عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
ئەڤجا مادەم مەسیحی د لەشی دا ئازار كێشا، هوین ژی ب وێ نیازێ خۆ چەكدار بكەن، چنكو یێ د لەشی دا ئازار كێشای، دەست ژ گونەهێ بەردایە،
2
داكو ئەو ژیێ وی ئەوێ د لەشی دا مای، نە ل دویڤ حەزێن مرۆڤكانی، لێ ل دویڤ حەزا خودێ بژیت.
3
ئێدی بەسە ئەو دەمێ هەوە بوراندی ل دویڤ حەزێن مللەتێن خودێنەنیاس، یێن كو رێكا بێدەلنگی، گوهنێلی[a] ، سەرخۆشی، ئاهەنگێن بەرەڵایی، ئاهەنگێن مەی ڤەخوارنێ و پووتپەرێسیا[b] حەرام دگرن.
4
ئەو مەندەهۆش دمینن، كو ئێدی هوین ل گەل وان ل دویڤ هەمان بەرەڵایی و سەربەردانێ نابەزن، ئەڤجا ئەو هەوە رسوا دكەن.
5
لێ ئەو دێ حسابێ دەنە وی یێ كو ئامادەیە دادكرنا مری و زیندیان بكەت.
6
لەوما مزگینی بۆ مریان ژی هاتیە دان، داكو هەر چەندە ئەو د لەشی دا وەكو مرۆڤان هاتینە دادكرن، لێ د گیانی دا ل دویڤ خودێ بژین.
بریكارێن چاك ل سەر كەرەمێن خودێ 
7
دویماهیا هەر تشتی یا نێزیك بووی، لەوما ل سەر خۆ د زاڵ بن و د هشیار بن ژ بۆ نڤێژكرنێ.
8
بەری هەر تشتەكی، بلا حەزژێكرنا هەوە بۆ ئێكودوو یا گەرم بیت، چنكو حەزژێكرن گونەهێن گەلەك ژی دنخێڤیت[c] .
9
بێی پتەپت مێڤانداریا ئێكودوو بكەن.
10
هەر ئێك ژ هەوە، ل دویڤ وێ بەهرەیا روحانی یا وی وەرگرتی، خزمەتا ئێكودوو پێ بكەن، وەكو بریكارێن چاك ل سەر كەرەمێن خودێ یێن جۆراوجۆر.
11
ئەگەر ئێك دئاخڤیت، بلا وەكو ئێكێ پەیڤێن خودێ دبێژیت بئاخڤیت. ئەگەر ئێك خزمەتێ دكەت، بلا ب وێ هێزێ بكەت یا خودێ دایێ، دا خودێ د هەر تشتی دا بهێتە مەزنكرن، ب رێیا عیسایێ مەسیح، ئەوێ مەزناهی و سەروەری هەروهەر یێن وینە. ئامین.
ئازاركێشان د رێكا مەسیحی دا 
12
گەلی خۆشتڤیان، ژ بەر وان تەنگاڤیێن سوژەك یێن بۆ تاقیكرنێ هوین تووش دبنێ، حێبەتی نەبن، هەروەكو تشتەكێ سەیر هاتبیتە سەرێ هەوە،
13
لێ دلخۆش ببن كو هوین بووینە پشكدارێن ئازارێن مەسیحی، دا دەمێ مەزناهیا وی دیار دبیت ژی، هوین دلخۆش و دلشاد ببن.
14
ئەگەر ژ پێخەمەت ناڤێ مەسیحی هوین بهێنە فهێت كرن، هنگی خوزیكێن هەوە، چنكو گیانێ مەزناهیێ، كو گیانێ خودێیە، ل سەر هەوەیە.
15
بلا كەس ژ هەوە وەكو مێركوژەكی، یان دزەكی، یان خرابكارەكی، یان ژی وەكو مایتێكەرەكی ئازارێ نەكێشیت،
16
لێ ئەگەر ئێك ژ هەوە وەكو مەسیحیەك ئازارێ بكێشیت، بلا شەرم نەكەت، بەلكو پەسنا[d] خودێ بكەت، ژ بەر كو هەلگرێ ڤی ناڤیە.
17
دەم هاتیە كو دادكرن ژ مالا خودێ[e] دەست پێ بكەت. ئەڤجا ئەگەر ژ مە دەست پێ بكەت، دویماهیا وان یێن گوهداریا مزگینیا خودێ ناكەن، دێ چ بیت؟
18
و:
«ئەگەر یێ راستدار ب زەحمەت قورتال ببیت،
پا دێ چ ب سەرێ كەسێ بەدكار و گونەهكار هێت؟»[f]
19
لەوما ئەوێن ل دویڤ حەزا خودێ ئازارێ دكێشن، بلا خۆ رادەستی ئافرێندەرێ دلسۆز بكەن و ل سەر كرنا چاكیێ د بەردەوام بن.
  1. a. 4‏:3 جنس
  2. b. 4‏:3 صەنەمپەرێسی
  3. c. 4‏:8 یەعقوب 5‏:20؛ پەند ‏10‏:12
  4. d. 4‏:16 q پەسن مەدح و سەنا
  5. e. 4‏:17 مەبەست پێ باوەردارێن وی. بنێڕە 1پەترۆس 2‏:5
  6. f. 4‏:18 پەند 11‏:31