عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ته‌مبێكردن له‌ خودای باوكه‌وه‌ 
1
له‌به‌ر ئه‌وه‌، چونكه‌ ئێمه‌ به‌ هه‌ورێكی شایه‌تیده‌ری ئاوا گه‌وره‌ ده‌وره‌ دراوین، با هه‌موو بارگرانییه‌ك و ئه‌و گوناهانه‌ی كه‌ به‌ ئاسانی لێمان ده‌ئاڵێت له‌ خۆمانی دوور بخه‌ینه‌وه‌ و به‌ دانبه‌خۆداگرتنه‌وه‌ له‌و پێشبڕكێیه‌ ڕابكه‌ین كه‌ له‌پێشمانه‌ دانراوه‌.
2
با سه‌رنجمان بخه‌ینه‌ سه‌ر عیسا، پێشڕه‌و و ته‌واوكاری باوه‌ڕمان، ئه‌وه‌ی له‌ پێناوی ئه‌و خۆشییه‌ی له‌پێشی دانرابوو، به‌رگه‌ی خاچی گرت و شه‌رمه‌زاری به‌ سووك وه‌رگرت، جا له‌ ده‌سته‌ڕاستی ته‌ختی خودا دانیشت.
3
با بیر بكه‌نه‌وه‌ له‌وه‌ی كه‌ دانی به‌خۆیدا گرت به‌رامبه‌ر ئه‌و دژایه‌تییه‌ی كه‌ گوناهباران له‌گه‌ڵیان كرد، تاكو شه‌كه‌ت نه‌بن و وره‌ به‌رنه‌ده‌ن.
4
له‌ خه‌باتی ئێوه‌ له‌ دژی گوناه هه‌تا ئاستی خوێن ڕشتن به‌رگریتان نه‌كردووه‌.
5
ئایا ئێوه‌ به‌ ته‌واوی ئه‌و په‌یامه‌ی هاندانتان له‌بیر چووه‌وه‌ كه‌ وه‌ك ڕۆڵه‌ له‌گه‌ڵتان ده‌دوێت؟ په‌یامه‌كه‌ ده‌ڵێت:
{ڕۆڵه‌كه‌م، به‌ سووكی ته‌ماشای ته‌مبێكردنی یه‌زدان مه‌كه‌،
هه‌روه‌ها كاتێك سه‌رزه‌نشتت ده‌كات وره‌ به‌رمه‌ده‌،
6
چونكه‌ ئه‌وه‌ی یه‌زدان خۆشیبووێ ته‌مبێی ده‌كات،
هه‌روه‌ها هه‌ر یه‌كێك وه‌ك ڕۆڵه‌ی خۆی وه‌ریگرێت، به‌ گۆچان لێی ده‌دات.}[a]
7
كه‌واته‌ به‌رگه‌ی ته‌مبێكردن بگرن، خوداش وه‌ك ڕۆڵه‌ی خۆی له‌گه‌ڵتان ده‌جوڵێته‌وه‌. چ ڕۆڵه‌یه‌ك هه‌یه‌ باوكی ته‌مبێی نه‌كات؟
8
ئه‌گه‌ر بێتو خودا ته‌مبێتان نه‌كات وه‌ك هه‌موو منداڵه‌كانی دیكه‌ی، ئه‌مه‌ ئه‌وه‌ ده‌گه‌یه‌نێ ئێوه‌ زۆڵن و منداڵی ئه‌و نین.
9
سه‌ره‌ڕای ئه‌مه‌، باوكی مرۆڤانه‌مان هه‌یه‌ كه‌ ته‌مبێی كردووین و ڕێزی ئه‌ومان گرتووه‌. ئه‌ی چه‌ند زیاتر ملكه‌چی باوكی ڕۆحیمان بین، بۆ ئه‌وه‌ی ژیانی هه‌تاهه‌تایی به‌ده‌ستبهێنین؟
10
چونكه‌ باوكانمان بۆ ماوه‌یه‌ك ئه‌وه‌نده‌ی به‌ باشیان زانیوه‌ ته‌مبێیان كردووین، به‌ڵام خودا بۆ سوودی ئێمه‌یه‌ ته‌مبێمان ده‌كات، تاكو به‌شداری پیرۆزییه‌كه‌ی بكه‌ین.
11
هه‌موو ته‌مبێكردنێك له‌ كاتی خۆیدا ئازاربه‌خشه‌ و خۆش نییه‌، به‌ڵام دواتر به‌روبوومی ئاشتییانه‌ی ڕاستودروستی ده‌گرێت بۆ ئه‌وانه‌ی پێی ڕاهێنراون.
12
كه‌واته‌ ده‌سته‌ لاوازبووه‌كان و ئه‌ژنۆ له‌رزۆكه‌كان به‌هێز بكه‌ن،
13
{ڕێڕه‌وی به‌رپێت خۆش بكه‌،}[b] تاكو شه‌ل پێی له‌جێ نه‌چێت، به‌ڵكو چاك بێته‌وه‌.
ئاگاداری له‌ ڕه‌تكردنه‌وه‌ی خودا 
14
كۆشش بكه‌ن تاوه‌كو له‌گه‌ڵ هه‌موو كه‌سێك به‌ ئاشتی بژین، هه‌روه‌ها پیرۆز بن. بێ پیرۆزی كه‌س مه‌سیحی خاوه‌ن شكۆ نابینێت.
15
ئاگاداری ئه‌وه‌ بن، كه‌س خۆی له‌ نیعمه‌تی خودا بێبه‌ش نه‌كات، نه‌وه‌ك ڕه‌گی تاڵی له‌ناوتاندا گه‌شه‌ بكات و په‌شێوی دروستبكات، به‌هۆی ئه‌مه‌شه‌وه‌ زۆر كه‌س گڵاو بێت.
16
ئاگاداربن نه‌وه‌ك یه‌كێك داوێنپیس بێت یان وه‌ك عیسۆ به‌ڕه‌ڵا بێت، ئه‌وه‌ی مافی نۆبه‌رایه‌تی خۆی به‌ ژه‌مێك خواردن فرۆشت[c] .
17
دواتر وه‌ك ئاگادارن، ویستی ئه‌م به‌ره‌كه‌ته‌ به‌ میرات وه‌ربگرێت، به‌ڵام ڕه‌تكرایه‌وه‌. هه‌رچه‌نده‌ به‌ فرمێسكه‌وه‌ش داوای به‌ره‌كه‌ته‌كه‌ی كرد، به‌ڵام ده‌رفه‌تی تۆبه‌كردنی بۆ نه‌مابووه‌وه‌.
18
ئێوه‌ نه‌هاتوونه‌ته‌ لای شاخێك[d] ده‌ستی لێ بدرێت، لای ئاگرێكی به‌تین، لای تاریكی، لای ته‌م، لای گه‌رده‌لوول،
19
لای ده‌نگی كه‌ڕه‌نا، لای ده‌نگی قسه‌كردنێك وا له‌ گوێگران بكات بپاڕێنه‌وه‌ ئیتر ئه‌م قسانه‌یان بۆ نه‌كرێت،
20
له‌به‌ر ئه‌وه‌ی نه‌یانتوانی به‌رگه‌ی فه‌رمانه‌كانی خودا بگرن: {ته‌نانه‌ت ئه‌گه‌ر ئاژه‌ڵیش ده‌ستی به‌ر ئه‌و كێوه‌ بكه‌وێ، ده‌بێ به‌ردباران بكرێت.}[e]
21
دیمه‌نه‌كه‌ ئه‌وه‌نده‌ ترسناك بوو، موسا گوتی: {من له‌ ترسان ده‌له‌رزم.}[f]
22
به‌ڵكو ئێوه‌ هاتوونه‌ته‌ كێوی سییۆن، بۆ شاری خودای زیندوو، ئۆرشه‌لیمی ئاسمانی، بۆ ئاهه‌نگێك كه‌ فریشته‌یه‌كی بێشوماری كۆكردووه‌ته‌وه‌،
23
بۆ كڵێسای نۆبه‌ره‌ تۆماركراوه‌كان له‌ ئاسماندا، بۆ لای خودا كه‌ دادوه‌ری هه‌مووانه‌، بۆ لای ڕۆحی ڕاستودروستان كه‌ ته‌واوكراون،
24
بۆ لای عیسا، ڕێكخه‌ری په‌یمانی نوێیه‌، بۆ خوێنێكی پرژێنراو كه‌ له‌ خوێنی هابیل باشتر ده‌دوێت.
25
ئاگاداربن قسه‌كه‌ره‌كه‌ ڕه‌ت مه‌كه‌نه‌وه‌، چونكه‌ ئه‌گه‌ر ئه‌وانه‌ی قسه‌كه‌ری سه‌ر زه‌وییان ڕه‌تكرده‌وه‌ ده‌رباز نه‌بووبن، ئایا چه‌ند كه‌متر ئێمه‌ ده‌رباز ده‌بین كه‌ له‌ قسه‌كه‌ری ئاسمان هه‌ڵگه‌ڕاینه‌وه‌؟
26
ئه‌وسا ده‌نگی خودا زه‌وی هه‌ژاند، به‌ڵام ئێستا به‌ڵێنی داوه‌ و ده‌فه‌رموێ: {جارێكی دیكه‌ نه‌ك ته‌نها زه‌وی ده‌هه‌ژێنم، به‌ڵكو ئاسمانیش.}[g]
27
وشه‌ی «جارێكی دیكه‌» ئاماژه‌یه‌ بۆ سڕینه‌وه‌ی ئه‌و شتانه‌ی كه‌ ده‌هه‌ژێن، واته‌ شته‌ دروستكراوه‌كان، تاكو ئه‌و شتانه‌ی كه‌ ناهه‌ژێن بمێننه‌وه‌.
28
له‌به‌ر ئه‌وه‌، با سوپاسگوزار بین چونكه‌ شانشینێك وه‌رده‌گرین كه‌ ناهه‌ژێت، به‌هۆیه‌وه‌ به‌ شێوازێكی په‌سه‌ند به‌ ترس و ڕێزه‌وه‌ خودا بپه‌رستین،
29
چونكه‌ {خودامان ئاگرێكی بێ ئامانه‌.}[h]
  1. a. 12‏:6 \+xt په‌نده‌كان 3‏:11‏،12‏\+xt*‏.
  2. b. 12‏:13 \+xt په‌نده‌كان 4‏:26‏\+xt*‏
  3. c. 12‏:16 بڕوانه‌ \+xt په‌یدابوون 25‏:32‏-33.‏\+xt*‏
  4. d. 12‏:18 مه‌به‌ستی شاخی سینایه‌ له‌ كاتی پێدانی ته‌ورات به‌ موسا، بڕوانه‌ \+xt ده‌رچوون 19‏\+xt*‏ و 20.
  5. e. 12‏:20 \+xt ده‌رچوون 19‏:12‏،13‏.‏\+xt*‏
  6. f. 12‏:21 \+xt دواوتار 9‏:19‏\+xt*
  7. g. 12‏:26 \+xt حه‌گه‌ی 2‏:6‏\+xt*‏
  8. h. 12‏:29 \+xt دواوتار 4‏:24‏\+xt*