عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
پەیڤا ژیانێ 
1
ئەوێ كو ل دەستپێكێ هەبوو، ئەوێ مە بهیستی، ئەوێ مە ب چاڤێن خۆ دیتی، ئەوێ مە لێ نێڕی و مە دەستێ خۆ كریێ، ئەوە یا ئەم بۆ هەوە رادگەهینین كو پەیڤا ژیانێیە.[a]
2
ژیان دیار بوو، مە ئەو دیتیە و شاهدەییێ بۆ ددەین و وێ ژیانا هەتا هەتایی بۆ هەوە رادگەهینین، ئەوا ل گەل بابی بوو و بۆ مە دیار بووی.[b]
3
ئەوا مە دیتی و بهیستی بۆ هەوە رادگەهینین، دا هەوە ژی هەڤپشكی ل گەل مە هەبیت. هەڤپشكیا مە ژی ل گەل بابی و ل گەل كوڕێ وی عیسایێ مەسیحە.
4
ئەم بۆ هەوە ڤان تشتان دنڤیسین، دا دلخۆشیا مە یا تەمام بیت.
خودێ رۆناهیە 
5
ئەڤەیە ئەو پەیاما مە ژ عیسایێ مەسیح بهیستی و بۆ هەوە رادگەهینین: خودێ رۆناهیە و چ تاریاتی تێدا نینە.
6
ئەگەر بێژین كو مە هەڤپشكی یا ل گەل خودێ هەی و ئەم د تاریاتیێ دا بڕێڤە بچین، ئەم درەوان دكەین و ل دویڤ راستیێ ناچین.
7
لێ ئەگەر ئەم د رۆناهیێ دا بڕێڤە بچین، هەروەكو ئەو د رۆناهیێ دا، مە هەڤپشكی یا ل گەل ئێكودوو هەی و خوینا كوڕێ وی، عیسای، مە ژ هەمی گونەهان پاقژ دكەت.
8
ئەگەر ئەم بێژین كو مە گونەهـ نینن، ئەم خۆ دخاپینین و راستی د دلێ مە دا نینە.
9
ئەگەر ئەم دانپێدانێ ب گونەهێن خۆ بكەین، ئەو یێ دلسۆز[c] و راستدارە، لەوما دێ ل گونەهێن مە بوریت و مە ژ هەمی خرابیان پاقژ كەت.
10
ئەگەر ئەم بێژین كو مە گونەهـ نەكریە، ئەم وی درەوین دەردئێخین و پەیڤا وی د دلێ مە دا نینە.
  1. a. 1‏:1 یوحەننا 1‏:1
  2. b. 1‏:2 یوحەننا 1‏:14
  3. c. 1‏:9 q دلسۆز: ئانكو وەفادار