عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
هاریكاریا باوەردارێن بەلەنگاز 
1
پێدڤی ناكەت ئەز بۆ هەوە سەبارەت خزمەتا هاریكاریكرنا پیرۆزكریان بنڤیسم،
2
چنكو ئەز حەزا دلێ هەوە بۆ هاریكاریكرنێ دزانم، ل نك مەقدۆنیان ئەز شانازیێ پێ دبەم و دبێژمە وان كو هەرێما ئەخایایێ[a] ژ پار وەرە یا ئامادەیە. دلگەرمیا هەوە گەلەك ژ وان بۆ هاریكاریكرنێ هاندان.
3
لێ ئەز برایان دهنێرمە نك هەوە، دا ل دۆر ڤێ چەندێ شانازیا مە ب هەوە ڤاڵا دەرنەكەڤیت و دا هوین د ئامادە بن، هەروەكو من گۆتی.
4
چنكو ئەگەر هندەك مەقدۆنی ل گەل من بهێن و ببینن هوین نە د ئامادەنە، ئەم دێ شەرمزار بین، ژ بەر كو ئەم ژ هەوە د پشتڕاست بووین، هوین ژی دێ شەرمزار بن، لێ ئەز نابێژم.
5
لەوما من ب فەر دیت كو ئەز هیڤیێ ژ برایان بكەم، دا ئەو بەری من بهێنە نك هەوە و وێ بەخشینێ پێشوەخت ئامادە بكەن یا هەوە بەرا نوكە سۆز پێ دای، داكو ئەو وەسا یا ئامادە بیت، هەروەكو ئەو بەخشینەكا مەردانە بیت، نە ژ نەچاری بیت.
6
ڤێ چەندێ ژی بزانن: یێ پیچەكێ بچینیت، پیچەكێ ددوریت ژی و یێ گەلەكێ بچینیت، گەلەكێ ددوریت ژی.
7
بلا هەر ئێك ل دویڤ بڕیارا دلێ خۆ بدەت، نە ژ بێدلی یان ژ نەچاری. چنكو خودێ حەز ژ وی دكەت، یێ ب دلخۆشی بدەت.
8
خودێ دشێت هەر كەرەمەكێ ب سەر هەوە دا بڕێژیت، دا هەوە د هەمی تشتان دا و ل هەمی دەمان ب تەمامی تێرا خۆ هەبیت و وەسا هوین ب هەمی كارێن باش د سەر دا بڕژن.
9
هەروەكو هاتیە نڤیسین:
«وی[b] بەڵاڤ كر و دا هەژاران،
راستداریا وی هەروهەر دمینیت.»[c]
10
ئەوێ تۆڤی بۆ تۆڤچینی و نانی بۆ خوارنێ پەیدا دكەت، دێ تۆڤی بۆ هەوە پەیدا كەت و چەند جاركی زێدە كەت و دێ وەرارێ ئێخیتە بەرهەمێ راستداریا هەوە.[d]
11
هوین دێ د هەر تشتی دا هێنە دەولەمەندكرن، دا هوین هەردەم د مەرد بن و ب رێكا مە مەردینیا هەوە سوپاسیكرنێ بۆ خودێ بەرهەم بینیت،
12
چنكو ئەنجامدانا ڤێ خزمەتێ، نە ب تنێ هەوجەییێن پیرۆزكریان دقەتینیت، لێ ژ بەر وێ سوپاسیكرن ژی بۆ خودێ د سەر دا درێژیت.
13
ئەڤ خزمەتە بەلگەیە ل سەر باوەریا هەوە، ئەڤجا گەلەك مرۆڤ ژ بەر ملكەچیا هەوە بۆ دانپێدانێ ب مزگینیا مەسیحی و ژ بەر مەردینیا هەوە د هاریكاریكرنا وان و هەمی كەسێن دی دا، دێ پەسنا خودێ كەن
14
و دێ نڤێژان بۆ هەوە كەن و بیریا هەوە كەن، ژ بەر وێ كەرەما خودێ یا زێدە مەزن، ئەوا بۆ هەوە هاتیە دان.
15
سوپاس بۆ خودێ، ژ بەر دیاریا وی یا ناهێتە سالۆخدان!
  1. a. 9‏:2 مەبەست پێ باوەردارێن هەرێما ئاخایایێنە، كو كورنتۆس پایتەختێ وێ هەرێمێ بوو.
  2. b. 9‏:9 ئەو كەسێ ژ خودانی دترسیت
  3. c. 9‏:9 زەبوور 112‏:9
  4. d. 9‏:10 ئیشایا 55‏:10