عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من، پاولۆس، هنارتیێ مەسیح عیسای، ب حەزا خودێ،
بۆ پیرۆزكریێن ل ئەفەسۆسێ، ئەوێن ب مەسیح عیسای د دلسۆزن:
2
كەرەم و ئاشتی ژ بابێ مە خودێ و خودان عیسایێ مەسیح ل سەر هەوە بن.
بەرەكەتێن گیانی 
3
مەزناهی بۆ خودێ، بابێ خودانێ مە عیسایێ مەسیح، كو وی ب ئێكبوونا ل گەل مەسیحی، ب هەر بەرەكەتەكا گیانی د جهێن ئەسمانی دا، ئەم بەرەكەتدار كرین.
4
وی ژ بەری دامەزراندنا جیهانێ، ب ئێكبوونا مە ل گەل مەسیحی ئەم هەلبژارتین، دا ئەم ل بەرامبەری وی د حەزژێكرنێ دا د پیرۆز و بێ گازندە بین.
5
وی پێشوەخت، ل دویڤ كەیف و حەزا خۆ، ئەم دەستنیشان كرین، دا ب رێیا عیسایێ مەسیح كوڕینیا وی[a] وەرگرین،
6
ژ بۆ پەسندانا[b] مەزناهیا كەرەما وی، ئەوا ب رێیا خۆشتڤیێ خۆ بۆ مە كریە خەلات.
7
ژ دەولەتسەرێ وی، مە ب خوینا وی رزگاری، ئانكو لێبورینا گونەهان، هەیە. ئەڤ چەندە ل دویڤ كەرەما خودێ یا دەولەمەندە [c] ،
8
ئەوا وی ب هەمی ئاقلمەندی و تێگەهشتن، ب مەردانی ب سەر مە دا باراندی.
9
وی نهێنیا حەزا خۆ بۆ مە ئاشكرا كر، ئەوا وەكو وی ڤیای نەخشە كری كو ب رێیا مەسیحی ب جهـ بینیت.
10
نەخشەیێ وی ژی ئەوە كو د تەمامكرنا دەمان دا، ئەو دێ هەمی تشتان، یێن ل سەر ئەردی و یێن ل ئەسمانی ژی، پێكڤە كۆم كەت و ئێخیتە د بن سەروەریا مەسیحی دا.
11
ل دویڤ مەبەستا وی، ئەوێ هەر تشتی ل دویڤ بڕیار و حەزا خۆ ساز دكەت، ئەم پێشوەخت هاتینە دەستنیشانكرن و ب مەسیحی هاتینە هەلبژارتن،
12
دا ئەم ژ بۆ پەسندانا مەزناهیا وی بین، ئەم ئەوێن ل بەراهیێ هیڤیا خۆ ب مەسیحی ڤە گرێ دایی.
13
دەمێ هەوە پەیڤا راستیێ، ئانكو مزگینیا قورتالبوونا خۆ، بهیستی و باوەری ب مەسیحی ئینای، هوین ژی ب گیانێ پیرۆزێ سۆز پێ هاتیە دان، ژ بەر ئێكبوونا هەوە ل گەل مەسیحی هاتنە موهركرن.
14
گیانێ پیرۆز دەستبەعێ میراتێ مەیە تا دەمێ خودێ گەلێ خۆ رزگار دكەت، ژ بۆ پەسندانا مەزناهیا خۆ.
نڤێژا پاولۆسی 
15
ژ بەر هندێ، گاڤا من باوەریا هەوە ب خودان عیسای و حەزژێكرنا هەوە بۆ هەمی پیرۆزكریان بهیستی،
16
ژ هنگی وەرە ئەز بێ راوەستیان بۆ هەوە سوپاسیا خودێ دكەم، د نڤێژێن خۆ دا هەوە دئینمە بیرا خۆ،
17
دا خودایێ خودانێ مە عیسایێ مەسیح، بابێ مەزناهیێ، گیانێ ئاقلمەندیێ و ئاشكراكرنێ بدەتە هەوە، دا هوین وی هێشتا باشتر بنیاسن،
18
چاڤێن زێنێ هەوە روهن بكەت، دا بزانن كا ئەو هیڤی چیە یا هوین بۆ وێ هاتینە گازیكرن و كا دەولەمەندیا مەزناهیا میراتێ وی د ناڤ پیرۆزكریان دا چیە،
19
و كا مەزناهیا هێزا وی یا بێ سنوور چیە، یا ژ بۆ مە یێن باوەردار ل دویڤ هێز و شیانا وی كار دكەت.
20
ئەڤ هێزە ئەوە یا خودێ د مەسیحی دا ئێخستیە كاری، دەمێ ژ ناڤ مریان راكری و ل دەستێ خۆ یێ راستێ ل جهێن ئەسمانی روینشتاندی،[d]
21
د سەر هەر حوكمداری، دەستهەلاتی، هێز، خودانەتی و هەر ناڤەكێ دی یێ دهێتە دانان دا، نە ب تنێ د ڤێ جیهانێ دا، لێ د جیهانا دی ژی دا.
22
خودێ هەمی تشت ئێخستنە بن پێیێن وی[e] و ئەو د سەر هەر تشتەكی دا كرە سەر بۆ كەنیسەیێ.[f]
23
كەنیسە لەشێ ویە، ئانكو تژیاتیا ویە یێ كو هەمی تشتان ب تەمامی تژی دكەت.
  1. a. 1‏:5 q كوڕینیا وی ئانكو ئەم ببینە كوڕێن خودێ و میراتگرێن وی بین.
  2. b. 1‏:6 q پەسندانا مەدحكرنا
  3. c. 1‏:7 كۆلۆسی 1‏:14
  4. d. 1‏:20 زەبوور 110‏:1
  5. e. 1‏:22 زەبوور 8‏:6
  6. f. 1‏:22 كۆلۆسی 1‏:18