عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
بوڕیزانا پێنجێ 
1
فریشتەیێ پێنجێ ل بوڕیزانێ دا و من ستێرەك دیت ژ ئەسمانی كەفتبوو سەر ئەردی و كلیلا دەرگەهێ چاڵا بێ بن[a] بۆ ستێرێ هاتە دان.
2
دەمێ وێ دەرگەهێ چاڵا بێ بن ڤەكری، دویكێلەكا وەكو دویكێلا ئێتوینەكا مەزن ژێ دەركەفت، ئینا رۆژ و با ژ بەر دویكێلا چاڵێ تاری بوون.[b]
3
ژ وێ دویكێلێ كولی دەركەفتنە سەر ئەردی و شیانەكا وەكو شیانا دویپشكێن ئەردی بۆ وان هاتە دان[c]
4
و بۆ هاتە گۆتن كو زیانێ ل گیایێ ئەردی نەدەن، نە ژی كەسكاتی و نە ژی داران، ب تنێ وان مرۆڤان یێن موهرا خودێ ل سەر ئەنیا وان نینە.[d]
5
دەستویری بۆ كولیان نەهاتە دان، كو وان بكوژن، لێ پێنج هەیڤان وان ئازار بدەن. ئەو ئازارا وەكو ئازارا دویپشكیە دەمێ ب مرۆڤی ڤەددەت.
6
د وان رۆژان دا، مرۆڤ دێ ل مرنێ گەڕیێن، لێ قەت نابینن، ئەو دێ حەز كەن بمرن، لێ مرن دێ ژ وان رەڤیت.[e]
7
شێوەیێ كولیان وەكو یێ هەسپێن ئامادەكری بۆ جەنگێ بوو. ل سەر سەرێ وان تشتەكێ وەكو تانجێن زێڕی بوو و دێمێ وان وەكو دێمێ مرۆڤان بوو،[f]
8
پرچەكا وەكو پرچا ژنان هەبوو و ددانێن وان وەكو ددانێن شێران بوون،
9
زریێن[g] وان وەكو زریێن ئاسنی بوون و دەنگێ چەنگێن وان وەكو دەنگێ گەلەك گالیسكەیان بوو یێن هەسپ دكێشن و بۆ جەنگێ دكەنە غار.
10
كوری و دمدریشك هەبوون وەكو یێن دویپشكان و شیانا وان یا كو پێنج هەیڤان زیانێ ل مرۆڤان بدەن د كوریێن وان دا بوو.
11
فریشتەیێ چاڵا بێ بن پاشا بوو ل سەر وان، ناڤێ وی ب عیبرانی «ئابادۆن»ە و ب یونانی «ئاپۆلیۆن»ە.[h]
12
خولیسەریا ئێكێ دەرباز بوو، ئەڤە دوو خولیسەریێن دی ژی پشتی وان تشتان دێ هێن.
بوڕیزانا شەشێ 
13
فریشتەیێ شەشێ ل بوڕیزانێ دا و من دەنگەك ژ چوار شاخێن قوربانگەها زێڕین یا ل پێشیا خودێ بهیست،
14
دەنگی گۆتە فریشتەیێ شەشێ، ئەوێ بوڕیزان ڤێ: «وان هەر چوار فریشتەیێن ل نك رویبارێ مەزن فوراتی گرێدای، بەردە.»
15
ئینا هەر چوار فریشتەیێن هاتبوونە ئامادەكرن بۆ ڤێ دەمژمێرێ و رۆژێ و هەیڤێ و ساڵێ هاتنە بەردان، دا سێئێكا مرۆڤان بكوژن.
16
من ژمارەیا وان بهیست، ژمارەیا لەشكەرێن سیار دوو سەد هزار هزار بوون.
17
من هۆسا هەسپ و سیارێن وان د بینینێ دا دیت: زریێن سیاران وەكو رەنگێ ئاگری و یاقوتێ شین و كپریتێ بوون. سەرێ هەسپان وەكو سەرێ شێران بوو، ژ دەڤێ وان ئاگر و دویكێل و كپریت دەردكەفتن.
18
ب ڤان سێ دربان، سێئێكا مرۆڤان ب ئاگری و دویكێلێ و كپریتا ژ دەڤێ وان دەردكەفت، هاتنە كوشتن،
19
چنكو شیانا هەسپان د دەڤ و كوریا وان دایە، كوریێن وان وەك مارانە، ب سەرن و زیانێ پێ دكەن.
20
ئەو مرۆڤێن دی یێن ب ڤان دربان نەهاتینە كوشتن، ژ كریارێن دەستێ خۆ ل خۆ نەزڤڕین، دەست ژ پەرستنا ئەجنە و پووتێن[i] زێڕی و زیڤی و برۆنزی و بەری و داری بەرنەدا، ئەو پووتێن نەشێن ببینن، نە ژی ببهیسن و نە ژی ب رێڤە بچن.[j]
21
هەروەسا ژ كوشتن و جادووگەری و دەهمەنپیسی و دزیكرنا خۆ ژی ل خۆ نەزڤڕین.
  1. a. 9‏:1 q چاڵا بێ بن: ل فەرهەنگۆكێ بنێڕە.
  2. b. ‏9‏:2 دەستپێكرن ‏19‏:28
  3. c. ‏9‏:3 دەركەفتن ‏10‏:12‏-15
  4. d. ‏9‏:4 حزقیێل ‏9‏:4‏-6
  5. e. ‏9‏:6 یەرمیا ‏8‏:3
  6. f. ‏9‏:7 یۆئێل ‏2‏:4
  7. g. 9‏:9 q زری ئانكو ‹درع›.
  8. h. ‏9‏:11 «ئابادۆن» و «ئاپۆلیۆن»: ئەڤ هەردوو ناڤ ب رامانا «وێرانكەر».
  9. i. 9‏:20 صەنەمێن
  10. j. ‏9‏:20 زەبوور ‏115‏:4‏-7