عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
مەسیح پەیڤا خودێ و كوڕێ ویە 
1
د سەردەمێن كەڤن دا خودێ ب گەلەك رێك و گەلەك شێوازان ب رێكا پێغەمبەران ل گەل بابكالێن مە ئاخفت،
2
لێ د ڤان رۆژێن دویماهیێ دا، ب رێكا كوڕێ خۆ ل گەل مە ئاخفت، ئەوێ وی كریە میراتگرێ هەمی تشتان و ئەوێ ب وی گەردوون ئافراندی.
3
ئەو تیڕێژا مەزناهیا خودێیە و دەق و دەق وێنەیێ گەوهەرێ ویە، هەمی تشتێن د گەردوونێ دا ب پەیڤا خۆ یا هێزدار رێك دئێخیت. پشتی وی پاقژكرن بۆ گونەهێن مرۆڤان ئامادە كری، ل دەستێ راستێ یێ مەزناهیێ ل بلنداهیان روینشت.
4
لەوما كا چەند ناڤەكێ بلندتر ژ ناڤێن فریشتەیان ب میراتی وەرگرت، ئەو هند ژ وان پایەبەرزتر لێ هات.
5
چنكو، ما خودێ جارەكێ گۆتیە فریشتەیەكی:
«تۆ كوڕێ منی،
ئەڤرۆ من تۆ بووی»[a] ؟
یان ژی:
«ئەز دێ بمە بابێ وی
و ئەو دێ بیتە كوڕێ من»[b] ؟
6
هەروەسا دەمێ كوڕێ خۆ یێ نەخری دئینیتە جیهانێ، دبێژیت:
«بلا هەمی فریشتەیێن خودێ سوجدێ بۆ ببەن!»[c]
7
دەربارەی فریشتەیان ژی دبێژیت:
«فریشتەیێن خۆ دكەتە با
و خزمەتكارێن خۆ دكەتە گوڕیا ئاگری!»[d]
8
لێ دەربارەی كوڕی دبێژیت:
«تەختێ تە، هەی خودێ، بۆ هەتا هەتایێیە
و سەوڵەجانێ[e] پاشایەتیا تە، سەوڵەجانێ دادپەروەریێیە.
9
تە حەز ژ راستداریێ[f] كر و كەربێن تە ژ خرابیێ ڤەبوون.
لەوما، خودێ، خودایێ تە، تۆ ب زەیتا شادیێ زەیت كری،
هۆسا تۆ ژ هەڤالێن تە بلندتر لێ كری.»[g]
10
هەروەسا دبێژیت:
«هەی خودان، ل دەستپێكێ تە بنیاتێ ئەردی دانا
و ئەسمان چێكریێن دەستێن تەنە.
11
ئەو دێ ژ ناڤ چن، لێ تۆ دێ مینی.
ئەو هەمی وەكو جلكان دێ كەڤن بن،
12
تۆ دێ وان وەكو قاپیتی پێچی
و ئەو دێ وەكو جلكان هێنە گوهۆڕین.
لێ تۆ هەر وەكو خۆی
و ساڵێن تە ب دویماهی ناهێن.»[h]
13
ما خودێ جارەكێ گۆتیە فریشتەیەكی:
«ل دەستێ من یێ راستێ روینە،
تاكو ئەز دوژمنێن تە بكەمە تەختەپێ[i] بۆ پێیێن تە.»[j] ؟
14
ما هەمی فریشتە گیانێن خزمەتكار نینن، ژ پێخەمەت خزمەتكرنا وان دهێنە هنارتن، یێن كو دێ قورتالبوونێ وەكو میرات وەرگرن؟
  1. a. 1‏:5 زەبوور 2‏:7
  2. b. 1‏:5 2 ساموئێل 7‏:14
  3. c. 1‏:6 گۆتارا مووسای 32‏:43؛ زەبوور 97‏:7
  4. d. 1‏:7 زەبوور 104‏:4
  5. e. 1‏:8 q سەوڵەجان: دارەكە یان گۆپالەكێ تایبەتە د دەستێ پاشایان دا، هێمایە بۆ دەستهەلاتداریێ.
  6. f. 1‏:9 راست و دروستیێ
  7. g. 1‏:9 زەبوور 45‏:6‏-7
  8. h. 1‏:12 زەبوور 102‏:25‏-27
  9. i. 1‏:13 q تەختەپێ: ئەو تەختەدارە یێ مرۆڤ بۆ خۆشكرنا جهێ پێیان ددانیتە بن پێیێن خۆ.
  10. j. 1‏:13 زەبوور 110‏:1