عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یه‌زدان ساموئێل بانگ ده‌كات 
1
منداڵه‌كه‌ش، ساموئێل، له‌لای عێلی خزمه‌تی یه‌زدانی ده‌كرد و له‌و ڕۆژانه‌دا فه‌رمایشتی یه‌زدانیش ده‌گمه‌ن بوو، پێشبینیش زۆر ڕانه‌ده‌گه‌یه‌نرا.
2
له‌و كاته‌ی عێلی چاوه‌كانی كز ببوون و توانای بینینی نه‌بوو، شه‌وێكیان له‌ شوێنه‌كه‌ی خۆیدا پاڵكه‌وتبوو،
3
ساموئێلیش له‌ چادری په‌رستنی یه‌زدان پاڵكه‌وتبوو، كه‌ سندوقی خودای لێبوو، به‌ر له‌وه‌ی چرای خودا بكوژێته‌وه‌،
4
جا یه‌زدان ساموئێلی بانگكرد.
ئه‌ویش گوتی: «ئه‌وه‌تام.» و
5
ڕایكرد بۆ لای عێلی و گوتی: «ئه‌وه‌تام، چونكه‌ بانگت كردم.»
عێلیش گوتی: «بانگم نه‌كردوویت، بگه‌ڕێوه‌ و پاڵبكه‌وه‌.» ئه‌ویش ڕۆیشت و پاڵكه‌وته‌وه‌.
6
یه‌زدان دووباره‌ ساموئێلی بانگكرده‌وه‌، ساموئێلیش هه‌ستا و بۆ لای عێلی ڕۆیشت و گوتی: «ئه‌وه‌تام، چونكه‌ بانگت كردم.»
عێلیش گوتی: «كوڕم بانگم نه‌كردوویت، بگه‌ڕێوه‌ و پاڵبكه‌وه‌.»
7
ساموئێلیش هێشتا یه‌زدانی نه‌ناسیبوو و هێشتا فه‌رمایشتی یه‌زدانی بۆ ڕانه‌گه‌یه‌نرابوو.
8
بۆ سێیه‌م جار یه‌زدان ساموئێلی بانگكرده‌وه‌، ئه‌ویش هه‌ستا و ڕۆیشت بۆ لای عێلی و گوتی: «ئه‌وه‌تام، چونكه‌ بانگت كردم.»
ئینجا عێلی تێگه‌یشت كه‌ یه‌زدانه‌ منداڵه‌كه‌ بانگ ده‌كات.
9
جا عێلی به‌ ساموئێلی گوت: «بڕۆ و پاڵبكه‌وه‌، ئه‌گه‌ر بانگی كردیت، بڵێ: ”بفه‌رموو یه‌زدان، به‌نده‌ت گوێی گرتووه‌.“» ساموئێلیش ڕۆیشت و له‌ شوێنه‌كه‌ی خۆی پاڵكه‌وته‌وه‌.
10
ئینجا یه‌زدان هات و وه‌ستا و وه‌ك جاره‌كانی پێشوو بانگی كرد: «ساموئێل! ساموئێل!»
ساموئێلیش گوتی: «بفه‌رموو، به‌نده‌ت گوێی گرتووه‌.»
11
یه‌زدانیش به‌ ساموئێلی فه‌رموو: «ئه‌وه‌تا من له‌ناو ئیسرائیلدا خه‌ریكه‌ شتێك ده‌كه‌م، كه‌ گوێیه‌كانی هه‌ركه‌سێك بیبیستێت بزرنگێته‌وه‌.
12
له‌و ڕۆژه‌دا هه‌موو ئه‌وه‌ی له‌ دژی عێلیم فه‌رموو سه‌باره‌ت به‌ ماڵه‌كه‌ی، له‌ سه‌ره‌تاوه‌ هه‌تا كۆتایی جێبه‌جێی ده‌كه‌م.
13
من پێم ڕاگه‌یاند كه‌ بۆ هه‌تاهه‌تایه‌ سزا به‌سه‌ر بنه‌ماڵه‌كه‌یدا ده‌سه‌پێنم له‌به‌ر ئه‌و گوناهه‌ی كه‌ خۆی ده‌یزانێت، چونكه‌ كوڕه‌كانی كفریان به‌ خودا كرد و ئه‌ویش ڕێی لێ نه‌گرتن.
14
له‌به‌ر ئه‌وه‌ سوێندم بۆ ماڵی عێلی خوارد، كه‌ تاوانه‌كه‌ی بنه‌ماڵه‌ی عێلی كه‌فاره‌تی بۆ نه‌كرێت، نه‌ به‌ قوربانی سه‌ربڕاو و نه‌ به‌ پێشكه‌شكراو هه‌تاهه‌تایه‌.»
15
ئینجا ساموئێل هه‌تا به‌یانی پاڵكه‌وت و ده‌رگاكانی ماڵی یه‌زدانی واڵا كرد. ساموئێل ترسا ئه‌و بینینه‌ به‌ عێلی ڕابگه‌یه‌نێت.
16
ئینجا عێلی ساموئێلی بانگكرد و گوتی: «كوڕم ساموئێل.»
ئه‌ویش گوتی: «ئه‌وه‌تام.»
17
عێلی گوتی: «ئه‌و قسه‌یه‌ چی بوو كه‌ پێی فه‌رموویت؟ تكایه‌ لێمی مه‌شاره‌وه‌. خودا توندترین سزات بدات، ئه‌گه‌ر وشه‌یه‌كم لێ بشاریته‌وه‌ له‌ هه‌موو ئه‌وه‌ی پێی فه‌رموویت.»
18
ساموئێلیش ته‌واوی فه‌رمووده‌كه‌ی پێ گوت و هیچی لێی نه‌شارده‌وه‌، ئه‌ویش گوتی: «خۆی یه‌زدانه‌، ئه‌وه‌ی به‌ باشی بزانێت با بیكات.»
19
ساموئێل گه‌شه‌ی ده‌كرد، یه‌زدانیش له‌گه‌ڵی بوو، نه‌یهێشت هیچ یه‌كێك له‌ قسه‌كانی ساموئێل بشكێت.
20
جا هه‌موو ئیسرائیل هه‌ر له‌ دانه‌وه‌ هه‌تا بیری شابه‌ع[a] زانییان كه‌ ساموئێل متمانه‌پێكراوه‌ ببێت به‌ پێغه‌مبه‌ری یه‌زدان.
21
یه‌زدان به‌رده‌وام له‌ شیلۆ خۆی بۆ ده‌رده‌خست، چونكه‌ له‌وێ به‌ ڕێگه‌ی فه‌رمایشته‌كه‌یه‌وه‌ خۆی بۆ ساموئێل ئاشكرا كردبوو.
  1. a. 3‏:20 واته‌ له‌ باكووری ئیسرائیل هه‌تا باشوور.