وان پرسیار ژێ كر و گۆتێ: «ئەگەر تۆ نە مەسیح بی و نە ئلیاس بی و نە ئەو پێغەمبەر بی، پا تۆ بۆچی تافیركرنێ[l] دكەی؟»
- 26
- یوحەننای بەرسڤ دا: «ئەز ب ئاڤێ تافیركرنێ دكەم، لێ ئێك یێ د ناڤ هەوە دا ئامادەیە، هوین وی نانیاسن،
- 27
- ئەوە یێ پشتی من دهێت كو ئەز نە یێ هەژیمە بەندكێن پێلاڤا وی ڤەكەم.»
- 28
- ئەڤێ چەندێ ل بێت‌عەنیا روی دا، ل لایێ دی یێ رویبارێ ئوردن[m] ، ل جهێ یوحەننای تافیركرن دكر.
- عیسا بەرخێ خودێیە
- 29
- ل رۆژا د دویڤ دا، یوحەننای دیت عیسا یێ بەرەڤ وی ڤە دهێت، ئینا گۆت: «ئەڤەیە بەرخێ خودێ[n] ئەوێ گونەها جیهانێ رادكەت.
- 30
- ئەڤەیە ئەوێ من دەربارەی وی گۆتی: كەسەك پشتی من دهێت، یێ ب پێش من كەفتی، چنكو ئەو بەری من هەبوو.
- 31
- من ئەو نەدنیاسی، لێ ئەز هاتم ب ئاڤێ تافیركرنێ بكەم، دا ئەو بۆ ئیسرائیلێ بهێتە دیاركرن.»
- 32
- هنگی یوحەننای شاهدەیی دا و گۆت: «من گیان[o] دیت وەكو كووترەكێ ژ ئەسمانی دهاتە خوار و ل سەر وی دادا و ما.
- 33
- من ئەو نەدنیاسی، لێ ئەڤێ ئەز هنارتیم ب ئاڤێ تافیركرنێ بكەم گۆتە من: ‹ئەوێ تۆ دبینی، گیان دهێتە خوارێ و ل سەر وی داددەت و دمینیت، ئها ئەوە یێ ب گیانێ پیرۆز تافیركرنێ دكەت.›
- 34
- من ژی دیت و شاهدەیی دا، كو ئەڤەیە كوڕێ خودێ.»
- شاگردێن ئێكەمین
- 35
- ل رۆژا پاشتر، دیسان یوحەننا ل گەل دوو شاگردێن خۆ یێ راوەستیای بوو.
- 36
- وی بەرێ خۆ دا عیسای یێ بڕێڤە دچیت و گۆت: «ئەڤەیە بەرخێ خودێ.»
- 37
- دەمێ هەردوو شاگردان گوهـ ل ئاخفتنا وی بووی، ل دویڤ عیسای چوون.
- 38
- عیسا ل خۆ زڤڕی، دیت كو ئەو یێ ل دویڤ وی دچن، ژ وان پرسی: «هەوە چ دڤێت؟» گۆتن: «رابی،» ئەوا وەرگێڕانا وێ مامۆستا، «تۆ ل كیرێ یێ ئاكنجی؟»
- 39
- ئینا گۆتە وان: «وەرن، هوین دێ بینن.» ئەو چوون و دیت ل كیرێ یێ ئاكنجیە و وێ رۆژێ ل نك وی مان، دەم نێزیكی دەمژمێر چوارێ ئێڤاری بوو.
- 40
- ئەندراوس برایێ شەمعون پەترۆسی، ئێك ژ وان هەردوویان بوو یێن گوهـ ل یوحەننای بووی و ل دویڤ عیسای چووین.
- 41
- ئەو ئێكسەر ل برایێ خۆ شەمعونی گەڕیا و دیت، گۆتێ: «مە ‹مەسیح[p] › دیت» ئەوێ كو وەرگێڕانا وی ‹یێ زەیتكری›[q] یە،
- 42
- ئەو ئینا نك عیسای. عیسای بەرێ خۆ دا شەمعونی و گۆت: «تۆ شەمعونێ كوڕێ یوحەننای، تۆ دێ ب كیفاس[r] هێیە بناڤكرن» كو وەرگێڕانا وێ ‹پەترۆس›ە.
- عیسا داخوازا فیلیپۆس و ناتانائێلی دكەت
- 43
- ل رۆژا د دویڤ دا، عیسای بڕیار دابوو بچیتە جەلیل، ئەو ل فیلیپۆسی گەڕیا و دیت و گۆتێ: «ل دویڤ من وەرە.»
- 44
- فیلیپۆس ژ بێت‌سایدا بوو، باژێڕێ ئەندراوسی و پەترۆسی.
- 45
- پاشی فیلیپۆس ل ناتانائێلی گەڕیا و دیت و گۆتێ: «مە ئەو دیت یێ مووسای د دەستووری دا و پێغەمبەران دەربارەی وی نڤیسی، كو ئەو عیسایێ كوڕێ یوسڤیە، ئەوێ ژ ناسیرە.»
- 46
- ناتانائێلی گۆت: «ما تشتەكێ باش ژ ناسیرە دەردكەڤیت؟» فیلیپۆسی بەرسڤا وی دا: «وەرە و ببینە.»
- 47
- دەمێ عیسای ناتانائێل دیتی یێ بەرەڤ وی ڤە دهێت، دەربارەی وی گۆت: «ئەڤە ئیسرائیلیەكێ رەسەنە، چ سەختەیی تێدا نینە!»
- 48
- ناتانائێلی گۆتێ: «تۆ ژ كیڤە من دنیاسی؟» عیسای بەرسڤا وی دا: «من تۆ ل بن دارهژیرێ دیتی، بەری فیلیپۆس گازی تە بكەت.»
- 49
- ناتانائێلی بەرسڤا وی دا: «رابی[s] ، تۆ كوڕێ خودێی، تۆ پاشایێ ئیسرائیلێی!»
- 50
- عیسای بەرسڤا وی دا و گۆتێ: «چنكو من گۆتە تە، من تۆ ل بن دارهژیرێ دیتی، تە باوەری ئینا؟ تۆ دێ ژ ڤێ مەزنتر بینی.»
- 51
- پاشی گۆتێ: «ب راستی ب راستی دبێژمە هەوە: هوین دێ ئەسمانی بینن یێ ڤەكریە و فریشتەیێن خودێ ل سەر كوڕێ مرۆڤ[t] بلند دبن و دهێنە خوار!»[u]
- a. 1:4 ئانكو: سەرەكانیا ژیانێ ئەو بوو.
- b. 1:5 ل جهێ ‹ب سەر نەكەفت› پەیڤا یونانی رامانەكا دی ژی هەیە: تێنەگەهشت.
- c. 1:9 ‹ئەوێ دهێتە جیهانێ› د ناڤ جوهیان دا وەكو ناسناڤێ مەسیحی ل وی سەردەمی دهاتە ب كار ئینان. ل 6:14، 9:39، 11:27، 16:28 بنێڕە.
- d. 1:10 مەبەست پێ عیسایێ مەسیحە، كو پەیڤ و رۆناهیا خودێیە.
- e. 1:13 دەق و دەق: ‹ژ خوینان›. مەبەست پێ رێكا سرۆشتی یا ژدایكبوونێیە.
- f. 1:19 مەبەست پێ نە هەمی مللەتێ جوهیانە، لێ ب تنێ رێبەرێن وانن.
- g. 1:19
q لێڤی: بابكەكێ جوهیانە، خزمەتكارێن پەرستگەهێ بوون. ل فەرهەنگۆكێ بنێڕە. - h. 1:20
q ماندەل: ئینكار - i. 1:20 ل فەرهەنگۆكێ بنێڕە مەسیح*.
- j. 1:21 ئەو پێغەمبەرێ مووسای گۆتی كو دێ هێت. گۆتارا مووسای 18:15-17؛ یوحەننا 1:45
- k. 1:23 ئیشایا 40:3
- l. 1:25
q تافیركرن: ئانكو ژێرئاڤكرن كو نیشانە بۆ تۆبەكرنێ و پاقژبوونێ ژ گونەهان. ل فەرهەنگۆكێ بنێڕە. - m. 1:28 رویبارێ ئوردن دكەڤیتە رۆژهەلاتێ ئورشەلیمێ و ‹لایێ دی یێ رویبارێ ئوردن› رۆژهەلاتێ رویباریە.
- n. 1:29 دەستپێكرن 22:7-8؛ دەركەفتن 12:3-13؛ ئیشایا 53:7؛ 1 پەترۆس 1:19؛ ئاشكراكرن 5:6-13؛ 7:17؛ 17:14
- o. 1:32
q گیان: ئانكو گیانێ پیرۆز، كو گیانێ خودێیە. ل فەرهەنگۆكێ بنێڕە گیانێ پیرۆز*. - p. 1:41 ب یونانی ‹مەسیا›یە.
- q. 1:41
q زەیتكرن: هێمایە كو خودێ ئەو هەلبژارت و گیانێ پیرۆز رشتە سەر وی. ل فەرهەنگۆكێ بنێڕە. - r. 1:42
q كیفاس: پەیڤەكا ئارامیە ب یونانی دبیتە ‹پەترۆس› ئانكو كەڤر. - s. 1:49 ئانكو مامۆستا. ل یوحەننا 1:38 بنێڕە.
- t. 1:51
q كوڕێ مرۆڤ: ناسناڤێ مەسیحیە. ل فەرهەنگۆكێ بنێڕە. - u. 1:51 ئانكو ئەو وەكو پێستركێیە د ناڤبەرا ئەرد و ئەسمانی دا. دەستپێكرن 28:12
