عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ژنێكی سامیری 
1
فه‌ریسییه‌كان بیستیان كه‌ عیسا له‌ یه‌حیا زیاتر قوتابی دروستكردووه‌ و له‌ ئاو هه‌ڵكێشاوه‌،
2
هه‌رچه‌نده‌ عیسا خۆی خه‌ڵكی له‌ ئاو هه‌ڵنه‌ده‌كێشا، به‌ڵكو قوتابییه‌كانی.
3
كاتێك عیسا ئه‌مه‌ی زانی[a] یه‌هودیای به‌جێهێشت و گه‌ڕایه‌وه‌ جه‌لیل.
4
جا ده‌بووایه‌ به‌ ناوچه‌ی سامیره‌دا تێبپه‌ڕێت،
5
گه‌یشته‌ شارۆچكه‌یه‌كی سامیره‌ كه‌ ناوی سوخار بوو، نزیك ئه‌و پارچه‌ زه‌وییه‌ی یاقوب دابوویه‌ یوسفی كوڕی.
6
بیری یاقوبیش له‌وێ بوو. جا عیسا له‌ گه‌شته‌كه‌ ماندوو بوو، له‌لای بیره‌كه‌ دانیشت، نزیكه‌ی كاتژمێر دوازده‌[b] بوو.
7
ژنێكی سامیره‌یی هات بۆ ئه‌وه‌ی ئاو ببات، عیسا پێی فه‌رموو: «هه‌ندێك ئاوم بده‌رێ.»
8
له‌و كاته‌دا قوتابییه‌كانی چووبوونه‌ ناو شار تاكو خواردن بكڕن.
9
جا ژنه‌ سامیره‌ییه‌كه‌ پێی گوت: «تۆ جوله‌كه‌یت و منیش ژنێكی سامیره‌ییم، چۆن داوای ئاوم لێ ده‌كه‌یت؟» چونكه‌ جوله‌كه‌كان تێكه‌ڵی سامیره‌ییه‌كان نابن.
10
عیساش وه‌ڵامی دایه‌وه‌: «ئه‌گه‌ر به‌خشینی خودات بزانیایه‌ و هه‌روه‌ها ئه‌وه‌ش كێیه‌ كه‌ پێت ده‌ڵێت ”ئاوم بده‌رێ،“ ئه‌وسا تۆ داوات لێ ده‌كرد و ئه‌ویش ئاوی ژیانی پێده‌دایت.»
11
ژنه‌كه‌ پێی گوت: «به‌ڵام گه‌وره‌م، دۆلكه‌ت پێنییه‌ و بیره‌كه‌ش قووڵه‌. ئیتر تۆ ئاوی ژیانت له‌كوێ بوو؟
12
خۆ له‌ یاقوبی باوكمان گه‌وره‌تر نیت كه‌ بیره‌كه‌ی پێداوین، خۆی و كوڕه‌كانی و ماڵاته‌كانیشی لێیان خواردووه‌ته‌وه‌؟»
13
عیسا وه‌ڵامی دایه‌وه‌: «هه‌ركه‌سێك له‌م ئاوه‌ بخواته‌وه‌ جارێكی دیكه‌ تینووی ده‌بێته‌وه‌.
14
به‌ڵام ئه‌وه‌ی له‌و ئاوه‌ بخواته‌وه‌ كه‌ من ده‌یده‌مێ، هه‌رگیز تینووی نابێت، به‌ڵكو ئه‌و ئاوه‌ی من ده‌یده‌مێ تێیدا ده‌بێته‌ كانیاوێك و هه‌ڵده‌قوڵێت، ژیانی هه‌تاهه‌تایی ده‌به‌خشێ.»
15
ژنه‌كه‌ش پێی گوت: «گه‌وره‌م، ئه‌و ئاوه‌م بده‌رێ تاكو تینوو نه‌بم و نه‌یه‌مه‌وه‌ ئێره‌ بۆ ئاوكێشان.»
16
عیسا پێی فه‌رموو: «بڕۆ، مێرده‌كه‌ت بانگ بكه‌ و وه‌ره‌وه‌ ئێره‌.»
17
ژنه‌كه‌ وه‌ڵامی دایه‌وه‌: «مێردم نییه‌.» عیساش پێی فه‌رموو: «ڕاست ده‌كه‌یت كه‌ ده‌ڵێی مێردم نییه‌.
18
له‌ ڕاستیدا پێنج مێردت هه‌بوو، ئێستاش ئه‌وه‌ی هه‌ته‌ مێردت نییه‌. ئه‌مه‌شت به‌ ڕاستی گوت.»
19
ژنه‌كه‌ پێی گوت: «گه‌وره‌م، ده‌بینم تۆ پێغه‌مبه‌ریت.
20
باوباپیرانمان له‌م شاخه‌دا خودایان په‌رستووه‌، به‌ڵام ئێوه‌ ده‌ڵێن ئۆرشه‌لیم[c] ئه‌و شوێنه‌یه‌ كه‌ پێویسته‌ په‌رستنی لێ بكرێت.»
21
عیسا پێی فه‌رموو: «خانم، باوه‌ڕم پێ بكه‌، كاتێك دێت ئێوه‌ باوك ده‌په‌رستن، به‌ڵام نه‌ له‌سه‌ر ئه‌م شاخه‌ و نه‌ له‌ ئۆرشه‌لیم.
22
ئه‌وه‌ی ئێوه‌ ده‌یپه‌رستن نایناسن، به‌ڵام ئه‌وه‌ی ئێمه‌ ده‌یپه‌رستین ده‌یناسین، چونكه‌ ڕزگاری له‌ جوله‌كه‌وه‌یه‌.
23
به‌ڵام كاتێك دێت ئه‌ویش كه‌ ئێستایه‌ خواپه‌رسته‌ ڕاسته‌قینه‌كان به‌ ڕۆحی پیرۆز و ڕاستی باوك ده‌په‌رستن، چونكه‌ باوك داوای ئه‌م جۆره‌ خواپه‌رستانه‌ ده‌كات.
24
خودا ڕۆحه‌ و پێویسته‌ ئه‌وانه‌ی ده‌یپه‌رستن به‌ ڕۆحی پیرۆز و ڕاستی بیپه‌رستن.»
25
ژنه‌كه‌ پێی گوت: «ده‌زانم مه‌سیا دێت، كه‌ پێی ده‌گوترێ مه‌سیح، كه‌ ئه‌و هات هه‌موو شتێكمان پێ ڕاده‌گه‌یه‌نێت.»
26
عیساش پێی فه‌رموو: «من ئه‌وم، ئه‌وه‌ی قسه‌ت له‌گه‌ڵ ده‌كات.»
27
له‌و كاته‌دا قوتابییه‌كانی گه‌یشتن، سه‌رسام بوون كه‌ له‌گه‌ڵ ژنێك قسه‌ ده‌كات. به‌ڵام كه‌س نه‌یگوت: «چیت ده‌وێت؟» یان «بۆچی قسه‌ی له‌گه‌ڵ ده‌كه‌یت؟»
28
ئینجا ژنه‌كه‌ گۆزه‌كه‌ی به‌جێهێشت، چووه‌ ناو شار و به‌ خه‌ڵكی گوت:
29
«وه‌رن كه‌سێك ببینن هه‌رچییه‌كم كردووه‌ پێی گوتم! ده‌بێ مه‌سیح نه‌بێت؟»
30
ئیتر خه‌ڵكه‌كه‌ له‌ شار هاتنه‌ ده‌ره‌وه‌ و چوونه‌ لای.
31
له‌و كاته‌دا قوتابییه‌كان تكایان لێی ده‌كرد: «ڕابی، بخۆ!»
32
به‌ڵام پێی فه‌رموون: «خواردنێكم هه‌یه‌ بیخۆم، كه‌ ئێوه‌ نایزانن.»
33
له‌به‌ر ئه‌وه‌ قوتابییه‌كان به‌ یه‌كتریان ده‌گوت: «كه‌س هیچی بۆ هێناوه‌ بیخوات؟»
34
عیساش پێی فه‌رموون: «خواردنی من ئه‌وه‌یه‌ به‌ خواستی ئه‌وه‌ بكه‌م كه‌ ناردوومی و كاره‌كه‌ی ته‌واو بكه‌م.
35
ئه‌ی ئێوه‌ ناڵێن: ”پاش چوار مانگ كاتی دروێنه‌ دێت“؟ ئه‌وه‌تا پێتان ده‌ڵێم: چاوتان هه‌ڵبڕن و سه‌یری كێڵگه‌كان بكه‌ن وا زه‌رد هه‌ڵگه‌ڕاون بۆ دروێنه‌.
36
سه‌پانیش كرێ وه‌رده‌گرێت و بۆ ژیانی هه‌تاهه‌تایی به‌رهه‌م كۆده‌كاته‌وه‌، تاكو تۆوچێن و سه‌پان پێكه‌وه‌ دڵشاد بن.
37
له‌به‌ر ئه‌وه‌ ئه‌و په‌نده‌ ڕاسته‌ كه‌ ده‌ڵێت: ”یه‌كێك تۆو ده‌كات و یه‌كێكی دیكه‌ دروێنه‌ ده‌كات.“
38
من ئێوه‌م بۆ دروێنه‌یه‌ك ناردووه‌ كه‌ پێوه‌ی ماندوو نه‌بوون. كه‌سانی دیكه‌ پێوه‌ی ماندوو بوون و ئێوه‌ به‌رهه‌می ماندووبوونیان ده‌خۆن.»
39
زۆر له‌ سامیره‌ییه‌كانی ئه‌و شاره‌ باوه‌ڕیان به‌ عیسا هێنا، له‌به‌ر قسه‌ی ئه‌و ژنه‌ی كه‌ شایه‌تی ده‌دا: «هه‌رچییه‌كم كردووه‌ پێی فه‌رمووم.»
40
له‌به‌ر ئه‌وه‌ كاتێك سامیره‌ییه‌كان هاتنه‌ لای عیسا، تكایان لێكرد له‌لایان بمێنێته‌وه‌، ئه‌ویش دوو ڕۆژ له‌وێ مایه‌وه‌.
41
ژماره‌یه‌كی زۆر زیاتریش به‌هۆی قسه‌كانییه‌وه‌ باوه‌ڕیان هێنا و
42
به‌ ژنه‌كه‌یان ده‌گوت: «چیتر به‌هۆی قسه‌ی تۆوه‌ نییه‌ كه‌ ئێمه‌ باوه‌ڕ ده‌هێنین، چونكه‌ خۆمان بیستمان و ده‌زانین كه‌ ئه‌م پیاوه‌ به‌ڕاستی ڕزگاركه‌ری جیهانه‌!»
چاككردنه‌وه‌ به‌ وشه‌ 
43
پاش ئه‌و دوو ڕۆژه‌ عیسا ئه‌وێی به‌جێهێشت و چوو بۆ جه‌لیل،
44
چونكه‌ عیسا خۆی شایه‌تی دا كه‌ پێغه‌مبه‌ر له‌ شاری خۆی ڕێزی لێ ناگیرێت.
45
له‌به‌ر ئه‌وه‌ كاتێك هاته‌ جه‌لیل، جه‌لیلییه‌كان پێشوازییان لێی كرد، چونكه‌ ئه‌وانیش بۆ جه‌ژن هاتبوون و هه‌موو ئه‌و شتانه‌یان بینیبوو كه‌ له‌ جه‌ژندا[d] له‌ ئۆرشه‌لیم كردبووی.
46
هاته‌وه‌ شارۆچكه‌ی قانا له‌ ناوچه‌ی جه‌لیل كه‌ له‌وێ ئاوی كردبووه‌ شه‌راب، كاربه‌ده‌ستێكی پاشا هه‌بوو، كوڕه‌كه‌ی له‌ كه‌فه‌رناحوم نه‌خۆش بوو.
47
كاتێك ئه‌و بیستی عیسا له‌ یه‌هودیاوه‌ هاتووه‌ته‌ جه‌لیل، چووه‌ لای و لێی پاڕایه‌وه‌ كه‌ بێت بۆ ئه‌وه‌ی كوڕه‌كه‌ی چاك بكاته‌وه‌، چونكه‌ نزیكی مردن بوو.
48
ئینجا عیسا پێی فه‌رموو: «ئه‌گه‌ر ئێوه‌ په‌رجوو و كاری سه‌رسوڕهێنه‌ر نه‌بینن هه‌رگیز باوه‌ڕ ناهێنن.»
49
كاربه‌ده‌سته‌كه‌ش پێی گوت: «گه‌وره‌م، پێش ئه‌وه‌ی كوڕه‌كه‌م بمرێت، وه‌ره‌.»
50
عیسا پێی فه‌رموو: «بڕۆ! كوڕه‌كه‌ت ده‌ژیێت.» پیاوه‌كه‌ باوه‌ڕی به‌و قسه‌یه‌ كرد كه‌ عیسا پێی فه‌رموو و ڕۆیشت.
51
كه‌ به‌ ڕێگاوه‌ بوو كۆیله‌كانی تووشی بوون و ده‌یانگوت كه‌ كوڕه‌كه‌ی زیندووه‌،
52
جا سه‌باره‌ت به‌و كاتژمێره‌ی تێیدا چاكتر ببووه‌وه‌ پرسیاری لێكردن، وه‌ڵامیان دایه‌وه‌: «دوێنێ كاتژمێر یه‌كی[e] پاش نیوه‌ڕۆ تایه‌كه‌ به‌ریدا.»
53
باوكه‌كه‌ زانی له‌و كاتژمێره‌ بوو كه‌ عیسا پێی فه‌رموو: «كوڕه‌كه‌ت ده‌ژیێت.» ئه‌وسا خۆی و خاووخێزانی هه‌موو باوه‌ڕیان هێنا.
54
ئه‌مه‌ش دووه‌م په‌رجوو بوو كه‌ عیسا كردی، كه‌ له‌ یه‌هودیاوه‌ هاته‌ جه‌لیل.
  1. a. 4‏:3 له‌ زمانی یۆنانی ڕێكخستنی وشه‌كان جیاوازه‌، به‌ڵام بۆ ئاسانی له‌ تێگه‌یشتنی به‌م شێوه‌یه‌ دانراوه‌.
  2. b. 4‏:6 یۆنانی: كاتژمێری شه‌شه‌م.
  3. c. 4‏:20 مه‌به‌ستی له‌ په‌رستگایه‌ كه‌ له‌ ئۆرشه‌لیمه‌.
  4. d. 4‏:45 مه‌به‌ست له‌ جه‌ژنی په‌سخه‌یه‌، جوله‌كه‌كانی هه‌موو جیهان بۆ به‌شدار بوون له‌و جه‌ژنه‌ ده‌هاتنه‌ ئۆرشه‌لیم. هه‌روه‌ها \+xt یۆحه‌نا 2‏:23‏\+xt*‏.
  5. e. 4‏:52 یۆنانی: كاتژمێری حه‌وت.