عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دەرفەتا ب ژۆركەفتنا بێهنڤەدانا خودێ ژ دەست نەدەن 
1
لەوما بلا ئەم بترسین، نەكو سەرەڕای دەرفەتا سۆزا ب ژۆركەفتنا د ناڤ بێهنڤەدانا وی دا هێشتا یا مای، ئێك ژ هەوە ب وێ سۆزێ را نەگەهیت.
2
چنكو مزگینی بۆ مە ژی وەكو وان هاتە راگەهاندن، لێ ئەو پەیاما وان بهیستی چ مفا بۆ وان نەبوو، ژ بەر كو ئەو خەلك ل گەل وان یێن ب باوەری بهیستی[a] ، د ئێكگرتی نەبوون.
3
لێ ئەم یێن باوەری ئینای ب ژۆر دكەڤینە د وێ بێهنڤەدانێ دا، هەروەكو وی گۆتی:
«ئینا من د تۆڕەبوونا خۆ دا سویند خوار:
‹ئەو قەت ب ژۆر ناكەڤنە د ناڤ بێهنڤەدانا من دا.›»
هەر چەندە ژ دەمێ دامەزراندنا جیهانێ كارێن وی تەمام بووینە.
4
چنكو ئەو ل جهەكی ژ پەرتووكا پیرۆز سەبارەت رۆژا حەفتێ هۆسا دبێژیت: «و ل رۆژا حەفتێ خودێ ژ هەمی كارێن خۆ بێهنا خۆ ڤەدا.»[b]
5
هەروەسا د جهێ دی دا دبێژیت: «ئەو قەت ب ژۆر ناكەڤنە د ناڤ بێهنڤەدانا من دا.»
6
مادەم هێشتا دەرفەت مایە كو هندەك ب ژۆر بكەڤن و یێن بەری هنگی مزگینی بۆ وان هاتیە راگەهاندن، ژ بەر نەگوهداریێ ب ژۆر نەكەفتن،
7
لەوما خودێ رۆژەكا دی دەستنیشان دكەت، ئەو رۆژ ژی «ئەڤرۆ» یە. وی ئەڤ چەندە ب رێكا داوودی پشتی دەمەكێ درێژ دیار كر، هەروەكو بەری نوكە هاتیە گۆتن:
«ئەڤرۆ، ئەگەر هوین دەنگێ وی ببهیسن،
خۆ سەرهشك نەكەن.»
8
چنكو ئەگەر یەشوعی ئەو ئینابانە د بێهنڤەدانێ دا[c] ، پشتی هنگی خودێ بەحسێ رۆژەكا دی نەدكر.
9
لەوما بێهنڤەدانەكا وەكو بێهنڤەدانا رۆژا شەمبیێ بۆ گەلێ خودێ هێشتا یا مای.
10
ئەوێ ب ژۆر كەفتیە د بێهنڤەدانا وی دا ژی، ژ كارێن خۆ بێهنڤەدان كریە، كا چەوا خودێ ژ كارێن خۆ بێهنڤەدان كریە.
11
لەوما بلا ئەم بزاڤێ بكەین كو ب ژۆر بكەڤینە د وێ بێهنڤەدانێ دا، دا كەس ژ ئەنجامدانا هەمان نموونەیا نەگوهداریێ نەكەڤیت.
12
پەیڤا خودێ یا زیندی و كاریگەرە، ژ هەر شیرەكێ دوودەڤ تیژترە، ئەو هەتا د ناڤبەرا دەروون و گیانی دا و گەهـ و مەژیێ هەستی دا دچیت، دشێت حوكمی ل سەر هزر و نیازێن دلی بدەت.
13
چ ئافراندی ژ خودێ د ڤەشارتی نینن، لێ هەمی تشت د رویت و ئاشكرانە ل بەر چاڤێن وی یێ ئەم حسابێ ددەینێ.
عیسا مەزنترین سەرۆككاهنە 
14
مادەم مە سەرۆككاهنەكێ[d] مەزن هەیە، ئەوێ ژ ئەسمانان دەرباز بووی، كو عیسایێ كوڕێ خودێیە، بلا ئەم قاییم خۆ ب دانپێدانا خۆ[e] ڤە بگرین.
15
سەرۆككاهنێ مە یێ وەسا نینە كو دلێ وی بۆ لاوازیێن مە نەسوژیت، لێ ئەو ژی وەكو مە د هەمی تشتان دا هاتیە تاقیكرن، بێی كو گونەهێ بكەت.
16
ئەڤجا بلا ئەم ب پشتڕاستی خۆ نێزیكی تەختێ كەرەمێ بكەین، دا دلۆڤانیێ وەرگرین و كەرەمێ ب دەست ڤە بینین كو هاریكاری بیت ل دەمێ پێدڤی.
  1. a. 4‏:2 مەبەست پێ یەشوع و كالێب بوون، ئەوێن باوەر ژ سۆزا خودانی كری. بنێڕە سەرژمێری 14‏:6‏-9، 24
  2. b. 4‏:4 دەستپێكرن 2‏:2
  3. c. 4‏:8 q یەشوعی ئەو ئینابانە د بێهنڤەدانێ دا پشتی مرنا مووسای، یەشوع بوو رێڤەبەرێ گەلێ ئیسرائیل و ئەو ئینانە د ئەردێ سۆزپێدای دا.
  4. d. 4‏:14 q كاهن ئەو كەسە یێ ل نك خودێ مەهدەریێ بۆ خەلكی دكەت. ل فەرهەنگۆكێ بنێڕە پەیڤا ‹كاهن›.
  5. e. 4‏:14 q دانپێدانا خۆ دەربڕینەكە بۆ باوەریا مە ب عیسایێ مەسیح كو ئەو خودانە و یێ ژ ناڤ مریان رابووی. بنێڕە رۆما 10‏:9‏-10*