عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ژ تشتێن هەوە بهیستین ڤاڕێ نەبن 
1
لەوما پێدڤیە ئەم پتر پێگیریێ ب وان تشتان بكەین یێن مە بهیستین، نەكو ژێ ڤاڕێ ببین.
2
چنكو ئەگەر ئەو پەیڤا ب رێكا فریشتەیان هاتیە گۆتن[a] خۆجهـ بوو و هەر زێدەگاڤی و نەگوهداریەكێ سزایێ دادپەروەرانە وەرگرت،
3
ئەگەر ئەم قورتالبوونەكا هندە مەزن پشت گوهـ ڤە بهاڤێژین، دێ مە چ رێكا رەڤێ هەبیت؟ ئەڤ قورتالبوونە ل دەستپێكێ ب رێكا خودانی هاتیە راگەهاندن، پاشی ژ لایێ وان ڤە یێن بهیستی بۆ مە هاتیە سەلماندن،
4
خودێ ژی پشتەڤانیا شاهدەییا وان دكر ب رێكا نیشان و مەندەهۆشی و حنێرێن[b] جۆراوجۆر، هەروەسا ب بەهرەیێن گیانێ پیرۆز[c] یێن ب حەزا خۆ دابەش دكەت.
مەسیح وەكو برایێن خۆ لێ هات 
5
خودێ ئەو جیهانا دێ هێت، ئەوا ئەم بەحسێ وێ دكەین، نەئێخستە د بن فەرمانا فریشتەیان ڤە.
6
لێ د نڤیسارێن پیرۆز دا كەسەكی ل جهەكی شاهدەیی دایە:
«مرۆڤ چیە كو تۆ[d] هزرا وی بكەی،
كوڕێن ئادەمی چنە كو تۆ پویتەی پێ بدەی؟
7
تە ئەو بۆ دەمەكێ كورت ژ فریشتەیان نزمتر دانا،
تانجا مەزناهی و سەربلندیێ كرە سەرێ وی،
8
هەمی تشت ئێخستنە د بن پێیێن وی ڤە.»[e]
ئەڤجا مادەم خودێ هەمی تشت ملكەچی وی كرینە، ئەوی تشتەك نەهێلایە كو ملكەچی وی نەبیت. لێ نوكە ئەم هێشتا نابینین كو هەمی تشت د ملكەچی وی بن.
9
لێ ئەم عیسای دبینین كو بۆ دەمەكێ كورت ژ فریشتەیان نزمتر هاتبوو دانان، نوكە تانجا مەزناهی و سەربلندیێ یا د سەرێ وی، ژ بەر كو وی ئازارا مرنێ كێشا، دا ژ كەرەما خودێ ژ پێخەمەت هەر مرۆڤەكی تام كەتە مرنێ.
10
بەلێ، د جهێ خۆ دا بوو كو خودێ، ئەوێ هەمی تشتان بۆ وی و هەمی تشتان ژ بەر وی هەبوون هەی، دەمێ ڤیای گەلەكان بكەتە كوڕێن خۆ كو بینیتە د مەزناهیا خۆ دا، داهێنەرێ قورتالیا وان ب ئازاران كامل بكەت.
11
چنكو ئەوێ پیرۆزكرنێ دكەت و ئەوێن دهێنە پیرۆزكرن، هەمی ژ ئێك بنیاتن، ژ بەر ڤێ ئەگەرێ ئەو[f] شەرم ناكەت كو بێژیتە وان برا.
12
ئەو دبێژیت:
«ئەز دێ ناڤێ تە بۆ برایێن خۆ راگەهینم،
د ناڤ جڤاتێ دا دێ پەسنا[g] تە كەم.»[h]
13
هەروەسا دبێژیت:
«ئەز دێ پشتا خۆ ب وی گەرم كەم.»[i]
دیسان دبێژیت:
«ئەڤە ئەز و ئەو زاڕۆكێن خودێ داینە من.»[j]
14
ئەڤجا مادەم زاڕۆك خوین و گۆشتن، عیسا ژی ب هەمان تشتان ل گەل وان بوو پشكدار، داكو ب مرنا خۆ وی یێ هێزا مرنێ د دەستی دا، ئانكو ئبلیسی، ژ ناڤ ببەت
15
و ئەوان ئازاد بكەت، یێن د هەمی ژیانا خۆ دا، ژ ترسا مرنێ، ل بن زۆرداریا بەنیاتیێ بوون.
16
بێگۆمان ئەو نەهاتیە دا هاریكاریا فریشتەیان بكەت، لێ دا هاریكاریا دویندەها[k] ئیبراهیمی بكەت.
17
لەوما پێدڤی بوو ئەو د هەمی تشتان دا وەكو برایێن خۆ لێ بهێت، دا د خزمەتكرنا خودێ دا سەرۆككاهنەكێ[l] دلۆڤان و دلسۆز بیت و هۆسا بشێت كەفارەتا گونەهێن گەلی بدەت.
18
ئەو دشێت هاریكاریا وان كەسان بكەت یێن دهێنە تاقیكرن، چنكو ئەوی ب خۆ، دەمێ هاتیە تاقیكرن، ئازار كێشان.
  1. a. 2‏:2 جوهیان باوەری هەبوو كو دەستوورێ مووسای ب رێكا فریشتەیان یێ هاتی. بنێڕە كارێن هنارتیان 7‏:53؛ گالاتیا 3‏:19
  2. b. 2‏:4 q حنێر: ب عەرەبی ‹معجزة›
  3. c. 2‏:4 q بەهرەیێن گیانێ پیرۆز: شیانێن تایبەتن خودێ ددەتە باوەرداران. بنێڕە رۆما 12‏:6‏-8؛ 1 كورنتۆس 12‏:1‏-11
  4. d. 2‏:6 ئەڤە پارچەیەكا زەبوورێیە، تێدا داوود پێغەمبەر ئاخفتنا خۆ ئاراستەی خودێ دكەت.
  5. e. 2‏:8 زەبوور 8‏:4‏-6
  6. f. 2‏:11 مەبەست پێ عیسایێ مەسیحە.
  7. g. 2‏:12 q پەسن: مەدح و سەنا
  8. h. 2‏:12 مەبەست ژ ‹تە› خودێیە. بنێڕە زەبوور 22‏:22
  9. i. 2‏:13 مەبەست ژ ‹وی› خودێیە. ئیشایا 8‏:17
  10. j. 2‏:13 ئیشایا 8‏:18
  11. k. 2‏:16 q دویندەه: نەسل یان زوڕیەت
  12. l. 2‏:17 q كاهن: ئەو كەسە یێ ل نك خودێ مەهدەریێ (ئانكو شفاعەتێ) بۆ خەلكی دكەت. ل فەرهەنگۆكێ بنێڕە كاهن*.