عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
مەسیح بۆ شاگردێن خۆ نڤێژێ دكەت 
1
دەمێ عیسای ئەڤ ئاخفتنە گۆتین، بەرێ خۆ دا ئەسمانی و گۆت: «باب، دەم هات. كوڕێ خۆ مەزن كە، دا كوڕێ تە ژی تە مەزن كەت،
2
چنكو تە دەستهەلات ل سەر هەمی مرۆڤان یا دایێ، دا ژیانا هەروهەر بدەتە هەمی ئەو كەسێن تە داینە وی.
3
ژیانا هەروهەر ژی ئەڤەیە: ئەو تە، ئانكو خودایێ راستەقینە یێ ئێكانە، و عیسایێ مەسیح یێ تە هنارتی، بنیاسن.
4
من تۆ ل سەر ئەردی مەزن كری، ب رێكا بجهئینانا ئەو كارێن تە داینە من كو بكەم.
5
باب، نوكە من ل نك خۆ مەزن بكە، ب وێ مەزناهیا من بەری هەبوونا جیهانێ ل نك تە هەبوو.
6
من ناڤێ تە بۆ وان مرۆڤان دیار كر، یێن تە ژ جیهانێ داینە من. ئەو یێن تە بوون و تە دانە من و وان پەیڤا تە ب جهـ ئینا.
7
نوكە ئەو دزانن كو هەمی تشتێن تە داینە من، ئەو ژ تەنە،
8
چنكو ئەو پەیڤێن تە داینە من، من دانە وان و وان وەرگرتن و ب راستی زانی كو ئەز یێ ژ نك تە هاتیم و وان باوەری ئینا كو تە ئەز یێ هنارتیم.
9
ئەز ژ پێخەمەت وان نڤێژێ دكەم. ئەز پێخەمەت جیهانێ نڤێژێ ناكەم، لێ ژ پێخەمەت وان یێن تە داینە من، چنكو یێن تەنە.
10
هەر تشتەكێ من، یێ تەیە و هەر تشتەكێ تە، یێ منە و ئەز ب وان هاتیمە مەزنكرن.
11
ئێدی ئەز د جیهانێ دا نینم، لێ ئەو یێ د جیهانێ دا و ئەز دێ هێمە نك تە. بابێ پیرۆز، وان ب ناڤێ خۆ یێ تە دایە من بپارێزە، دا ببنە ئێك هەروەكو ئەز و تۆ ئێك.
12
دەمێ ئەز ل گەل وان بووم، من ئەو ب ناڤێ تە دپاراستن، ب وی ناڤێ تە دایە من، من چاڤێ خۆ دایێ. كەس ژ وان ژ ناڤ نەچوو، ژبلی كوڕێ ژناڤچوونێ[a] ، داكو نڤیسار ب جهـ بهێت.
13
لێ نوكە ئەز دێ هێمە نك تە و ڤان تشتان ل جیهانێ دبێژم، دا دلخۆشیا من د وان دا یا تەمام بیت.
14
من پەیڤا تە گەهاندە وان و جیهانێ كەرب ژ وان ڤەبوون، چنكو ئەو نە ژ جیهانێنە هەروەكو ئەز نە ژ جیهانێ.
15
ئەز داخوازێ ناكەم كو تۆ وان ژ جیهانێ ببەی، لێ تۆ وان ژ خرابكاری[b] بپارێزی.
16
ئەو نە ژ جیهانێنە، هەروەكو ئەز نە ژ جیهانێ.
17
وان ب راستیێ پیرۆز بكە[c] ، پەیڤا تەیە راستی.
18
هەروەكو تە ئەز هنارتیمە جیهانێ، من ژی ئەو هنارتنە جیهانێ.
19
ژ پێخەمەت وان ئەز خۆ پیرۆز دكەم، دا ئەو ژی ب راستیێ بهێنە پیرۆز كرن[d] .
20
ئەز داخوازێ نە ب تنێ ژ پێخەمەت ڤان دكەم، لێ ژ پێخەمەت وان ژی یێن ب رێكا پەیڤا ڤان، باوەریێ ب من بینن،
21
داكو هەمی ببنە ئێك. باب، هەروەكو تۆ د ناڤ من دا و ئەز د ناڤ تە دا، بلا ئەو ژی د مە دا بن، دا جیهان باوەریێ بینیت كو تە ئەز یێ هنارتیم.
22
ئەو مەزناهیا تە دایە من، من ژی دا وان، دا ئەو ببنە ئێك هەروەكو ئەز و تۆ ئێكین.
23
ئەز یێ د ناڤ وان دا و تۆ یێ د ناڤ من دا، دا ئێكبوونا وان یا تەمام بیت، دا جیهان بزانیت كو تە ئەز یێ هنارتیم و تە حەز ژ وان كر هەروەكو تە حەز ژ من كری.
24
باب، من دڤێت كو ئەوێن تە داینە من، ل گەل من بن، ل وی جهێ ئەز لێ بم، دا وێ مەزناهیا تە دایە من ببینن، چنكو بەری دامەزراندنا جیهانێ تە حەز ژ من كر.
25
بابێ راستدار، جیهان تە نانیاسیت، لێ ئەز تە دنیاسم و ئەڤە دزانن كو تە ئەز یێ هنارتیم.
26
من ناڤێ تە بۆ وان دا نیاسین و دێ بۆ وان دەمە نیاسین، داكو ئەو حەزژێكرنا تە پێ حەز ژ من كری، د ناڤ وان دا بیت و ئەز ژی د ناڤ وان دا بم.»
  1. a. 17‏:12 مەبەست پێ یەهودایێ ئەسخەریوتیە.
  2. b. 17‏:15 مەبەست پێ ئبلیسە.
  3. c. 17‏:17 ئانكو بۆ خۆ تەرخان بكە. ل فەرهەنگۆكێ بنێڕە: \k پیرۆز\k*
  4. d. 17‏:19 ئانكو «ژ پێخەمەت وان ئەز خۆ بۆ تە تەرخان دكەم، دا ئەو ژی ب راستیێ بۆ تە بهێنە تەرخان كرن.» ل فەرهەنگۆكێ بنێڕە: \k پیرۆز\k*