عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- گەنجینەیا د ئامانێن گلی دا
- 1
- لەوما، ژ بەر كو خودێ دلۆڤانی ل گەل مە كریە كو مە ئەڤ خزمەتە هەیە، ئەم بێ ئومێد نابین.
- 2
- مە كریارێن ڤەشارتی یێن ب شەرم ژی رەت كرن، ئەم فێلبازیێ ناكەین و دەستكاریێ د پەیڤا خودێ دا ناكەین. لێ ئەم راستیێ دیار دكەین و ب ڤی ئاوایی ل پێشیا خودێ بۆ وژدانا هەر مرۆڤەكی خۆ پەسەند دكەین.
- 3
- لێ ئەگەر مزگینیا مە یا نخافتی ژی بیت، ژ بۆ یێن ژ ناڤ دچن یا نخافتیە.
- 4
- چنكو خوداوەندێ ڤێ جیهانێ[a] زێهنێ بێباوەران كۆرە كریە، داكو رۆناهیا مزگینیا رەونەقیا مەسیحێ كو وێنەیێ خودێیە، نەبینن.
- 5
- ئەم خۆ نادەینە نیاسین، لێ ئەم عیسایێ مەسیح ددەینە نیاسین كو ئەو خودانە و ئەم ژ پێخەمەت عیسای بەنیێن هەوەینە.
- 6
- چنكو ئەو خودایێ گۆتی: «بلا رۆناهی ژ تاریاتیێ شەوقێ بدەت»[b] ، ئەوە یێ د دلێ مە دا شەوق دای، دا ئەم ب رێكا وێ شەوقا ژ دێمێ عیسایێ مەسیحی دەردكەڤیت، رەونەقیا خودێ بنیاسین.
- 7
- لێ ئەو گەنجینەیا مە هەی، یا د ئامانێن گلی[c] دا، دا دیار ببیت كو هێزا هەری زێدە ژ خودێیە، نە ژ مەیە.
- 8
- ئەم ژ هەمی لایان ڤە تەنگاڤ دبین، لێ ناهەڕشین. ئەم ئالۆز دبین، لێ بێ ئومێد نابین.
- 9
- تەپەسەر دبین، لێ پشت بەردای نابین. ئەم دگەڤزین، لێ ژ ناڤ ناچین.
- 10
- هەردەم مرنا عیسای د لەشێ خۆ دا هەلدگرین، دا ژیانا عیسای ژی د لەشێ مە دا بهێتە دیاركرن.
- 11
- ئەم، ئەوێن زیندی، سەخمەراتی عیسای، هەردەم رادەستی مرنێ دهێینە كرن دا ژیانا عیسای د لەشێ مە یێ مربار[d] دا بهێتە دیاركرن.
- 12
- ئەڤجا مرن د مە دا كار دكەت، لێ ژیان د هەوە دا.
- 13
- هەروەكو هاتیە نڤیسین: «من باوەری هەبوو، لەوما ئەز ئاخفتم،»[e] مە هەمان گیانێ باوەریێ هەیە، ئەڤجا ئەم ژی باوەر دكەین، لەوما ئەم ژی دئاخڤین.
- 14
- چنكو ئەم دزانین ئەوێ خودان عیسا راكری، دێ مە ژی ل گەل عیسای راكەت و ل گەل هەوە ل پێشیا خۆ ئامادە كەت.
- 15
- ئەرێ، ئەڤ هەمی تشتە ژ پێخەمەت هەوەنە، داكو كەرەم د ناڤ گەلەكێن دی دا بەڵاڤ ببیت و ژ بۆ مەزناهیا خودێ سوپاسیكرنێ زێدەتر لێ بكەت.
- 16
- لەوما ئەم بێ ئومێد نابین. لێ سەرەڕای كو ئەم ژ سەرڤە ژ ناڤ دچین، د ناخێ خۆ دا ئەم رۆژ بۆ رۆژێ دهێینە نویكرن.
- 17
- چنكو تەنگاڤیێن مە یێن سڤك و دەمكی، مەزناهیەكا گران یا هەتا هەتایی بۆ مە ئامادە دكەن، كو ل گەل چ تشتان ناهێتە هەڤبەركرن.
- 18
- ئەڤجا ئەم ل وان تشتان نانێڕین یێن دهێنە دیتن، لێ ل یێن ناهێنە دیتن. چنكو ئەوێن دهێنە دیتن د دەمكینە، لێ یێن ناهێنە دیتن د هەتا هەتایینە.
- a. 4:4 مەبەست پێ ئبلیسە
- b. 4:6 دەستپێكرن 1:3
- c. 4:7 ئەوێن ژ ئاخێ دهێنە چێكرن
- d. 4:11
q مربار: ئانكو تۆڤێ مرنێ یێ دێ هەر مریت. - e. 4:13 زەبوور 116:10
