عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
چاڤەڕێكرنا گیانێ پیرۆز 
1
بەڕێز تیوفیلۆس، د نڤیسارا خۆ یا ئێكێ دا[a] ، من بۆ تە دەربارەی وان هەمی تشتان نڤیسی یێن كو عیسای كرین و فێركرن پێ كری، هەر ژ دەمێ وی دەست ب كارێ خۆ كری،
2
تا وێ رۆژا ئەو بۆ ئەسمانان هاتیە بلندكرن، پشتی ب گیانێ پیرۆز[b] شیرەتێن خۆ بۆ وان هنارتیێن وی هەلبژارتین پێشكێش كرین.
3
پشتی وی ئازار كێشاین، ئەوی ب گەلەك بەلگەیان خۆ نیشا وان دا كو یێ ساخە. بۆ ماوێ چل رۆژان بۆ وان دیار بوو و دەربارەی پاشایەتیا خودێ ئاخفت.
4
جارەكێ دەمێ ئەو ل گەل وان بوو، فەرمان ل وان كر و گۆتێ: «ئورشەلیمێ ب جهـ نەهێلن، لێ چاڤەڕێی سۆزا بابی بن، ئەوا هەوە ژ من بهیستی.[c]
5
یوحەننای خەلك ب ئاڤێ تافیر دكر، لێ هوین پشتی چەند رۆژەكێن دی، دێ ب گیانێ پیرۆز هێنە تافیركرن[d]
بلندبوونا عیسای بۆ ئەسمانان 
6
ئەڤجا دەمێ هنارتی ل نك وی كۆمبووین، پرسیار ژێ كر: «خودان، ما ئەڤە ئەو دەمە یێ تۆ دێ پاشایەتیێ بۆ مللەتێ ئیسرائیلێ ڤەگەڕینی؟»
7
بەرسڤا وان دا: «ئەو نە كارێ هەوەیە، هوین دەم و ژڤانێن بابی ب دەستهەلاتا خۆ داناین، بزانن.
8
لێ دەمێ گیانێ پیرۆز ب سەر هەوە دا دهێت، دێ هوین هێزێ وەرگرن و دێ ل ئورشەلیمێ و هەمی یەهودیایێ و سامەریایێ تاكو هەر چوار كوژیێن جیهانێ بنە شاهدێن من.»
9
دەمێ عیسای ئەڤ ئاخفتنە گۆتین، ل بەر چاڤێن وان بۆ ئەسمانان هاتە بلندكرن، پاشی عەورەكی ئەو ژ بەر چاڤێن وان بەرزەكر.
10
دەمێ وان بەرێ خۆ ددا چوونا وی بۆ ئەسمانان، ژ نشكەكێ ڤە دوو زەڵامێن جلك سپی ب رەخ وان ڤە ژ پێرڤە دیار بوون
11
و گۆتنێ: «گەلی جەلیلیان، بۆچی هوین د راوەستیاینە و بەرێ هەوە ل ئەسمانانە؟ ئەڤە ئەو عیسایە، ئەوێ بۆ ئەسمانان هاتیە بلندكرن، دێ هۆسا ڤەگەڕیتەڤە، هەروەكو هەوە دیتی دچوو.»
هەلبژارتنا كەسەكی ل شوینا یەهودای 
12
پاشی ژ چیایێ دگۆتنێ چیایێ زەیتوونان، ڤەگەڕیانە ئورشەلیمێ، كو رێیا رۆژەكا شەمبی[e] ژ ئورشەلیمێ یێ دویر بوو.
13
دەمێ ئەو ب ژۆر كەفتینە باژێڕی، چوونە وێ ژۆرا سەری یا پەترۆس، یوحەننا، یەعقوب، ئەندراوس، فیلیپۆس، توماس، بەرتولماوس، مەتتا، یەعقوبێ كوڕێ حەلفی، شەمعونێ وەڵاتپەروەر[f] و یەهودایێ كوڕێ یەعقوبی تێدا دمان.
14
ئەڤە هەمی، ل گەل هندەك ژنكان و مەریەما دایكا عیسای و برایێن وی، ب ئێك دل ل سەر نڤێژان د بەردەوام بوون.
15
د وان رۆژان دا، پەترۆس د ناڤ باوەرداران دا، كو ژمارەیا وان نێزیكی سەد و بیست كەسان بوو، رابوو و گۆت:
16
«گەلی برایان، پێدڤی بوو ئەو نڤیسار ب جهـ هاتبا، ئەوا پێشوەخت گیانێ پیرۆز ل سەر ئەزمانێ داوود پێغەمبەری، سەبارەت یەهودای گۆتی، ئەوێ بوویە رێبەرێ وان كەسێن عیسا گرتی.
17
ئەو ئێك ژ مە دهاتە هژمارتن و بەهر د ڤێ خزمەتێ دا هەبوو.»
18
(ب پارەیێ خرابیا خۆ زەڤیەك كڕیبوو، ئینا ل وێ زەڤیێ كەفتە سەر دەڤێ خۆ و زكێ وی شەق بوو و هناڤێن وی هاتنە دەرێ
19
و هەمی خەلكێ ئورشەلیمێ ب ڤێ رویدانێ زانی، كو ئەو زەڤی ب زمانێ وان ب ‹هاكلدەمەخ› هاتە بناڤكرن، ئانكو ‹زەڤیا خوینێ.›[g] )
20
پەترۆس بەردەوام بوو و گۆت: «چنكو د پەرتووكا زەبوورێ دا هاتیە نڤیسین:
‹بلا مالا وی كاڤل ببیت
و كەس تێدا نەمینیت.›[h]
هەروەسا:
‹بلا ئێكێ دی ب ئەركێ وی راببیت.›[i]
21
‏-22 ئەڤجا پێدڤیە ئێك ل گەل مە بۆ رابوونا عیسای ببیتە شاهد، كو ژ وان كەسان بیت، ئەوێن ب درێژاهیا دەمی د گەل مە دا بوون، ئەو دەمێ خودان عیسای د گەل مە دا بوراندی، هەر ژ دەمێ یوحەننای تافیركرن دكر، تا وێ رۆژا عیسا ژ ناڤ مە هاتیە بلندكرن.»
23
ئەڤجا وان دوو كەس پێشنیار كرن، ئێك ژ وان یوسڤ بوو، ئەوێ دگۆتنێ بارساباس و ب ‹یوستۆس› یێ ناڤدار بوو و یێ دی مەتیاس بوو.
24
وان نڤێژ كر و گۆت: «هەی خودان تۆ دلێ هەر مرۆڤەكی دزانی، بۆ مە دیار بكە، كا تە كی ژ ڤان هەردوو زەڵامان هەلبژارتیە،
25
دا جهێ یەهودای د ڤێ خزمەت و هنارتیبوونێ دا بگریت، ئەوا یەهودای ژێ لادای داكو بچیتە جهێ هەژی خۆ.»
26
پشك هاڤێت و ناڤێ مەتیاسی دەركەفت و مەتیاس ئێك ل گەل هەر یازدە هنارتیان هاتە هژمارتن.
  1. a. 1‏:1 لوقا 1‏:1‏-4
  2. b. 1‏:2 q گیانێ پیرۆز: ئانكو گیانێ خودێ. ل فەرهەنگۆكێ بنێڕە گیانێ پیرۆز*.
  3. c. 1‏:4 لوقا 24‏:49
  4. d. 1‏:5 لوقا 3‏:16
  5. e. 1‏:12 بۆ جوهیان یا رەوا نەبوو ل شەمبیێ كەسەك پتر ژ 1100 مەتران بڕێڤە بچیت. ل فەرهەنگۆكێ بنێڕە رۆژا شەمبی*.
  6. f. 1‏:13 q شەمعونێ وەڵاتپەروەر: بنێڕە فەرهەنگۆكێ.
  7. g. 1‏:19 مەتتا 27‏:3‏-8
  8. h. 1‏:20 زەبوور 69‏:25
  9. i. 1‏:20 زەبوور 109‏:8